تیز آرهده اوروش توگهیدی. ۱ اپریل کونی امریکا جمهور باشلیغی دونالد ترامپ ایران بیلن باغلیق حربی عملیات یقین هفتهلرده یکونلنیشینی ایتدی. بیراق، آرهدن بیر کون اوتیب ترامپ آق اویده قیلگن مراجعتیده ایران حدودیگه جوده کوچلی ضربهلر بیریب، اونی «تاش دوریگه» قیترماقچیلیگینی بیلدیردی. ترامپنینگ بیر-بیریگه ضد بیاناتلری ینگرهیاتگن بیر پیتده، ایران جمهور باشلیغی مسعود پزشکیان هم اوروشنی توگهتیشگه تیارلیگینی، بیراق بو فقط ایران قویگن شرطلر بجریلگندهگینه عملگه آشیریلیشی ممکنلیگینی بیلدیردی.
ایندی ایران یقین شرقده مهم استراتیژیک نقطه حسابلنگن هرمز بوغوزینی یاپیش بیلن قورقیته آلمسلیگی ممکن. سببی سعودی عربستان هرمز بوغوزینی چیتلب اوتووچی نفت لولهسینی تولیق قووتده ایشگه توشیردی. ایران ایسه بوغوزدن اوتیش اوچون اوزی رخصت بیرگن دولتلرنینگ کیمهلریگه خوفسیز یولَک تشکیل قیلینگنینی بیلدیردی. گرچی خبرلرده اوروشنی توگهتیش بوییچه مذاکرهلر آلیب باریلهیاتگنی قید ایتیلهیاتگن بولسه-ده، یقین شرقده هوا هجوملری بیر آیدن کوپراقدن بویان دوام ایتماقده.
امریکانینگ بیر-بیریگه ضد بیاناتلری
امریکا جمهور باشلیغی دونالد ترامپ ۲ اپریل کونی آق اویده قیلگن مراجعتیده ایراننی «تاش دوریگه» قیترماقچیلیگینی ایتدی. حتا او امریکا اردوسینینگ ایران دهگی حرکتلرینی اوز سیماسی بیلن کورسهتیب بیردی. آق اوی رهبری ایران بیلن حربی عملیاتده دییرلی برچه مقصدلریگه ایریشگنی و هجوملر ینه ۲-۳ هفته دوام ایتیشینی معلوم قیلدی. جمهور باشلیغنینگ تأکیدلشیچه، ایران الهقچان اوزینینگ فلاتیدن (دینگیز کیمهلری) و حربی-هوا کوچلریدن دییرلی محروم بولگن.
«بیز اولرگه جوده کوچلی ضربهلر بیرهمیز و اولرنی تاش دوریگه قیترهمیز. اگر ایران کیلیشوو گه راضی بولمسه، امریکا مملکتدهگی برچه برق آست قورمهلریگه بیر وقتنینگ اوزیده کوچلی ضربهلر بیرهدی»، دیگن آق اوی رهبری.
بیراق، ۱ اپریل کونی ترامپ ژورنالیستلر گه امریکا ایراندن «ایکی-اوچ هفته ایچیده» چیقیب کیتیشینی و اوروشنی توگهتیش اوچون ایران بیلن تینچلیک شرطنامهسی توزیش شرط ایمسلیگینی ایتگندی. شو کوننینگ اوزیده دونالد ترامپ اوزینینگ «تروث سوشیال» اجتماعی ترماغیدهگی صحیفهسیده ایراننینگ ینگی رهبریتی امریکا گه صلح توزیش بوییچه سوراو یوبارگنینی هم بیلدیرگن. اونینگ سوزلریگه کوره، واشنگتن راضیلیگی اوچون اساسی شرط هرمز بوغوزینینگ آچیلیشی حسابلنهدی.
«اولگیلریگه قرهگنده انچه کمراق رادیکال (تندرو) و انچه عقلیراق ایران رژیمینینگ ینگی رهبری حاضرگینه امریکا اوت آچیشینی توختهتیشنی سورهدی! هرمز بوغوزی آچیق، ایرکین و تازهلنگن بولسه، بیز بو تکلیفنی کوریب چیقهمیز»، دیب یازدی امریکا جمهور باشلیغی دونالد ترامپ.
