د مکسیکو په شمالي سرحدي ښار «سیوداد جواریز» کې وسلهوالو په یوه زندان برید کړی چې پر مهال یې لږ تر لږه ۱۴ کسان وژل شوي دي.
د مکسیکو یوشمېر رسنیو ویلي چې د نښتې له امله له یاد زندان څخه ۲۴ بندیان هم په تېښته بریالي شوي دي.
د چېهواوا ایالت د څارنوالۍ دفتر د یکشنبې پر ورځ په یوه بیان کې ویلي، بریدګر په سیمهییز وخت د سهار په اوو بجو په څو زغرهوالو موټرو کې زندان ته په نږدې کېدو سره پر ساتونکو ډزې پیل کړې.
د رسنیو د راپورونو له مخې په دې نښته کې د زندان لس ساتونکي او څلور بندیان وژل شوي دي. رسنیو همداراز پېښه کې د دیارلس کسانو د ټپي کېدو خبر هم ورکړی دی.
الجزیزې د مکسیکو د ځینو رسنیو له قوله راپور ورکړی چې د نښتې پر مهال په زندان کې یوشمېر بلواګرو بندیانو ځینو توکو ته اور ورته کړی او ساتونکو سره یې نښته کړې ده.
د دولتي څارنوالۍ دفتر همداراز ویلي چې د مکسیکو سرتېرو او پولیسو د یکشنبې پر ورځ د زندان کنټرول بېرته ترلاسه کړی دی. د ځارنوالۍ دفتر همداراز زیاته کړې چې څلور کسان یې نیولي، خو دا یې نه ده په ډاګه کړې چې نیول شوي کسان وسلهوال و او که بندیان دي.
تراوسه روښانه نه ده چې دغه برید چا کړی، خو مکسیکو کې چارواکو رسنیو ته ویلي چې د برید په اړه یې پلټنې پیل کړي دي.
سلاموطندار پر ټویټر هم وڅارئ
د مکسیکو زندانونو کې تل د سیالو ډلو ترمنځ تاوتریخوالی کېږي چې ډېری وخت د پراخې مرګ ژوبلې لامل هم کېږي.
