د ۱۴۰۳ ښونیز کال پیل سره هممهاله د روزګان محلي مسوولان وايي چې دغه ولایت کې له زدهکړو محرومو سیمو کې ماشومانو ته د زدهکړو کولو زمینه برابره کړي.
روزګان کې د پوهنې ریاست او محلي چارواکو له لوري د ښوونځي د زنګ په کړنګولو سره، نوی ښوونیز کال پرانېست.
د پکتيا ډنډپټان ولسوالي اوسېدونکي وايي چې دغه ولسوالي کې ډیورنډ کرښې ته څېرمه له پاکستاني ځواکونو سره د جګړې پر مهال د یاد هېواد ځواکونو د ملکیانو کورونه په نښه کړي دي. د یادې ولسوالي اوسېدونکي زیاتوي، هر مهال چې د افغان او پاکستاني ځواکونو ترمنځ جګړه رامنځته کېږي، پاکستانی لوری د ملکیانو کورونه په نښه کوي.
د افغانستان لپاره د سویډن کمېټې سرمنشي انډریاس سټفانسون تازه د دغه هېواد له یوې غږیزې رسنۍ سره په مرکه کې ویلي چې له درېوو ورځو راهیسې یې د ا.ا د سرپرست حکومت په غوښتنه په افغانستان کې فعالیت درولی دی. د افغانستان لپاره د سویډن کمېټې په اتلسو ولایتونو کې له اړمنو، په تېره ښځو، ماشومانو او معلولانو سره مرستې کولې.
په زابل کې د کرنې ریاست مسوولان وايي چې یاد ولایت کې د چرکانو ۵۰فارمونه شتون لري چې هر فارم په څه باندې یوه میاشت کې ۶۰۰۰ زره غوښن چرګان تولیدوي.
د یاد ولایت د کرنې، اوبولګولو او مالدارۍ ریاست رییس مولوي عطاءالله راشد سلاموطندار ته وايي چې تولید شوي چرګان د زابل ترڅنګ د هېواد نورو ولایتونو ته هم لېږدول کېږي.
پر خوست او پکتیکا د پاکستاني ځواکونو د هوايي بریدونو وروسته تېره ورځ دوشنبه، کب ۲۸مه د پاکستان او د افغانستان امنیتي ځواکونو ترمنځ یو ځل بیا سخته نښته شوې. د دغه برید په غبرګون کې اسلامي امارت د ډیورنډ فرضي کرښې په اوږدو کې د پاکستان پوځي مرکزونه په نښه کړل.
د لوګر محلي چارواکي وایي چې د نوي ۱۴۰۳ کال په ترڅ کې به د دغه ولایت د ټولو ولسوالیو محاکمو ته ودانۍ جوړې شي.
د دغه ولایت والي مولوي ضیاالرحمن مدني پلعلم کې د مرکز پل علم او ولسوالیو د محاکمو له مسوولانو سره په یوه ناسته کې وویل، د ا.ا د مشرتابه د ځانګړي حکم له مخې، د محمداغې، خوښۍ، بره کي برک، ازرې، څرخ او خروار ولسوالیو محاکمو ته اداري ودانۍ جوړېږي.
ارګ پر خپله اېکسپاڼه لیکلي، د ا.ا د کابینې غونډه چې دوشنبه، کب ۲۸مه د محمدحسن اخند په مشري جوړه شوې وه، پهکې پر لویو لارو د ټرافیکي پېښو مخنیوي او د موټرو سرعت کنټرولو په موخه ټرافیک پولیسو ته د اړینو وسایلو چمتو کولو په اړه د یوې طرحې پر جوړېدو خبرې شوې دي.
د میدانوردګ د کرنې، اوبولګولو او مالدارۍ ریاست چارواکي وایي، د دغه ولایت د کرنې ریاست په همغږۍ په جلرېز، حصهاول بهسود او مرکزي بهسود ولسوالیو کې پر ۳۳۰۰ بېوزله او اړمنو کورنیو ۲۰میلیونه افغانۍ ووېشل شوې.
