د هند په کوربهتوب د افغانستان او د یاد هېواد د کرېکټ ملي لوبډلو ترمنځ د روانې درې شل اووره سیالیو د لوبلړۍ په لړ کې نن دواړو لوبډلې درېیمه او وروستۍ سیالي کوي.
ټاکل شوې چې دغه لوبه نن چهارشنبه جنورۍ ۱۷مه د بنګلور په «چېناسوامي کرېکټ لوبغالي» کې ترسره شي.
د سلاموطندار پښتو فېسبوکپاڼه وڅارئ
افغانستان د یادې لوبلړۍ په لومړیو دوو سیالیو کې ماته خوړلې او کېدونکې وروستۍ لوبه کې به هڅه وکړي چې په لومړي ځل هند له ماتې سره مخ کړي.
د افغانستان کرېکټ ملي لوبډلې په لومړۍ لوبه کې هند ته د ۱۵۹ او دویمه سیالي کې د ۱۷۳ منډو هدف ورکړی و.
هند بیا دواړه لوبې په شپږو-شپږو وېکټو ګټلي دي.
د افغانستان او هند ترمنځ دا لومړۍ ځل دی چې د شل اووره سیالیو تاریخي لوبلړۍ کېږي. له دې وړاندې د دواړو لوبډلو ترمنځ نه د یو ورځنیو او نه هم د شل اووره سیالیو لوبلړۍ شوې وه.
که څه هم افغانستان لومړۍ دوو سیالیو کې ماته وخوړله، خو د هند په څېر لوبډلې سره سیالي کول به د افغان لوبغاړو تجربه نوره هم زیاته کړي.