د افغانستان کرېکټ ملي لوبډلې لوبغاړی احسان جنت د فساد له امله د پنځو کلونو لپاره له هر ډول کرېکټ منع شوی دی.
د افغانستان کرېکټ بورډ نن چهارشنبه، زمري ۱۷مه پر خپله فېسبوکپاڼه لیکلي چې احسان جنت د لوبو د فساد ضد قانون له اصولو د سرغړونې له امله د پنځو کلونو لپاره له هر ډول کرېکټ منع کړی دی.
د سلاموطندار پښتو فېسبوکپاڼه وڅارئ
کرېکټ بورډ لیکلي: «د کورني کرکټ لوبغاړی احسان جنت د کابل پریمیر لیګ یا KPL دویم پړاو سیالیو کې د لوبو د فساد ضد نړیوال قانون له اصولو څخه د سرغړونې او فساد له امله د پنځو کلونو مودې لپاره له هر ډول کرکټ او د کرکټ اړوند چارو له ترسره کولو څخه منع شو.»
د کرېکټ نړیوالې شورا د لوبو د فساد ضد نړیوال قانون د ۲مې مادې، د لومړۍ فقرې د لومړي جز پر بنسټ، کوم لوبغاړي چې د فساد په کړنو، جوړجاړي او ورته نورو مواردو کې ښکېلیږي، له پنځه کلونو تر عمري لوبیز بندیز سره مخ کېدا شي.
کرېکټ بورډ همداراز لیکلي چې احسان جنت د لوبو د فساد ضد نړیوال قانون له مادو خپله سرغړونه منلې او په وینا یې، فساد کې د ښکېلتیا په تړاو یې، پر خپلې سرغړونې اقرار کړی دی.
په لوبیز فساد کې د ښکېلتیا له امله پر درېوو نورو لوبغاړو هم شکونه موجود دي، خو کرېکټ بورډ یې، نومونه نهدي یاد کړي دي.
کرېکټ بورډ زیاته کړې چې د یادو درېوو لوبغاړو په اړه څېړنې روانې دي چې د جرم ثابتېدو په صورت کې به یې، په اړه پرېکړې ونیول شي.