د لوګر د کلیو پراختیا او بیارغونې ریاست چارواکي وایي، د خوړو نړیوال پروګرام(WFP) له لوري څرخ ولسوالي کې پر سلګونه بېوزله کورنیو خوراکي توکي ووېشل شول. مرسته شویو توکو کې ۵۰ کېلو ګرامه اوړه، ۱۰ کېلو ګرامه غوړي، ۶کیلو ګرامه دال، ۳کیلو ګرامه د ماشومانو سوپر سرېلاک او همدارنګه ۳۰ فاکټه د ماشومانو ځانګړي فلمپي خواړه شامل دي.
د افغانستان او پاکستاني ځواکونو ترمنځ په نښته کې د پاکستان د پوځ یو قومندان وژل شوی او دوه سرتیري یې ټپیان شوې دي.
پاکستاني رسنیو نن دوشنبه د کب ۲۸مه خبر ورکړی چې د پوځ دغه قومندان د ډیورنډ کرښې په اوږدو کې د پاړه چینار ولسوالي په کورمه کې له افغان ځواکونو سره په نښته کې وژل شوی دی.
د ریاستالوزرا سیاسي مرستیال مولوي محمد عبدالکبیر کابل کې د چین سفیر جاوشینګ سره لیدنه کې ویلي، سرپرست حکومت غواړي چې د شانګهای همکاریو سازمان راتلونکې غونډه کې د ناظر په توګه د ګډون بلنه ورکړل شي.
د سرپرست حکومت د دفاع وزارت وايي چې د پاکستان د هوايي بریدونو په غبرګون کې یې، ډیورنډ کرښه ته څرمه د پاکستان د پوځ پر مرکزونو د درنو وسلو بریدونه کړي دي.
د دفاع وزارت نن دوشنبه، کب ۲۹مه پر اېکسپاڼه لیکلي چې دغه بریدونه یې پر پکتیکا او خوست د پاکستان د هوايي بریدونو په غبرګون کې کړې دي.
د پکتیا په ډنډپټان ولسوالي کې یوې حکومتي سرچینې سلاموطندار ته ویلي چې په دغه ولسوالي کې ډیورنډ کرښې سره د افغان او پاکستاني ځواکونو ترمنځ نښته روانه ده.
نښته نن دوشنبه، کب ۲۹مه سهار مهال پیل شوې چې تر دې دمه روانه ده. د جګړې پیل سره هممهاله له پاکستان سره د خرلاڅي دروازه هم تړل شوې.
پر خوست او پکتیکا د پاکستان د هوايي بریدونو په غبرګون کې د افغانستان سرپرست حکومت وايي چې دغه ډول ناسنجیده کړنې به بدې پایلې ولري.
د سرپرست حکومت په یوې خبرپاڼه کې دې هوايي بریدونو ته په غبرګون کې ویلي چې داسې پېښې به خورا بدې پایلې ولري او کابو کول به یې د پاکستان اختیار کې نهوي.
خوست کې يوه ډله ځوانان کلي په کلي ګرځي او کورنۍ هڅوي چې خپل هغه ماشومان چې عمر يې ښوونځیو کې د شاملېدو لپاره برابر وي، ښوونځيو کې شامل کړي.
د دغه کمپاین په ترڅ کې هغو ماشومانو ته په وړيا ډول انځورونه هم چاپېږي چې په ښوونځي کې د شامېليدو پرمهال ورته اړتيا وي.
د افغانستان بانک مسوولان وايي چې «دوشنبه، کب ۲۸مه» به «۱۵» میلیونه امریکايي ډالر د لیلام په توګه بازار ته وړاندې کړي.
د افغانستان بانک نن (یکشنبه، د کب ۲۷مه) پر اېکس شبکه «ټوېټرپاڼه» لیکلي چې د «افغانۍ» ارزښت ساتنې او ثبات لپاره به سبا دوشنبه «۱۵» میلیونه امریکايي ډالر لیلام کړي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
