د ا.ا سرپرست حکومت په کندوز او بدخشان کې د سلاموطندار د خبریال حسیب حساس په ګډون، څلور افغان خبریالان له بنده خوشې کړي دي.
د افغانستان د ازادو ژورنالېستانو اتحادیې نن (د وږي نهمه، د پنجشنبې ورځ) ماسپښین مهال په یوه خبرباڼه کې لیکلي چې په کندهار کې د طلوع نیوز خبریال عطاالله عمر، او په کندوز کې د سلاموطندار خبریال حسیب حساس د ا.ا له بنده خوشې شوي دي.
دغې اتحادیې نن له غرمې مخکې د یوې خبرپاڼې په خپرولو سره په ننګرهار کې د کلید راډیو د خبریالانو فقیرمحمد فقیرزي او جاناغا صالح د خوشې کېدو خبر هم ورکړی و.
سلاموطندار پر ټویټر هم وڅارئ
یادې اتحادیې د کلید راډیو د دغو دوو خبریالانو چې شاوخوا شل ورځې وړاندې نیول شوي وو، هرکلی کړی او له امنیتي ادارو یې غوښتي چې د خبریالانو او رسنیو اړوندې قضیې د رسنیزو سرغړونو د شکایتونو ارزولو کمېسیون له لوري وڅېړي.
