راتلونکي کال کې د هر افغان د حج لګښت ۲۸۲زره افغانۍ ټاکل شوی

د ارشاد، حج او اوقافو وزارت سرپرست نورمحمد ثاقب نن یوې غونډې ته وویل، په ۱۴۰۴ لمریز کال کې د هر افغان د حج لګښت ۲۸۲زره او ۹۰ افغانۍ او د ټولو افغان حاجيانو د حج لګښتونه ۸ میلیارد او ۲۷۸ ميليونه او ۷۷۷ زره افغانۍ ټاکل شوي دي.

نوموړي وویل، حاجيان کولای شي له راتلونکې يکشنبې څخه په مرکز کابل کې د حج له رياست او اړوندو ولایتونو کې له ولايتي رياستونو څخه تعرفه ترلاسه او بانک ته يې تحويل کړي.

افغان کډوالو سره ناسم چلند؛ اسلامي امارت: کوربه هېوادونه دې د کډوالو نړیوال اصول مراعت کړي

د کډوالو او بېرته راستنېدونکو چارو وزارت سرپرست جلا جلا کتنو کې کابل کې د ایران او پاکستان سفیرانو سره لیدلي.
مولوي عبدالکبیر دغو ناستو کې ویلي، ایران او پاکستان افغانستان سره ګڼ مشترکات لري او کلونه یې د میلیونونو افغان کډوالو کوربه توب کړی، خو په وینا یې له کوربه هېوادونو هیله لري چې د کډوالو په اړه له زغم او حوصلې کار واخلي.

پکتيا کې د شري ناروغي ۶۰ سلنه زیاته شوې

د پکتیا د عامې روغتيا رياست مسولان وايي، د روان ۲۰۲۵ کال تېرو دوو مياشتو کې د شري ۱۱۹ پېښې ثبت شوي، داسې حال کې چې د تېرکال ورته موده کې ۴۴ پېښې ثبت شوې وې.

دوی وويل، ماشومانو کې د يادې ناروغۍ د مخنيوي او له منځه وړلو لپاره يې لرې پرتو سيمو ته روغتيايي ټيمونه ليږلي او خلکو ته يې د عامه پوهاوي ترڅنګ، زرګونه ماشومانو ته واکسين هم تطبيق کړی، خو د تېر کال په پرتله پېښې ۶۰ زياتې شوې دي.

تورخم کې د اسلامي امارت او پاکستاني ځواکونو نښتې؛ لسګونه کورنۍ بېځایه شوي

تورخم کې پر ډیورنډ فرضي کرښې ته څېرمه د اسلامي امارت او د پاکستان پوله ساتو ځواکونو ترمنځ د تېرو دوو ورځو جګړو له امله لسګونه کورنۍ بېځایه شوې دي.

د سیمې یوشمېر اوسېدونکي وايي، د پاکستاني ځواکونو له لوري یې کورونه او دوکانونه په نښه شوي چې له امله یې د خپلو کورونو او سیمو پرېښودو ته اړ شوي.

امریکا اوکراین ته د پوځي مرستو استول ځنډولي

د امریکا ولسمشر ډونالډ ټرامپ او د اوکراین ولسمشر ولادیمیر زیلنسکي ترمنځ له لفظي شخړې وروسته، ولسمشر ټرامپ اوکراین ته د پوځي مرستو استول ځنډولي.
رویټرز اژانس نن (سې‌شنبه د کب ۱۴) د سپينې ماڼۍ د یوه چارواکي په خبره رپوټ ورکړی چې د دې لپاره چې ډونالډ ټرامپ د اوکراین جګړې پایته رسولو کې له مرسته کولو څخه ډاډ ترلاسه کړي، دغه هېواد ته یې د پوځي تجهیزاتو استول بند کړي دي.

د ا.ا او پاکستاني ځواکونو ترمنځ نښته کې يو سرتېری وژل شوی

د کورنیو چارو وزارت ویاند عبدالمتین قانع وویل، یاده جګړه د پاکستان له لوري وړمه شپه په ١٢ بجو پیل او تر دوشنبه ١١ بجو یې دوام وکړ.
ده وویل، د دغې جګړې په پایله کې د پاکستان ځینې پوستې له منځه وړل شوي او تلفات هم وراوښتي. د هغه په وینا، نښته کې د اسلامي امارت یو سرتېری هم شهید شوی او دوه ټپیان دي.