د فلسطین حماس ډله وايي چې د خپلې راتلونکې په اړه اندېښنه نهلري او د اسراییلي ځواکونو پر وړاندې به یې، پوځي عملیات روان وي.
د حماس یوه لوړپوړي چارواکي سمېع ابو ظهوري له الاقصی ټلوېزیون سره مرکه کې همداراز هغه اوازې هم ناسمې بللي چې ګواکې حماس د ټولو بندیانو خوشې کولو په بدل کې دوه میاشتني اوربند سره هوکړه کړې ده.
هالنډ کې شاوخوا ۱۰۰ زره کسانو د فلسطین او غزې اوسېدونکو په ملاتړ لاریون کړی.
دغه لاریون چې تېرو دوو لسیزو کې تر ټولو پراخ لاریون بلل شوی، تېره ورځ د هالنډ «هاګ» ښار کې چې د جرمونو نړیواله محکمه هم په کې ده، ترسره شوی.
لاریون کوونکو د هالنډ له دولته غوښتي چې غزه کې د اسراییل جګړې پایته رسولو لپاره لاډېر اقدامات وکړي.
د غزې په شمال کې د اندونیزیا په نوم روغتون چې یاده سیمه کې د محدود فعالو روغتونونو څخه شمېرل کېږي، د اسراییلي ځواکونو له لوري تر برید لاندې راغلی او دا مهال کلابند دی.
حماس پر خپل ټېلېګرام لیکلي: «د بېځایه شویو خېمو په نښه کول او د ملکیانو سره یوځای یې سوځول، یو ظالمانه جرم دی چې د نتانیاهو د جنګي مجرم حکومت د فاشیزم او د ټولو بشري قوانینو او نورمونو څخه د هغه ښکاره سرغړونه ښيي.»
د فنلنډ چارواکي وايي چې د دغه هېواد په سوېللوېدیځ کې د دوو چورلکو د ټکر له امله پنځه کسان وژل شوي دي.
دغه چورلکې د اورا هوايي ډګر ته نږدې په یوې ځنګلي سیمه کې لوېدلې دي. دغه پېښه پرون شنبه، مې ۱۷مه د فنلنډ «کاوتوا» ښار ته نږدې رامنځته شوې ده.
د انګلستان د اېفاې کپ فوټبال لیګ په پایلوبه کې کرېستال پالاس لوبډلې منچسټر سیټي ته ۱-۰ په پایلې سره ماته ورکړه او په خپل تاریخ کې یې، د لومړي ځل لپاره د یاد جام اتلولي وګټله.
امریکا کې چارواکي وايي چې دغه هېواد کې د سختو توپانونو او اورښتونو له امله لږترلږه ۲۱ کسانو خپل ژوند له لاسه ورکړی دی.
د چارواکو په وینا، یاد کسان په میسوري او کېنټاکي ایالتونو کې مړه شوي دي. ترڅنګ یې، په توپان کې خلکو ته ګڼ مالي زیانونه هم اوښتي دي.
د شماليکوریا مشر کېم جونګ اون د دغه هېواد له هوايي ځواک د لیدنې پرمهال پوځ ته امر کړی چې جګړې ته هر ډول چمتووالی ونیسي.
د کوریا دولتي رسنۍ نن شنبه، مې ۱۷مه راپور ورکړی چې کېم د دفاعي سېسټم او هوايي ځواک فعالیتونه ارزولي او امر یې کړی چې د پوځ ټولې برخې باید جګړې ته چمتووالی ولري.
د ایران ولسمشر مسعود پزشکیان وايي چې د امریکا ولسمشر ډونالډ په یوه وخت کې هم د سولې خبرې کوي او په وینا یې، هممهاله ګواښ هم کوي.
نوموړي دغه څرګندونې نن شنبه، غويي ۲۷مه، تهران کې د یو لړ مراسمو پرمهال کړي دي.
د اوکراین په شمالختیځ سوومي ښار کې د روسیې ډرون یو بس موټر په نښه کړی چې له امله یې، نهه کسان وژل شوي او څلور نور ټپیان دي.
برید ساعت وروسته له هغې کېږي چې اوکراین او روسیې د جګړې له پیله تر دې مهاله د لومړي ځل لپاره د احتمالي سولې په اړه ترکیه کې مخامخ خبرې وکړې.
د ملګروملتونو د بشردوستانه مرستو مشر وايي چې غزې ته د مرستو لېږد په تړاو باید د امریکا له لوري په وړاندې شوې طرحې سره باید وخت ضایعې نهشي.
د ملګروملتونو د بشردوستانه مرستو مشر ټام فلېچر جمعه، مې ۱۶مه ویلي چې دوی لا له وړاندې غزې ته د مرستو لېږد پلان لري او په وینا یې، د وخت له ضایعې کولو پرته باید غزې د ننوتلو په تمه ولاړو لارو ته باید د تګ اجازه ورکړل شي.
د امریکا ولسمشر ډونالډ ټرمپ د عربي متحده اماراتو په ابوظبي کې د «شیخ زاید جومات» ته ورغلی او هلته یې، د اسلامي فرهنګ ستاینه کړې ده.
نیویارک پوسټ نن جمعه، مې ۱۶مه په یوه راپور کې ویلي چې ټرمپ د عربي متحده اماراتو له ولیعهد خلدون خلیفه المبارک سره یوځای دغه جومات ته ورغلي وو.
غزه کې د اسراییلو د تازه بریدونو په لړ کې له پرون پنجشنبې راهیسې تر دې مهاله څه باندې ۱۴۳ کسانو خپل ژوند له لاسه ورکړی دی.
الجزیرې خبري شبکې نن جمعه، مې ۱۶مه راپور ورکړی چې دغه بریدونه د غزې په بېلابېلو سیمو په ځانګړې توګه جبالیا کډوالو کمپ کې پر یوه روغتون شوي دي.
د هند دفاع وزیر رجنات سېنګ د اټومي انرژي نړیوال اژانس څخه غوښتنه کړې چې دغه اداره باید د پاکستان د اټومي وسلو مسوولیت پر غاړه واخلي.
سېنګ په هندي کشمیر کې خپلو سرتېرو ته د وینا پرمهال وویل: «ایا اټومي وسلې د یوه بېمسوولیته او سرکښ ملت په لاس کې خوندي دي؟ زه پر دې باوري یم چې د پاکستان اټومي وسلې باید د اټومي انرژي نړیوال اژانس تر څار او نظارت لاندې راشي.»
د منځني ختیځ یوشمېر هېوادونو ته د سفر پرمهال د ایران په تړاو د امریکا ولسمشر ډونالډ ټرمپ څرګندونو ته په غبرګون کې د د دغه هېواد ولسمشر مسعود پزشکیان ویلي چې ایران به هېڅکله د ټرمپ ځورونو او نیوکو ته سرټیټ نهکړي.
د اوکراین او روسیې ترمنځ جګړې پای ته رسولو لپاره د مسکو مذاکراتي پلاوی استانبول ته رسېدلی دی.
د روسیې انټرفاکس رسنۍ راپور ورکړی چې د یاد هېواد ولسمشر ولادېمیر پوتین د مذاکراتي پلاوي په نوملړ کې نهلیدل کېږي. بلخوا کرملین وايي، پوتین بېګاه شپه ترکیې ته تلونکي پلاوي او نورو چارواکو سره د اوکراین سولې په تړاو خبرې کړې دي.
