د خوست امنیتي مسوولان وايي چې د دغه ولایت په تڼیو ولسوالیو کې یوه کس خپله خُسر، خواښې، اوښی او دوه ښینې وژلي دي.
پېښه پرون سهشنبه ۶:۳۰ «مرغومې ۱۹مه» د تڼیو ولسوالي په نریزي سیمه کې رامنځته شوې ده. تراوسه معلومه نهده چې دغه کس ولې د خپلې خُسرګنۍ پنځه غړي وژلي.؟
سلاموطندار پر فېسبوک وڅارئ
د خوست د امنیې قومنداني وياند طاهر احرار سلاموطندار ته وويل چې دغه ۳۳ کلن کس د تڼيو ولسوالي د نریزي کلي اوسېدونکی دی او د شپې ناوخته د یادې ولسوالي د امنیتي ځواکونو د عملياتو پر مهال نیول شوی دی.
نیول شوي کس په خپل جرم اعتراف کړی او ویلي یې دي چې د خپلې خُسرګنۍ پنځه غړي یې وژلي دي.
د امنیې قومنداني د مسوولانو په وینا، نیول شوی کس به د نورو اجراتو لپاره عدلي ارګانونو ته وروسپاري.
بلخوا د کاپیسا امنیتي مسوولان وايي چې د دغه ولایت په نجراب ولسوالي کې یوه کس په ښکاري ټوپک خپله وژلی دی.
د کاپیسا امنیې قومنداني ویاند عبدالفتاح فایز سلاموطندار ته ویلي چې پېښه «سهشنبه، مرغومې ۱۲مه» د دغه ولایت د نجراب ولسوالي په دره افغانیه فیروزي سیمه کې د حمیدالله په نوم یوه کس خپل پلار وژلی دی.
سلاموطندار پر اېکس هم وڅارئ
تراوسه د دې پېښې انګېزه نهده روښانه شوې. یاد کس د امنیتي ځواکونو له لوري نیول شوی دی.