په برازیل کې په نړیواله کچه د لوږې مخنیوي په موخه د جي۲۰ هېوادونو د مشرانو دوهورځنۍ غونډه جوړه شوه. د جي۲۰ ډلې مشران وايي، په نړۍ کې باید حکومتي بنسټونه اصلاح شي او د نړۍ پر میلیارډرانو باید محدودیتونه ولګول شي. د جي۲۰ غونډې په پای کې له لوږې سره د مبارزې لپاره یو نړیوال اېتلاف هم جوړ شو.
افغانستان د نړیوالو مرستندویه بنسټونو د شمېرو پر بنسټ، د هغوی هېوادونو له ډلې یو دی چې ډېر وګړي یې له لوږې سره مخامخ دي.
د سلاموطندار پښتو فېسبوکپاڼه وڅارئ
د ا.ا د اقتصاد وزارت مسوولان وايي، د جي۲۰ هېوادونو مشران کولای شي چې په افغانستان کې د بېوزلۍ کمولو لپاره پانګونه وکړي. د دغه وزارت ویاند عبدالرحمان حبیب وايي:
د جي۲۰ ډله کولای شي زموږ له هېواد سره د مالي او اقتصادي مرستو له لارې د زېربناوو رغولو لپاره مرسته وکړي. جي۲۰ د نړیوالو غونډو او پروګرامونو له لارې کولای شي چې په افغانستان کې د بوختیاوو فرصتونو په برابرولو سره د بېوزلۍ او ناانډوله اقتصاد کچه را کمه کړي، خدمتونو ته لاسرسی او د خلکو عواید ډېر کړي.»
د ملګرو ملتونو د خوړو نړیوال سازمان تر دې مخکې ویلي و چې د ژمي را رسېدو سره یو پر څلورمې برخې افغانان د خوړو لپاره څه نهلري.
په ورته وخت کې له پېښو سره د مبارزې لپاره د چمتووالي ادارې مسوولان وايي، ا.ا په افغانستان کې د بېوزلۍ له منځه وړلو لپاره پر ځینو پروګرامونو کار کوي.
د دې ادارې سرپرست نورالدین ترابي وايي، د سېشنبې په ورځ یې په طبیعي پېښو کې ۵۰۰ زیانمنو کورنیو ته مرستې رسولي چې په وینا یې، دا خپله له لوږې سره د مبارزې لپاره د ا.ا د هڅو ښکارندويي کوي.
بلهخوا په طبیعي پېښو کې یوشمېر زیانمنې شوې کورنۍ د دغو مرستو د دوام غوښتنه کوي. د کابل ښار دوو اړمنو عبدالصمد او تورپېکۍ چې نن یې له پېښو سره د مبارزې د چمتوړالي ادارې له لوري مرستې ترلاسه کړي، وايي:
«دا مرستې بسنه نه کوي؛ له ا.ا څخه غواړو چې ټولو هېوادوالو ته د کار اسانتیاوې برابرې کړي، څو موږ او زموږ خلکو ته کاروبار پیدا شي.»
«دا مرستې مو ښايي تر یوې میاشتې پورې وشي، نور له دولت څخه غواړو چې ښځو ته د کار اسانتیاوې برابرې کړي؛ دا مرستې دې هم دوامدارې وي چې زموږ د کورنیو غړیو ته ورسېږي.»
د یادونې ده چې د ملګرو ملتونو د بشري مرستو د همغږۍ ادارې یا اوچا تر دې وړاندې ویلي و چې روان کال د بودیجې کمښت له کبله یې دوه میلیونه اړمن د خپلو مرستو له نوملړ څخه اېستلي دي.
