د پکتيا ولايت د مرکز ګردېز ښار اړوند د بلندمنزلو سیمه کې د يوه لوی عيدګاه جومات د جوړېدو چارې چې د کورنیو چارو وزارت سرپرست سراج.الدین حقا.ني هم پهکې ګډون کړی و، پیل شوې.
د سلاموطندار پښتو فېسبوکپاڼه وڅارئ
د حقا.ني په وینا، پر ياد جومات چې د جوړېدو چارې به یې په درېوو کلونو کې بشپړې شي او ۱۰زره لمونځکوونکي پهکې ځایېږي، شاوخوا درېنیم میلیونه ډالره لګښت راځي.
د کورنيو چارو سرپرست وزير وويل چې د ياد جومات لګښت به دی له نورو خيريه بنسټونو سره په ګډه ورکوي. هغه له نورو سوداګرو هم وغوښتل چې د ياد جومات مالي برخه کې خپلې مرستې ونه سپموي.
هغه زیاته کړه: «د پکتيا زون ته پوره پام نهدی شوی؛ نو موږ په ګډه پرېکړه وکړه چې له مشرانو سره به لومړی د جومات کارونه پيل کړو، ورپسې به د نورې بيارغونې چارې پيل کړو. پر سوداګرو غږ کوم چې د یاد جومات مالي برخه کې راسره برخه واخلي.»
په ورته وخت د ګردېز ښاريان هم د ياد جومات چارو پيل ته خوښ دي. د ګردېز ښار اوسېدونکی امينالله وايي، تر دې وړاندې په مرکز ګردېز کې د زياتو لمونځکوونکو د راټولېدو لپاره جومات نه و او په خبره يې چې د ياد جومات په جوړېدو سره به په اخترونو کې خلکو ته اسانتياوې برابرې شي.
دوی غوښتنه کوي چې د دغه جومات تر څنګ دې په پکتيا کې نورې پرمختيايي پروژې هم پيل شي. په همدې حال کې د کورنيو چارو وزارت سرپرست ژمنه وکړه چې پکتيا ته به د پرمختيايي پروژو په برخه کې ځانګړې پاملرنه کوي.