سیبیاس نیوز نشرینینگ معلوماتلریگه کوره، امریکا جمهور باشلیغی دونالد ترامپ ایران التماسیگه بناً ضربهلرنی ۱۰ کونگه کیچیکتیریلگنینی بیلدیرگن. او قرارینی: «ایران میندن ضربهلرنی ۷ کونگه کیچیکتیریشنی سورهدی، بیراق اولر گه ۱۰ کون مهلت بیرهمن»، دیه ایضاحلهگن.
بیراق «والاستریت ژورنال» نشرینینگ یازیشیچه، مذاکرهلرده قتنشگن واسطهچیلر ایران اصلیده بوندهی کیچیکتیریشنی سورهمهگنینی تأکیدلهگن. بوندن تشقری، ایران حاضرگچه امریکا تامانیدن تکلیف ایتیلگن ۱۵ بنددن عبارت تینچلیک ریجهسیگه رسمی جواب بیرمهگن.
ایران جمهور باشلیغی اوروشنی توگهتیش اوچون شرط قویدی
امریکا جمهور باشلیغی دونالد ترامپ ایران بیلن باغلیق حربی عملیات یقین هفتهلرده توگهشینی ایتگن بیر پیتده، ایران جمهور باشلیغی مسعود پزشکیان هم اوروشنی توگهتیشگه تیارلیگینی، بیراق بو فقط ایران قویگن شرطلر بجریلگندهگینه عملگه آشیریلیشی ممکنلیگینی ایتدی. بو حقده مملکت جمهور باشلیغی اوزینینگ ایکس اجتماعی ترماغیدهگی صحیفهسیده معلوم قیلگن.
پزشکیاننینگ تأکیدلشیچه، امریکا و اسرائیلنینگ حربی حرکتلری خلقارا حقوقنی بوزوچی مثلی کوریلمهگن جنایت دیر. او شونینگدیک، هجوملردن آلدین ایران مذاکرهلرنی حلال آلیب بارگنینی ایتگن. ایران جمهور باشلیغینینگ بیلدیریشیچه، امریکا رهبری ضربهلری جایلشگن دولتلر بو بزهلردن (پایگاه) ایران گه قرشی هجوملر اویوشتیریلیشینینگ آلدینی آلالمهگن. اونینگ سوزلریگه کوره، ماجرانی توگهتیشنینگ یگانه یولی – تجاوزنی توختهتیش. اگر خوفسیزلیک کفالتلری بیریلسه، ایران اوروشنی یکونلش گه تیار.
«روسیه و پاکستان رهبرلری بیلن صحبتده ایراننینگ منطقهده تینچلیک طرفداری ایکنینی ینه بیر بار تصدیقلهدیم. صهیونیست رژيمی و امریکا باشلهگن بو اوروشنی توگهتیشنینگ یگانه یولی – ایراننینگ قانونی حقوقلرینی تن آلیش، تاوان تولش و کیلهجکدهگی تجاوز گه قرشی قطعی خلقارا کفالتلر بیریلیشی دیر»، دییدی مسعود پزشکیان.
مارچ آییده امریکا ۱۵ بنددن عبارت تینچلیک ریجهسینی تقدیم ایتگندی، بیراق تهران اونی «بیر تامانلمه و عدالتسیز» دیب بهالهگن. ایران اوز جوابیده بیر قطار طلبلرنی قویگن، عملیاتنی توختهتیش؛ اوروش تکرارلنمسلیگینی تأمینلهیدیگن شرایط یرهتیش؛ ییتکزیلگن ضرر اوچون تاوان تولش؛ منطقهدهگی برچه یونهلیشلرده حربی حرکتلرنی توختهتیش.
شونینگدیک، ایران تشقی ایشلر وزیری سیدعباس عراقچی دولتلر اورتهسیده خبر المهشینووی بارلیگینی تصدیقلهگن، بیراق بونی رسمی مذاکره دیب اتهشدن باش تارتگن. اونگه کوره، او امریکا مخصوص وکیلی استیف ویتکافدن خبرلر آلهیاتگن بولسه-ده، بو حلی مذاکرهلر آلیب باریلهیاتگنینی انگلتمهیدی.
بوندن تشقری، عراقچی امریکانینگ مملکتدهگی قوروقلیکدن باستیریب کیریشی احتمالی انیقلیک کیریتیب، تهران بوندهی سناریوگه تیارلیگینی و قوروقلیکدهگی اوروشده اوز امکانیتلریگه ایشانیشینی علیحده تأکیدلهدی.
«اولر بوندهی قیلیشگه جرئت ایتهدی دیب اویلمهی من. یوقسه، اولرنی جوده آغیر تلفاتلر کوتهدی. اولر گه ییتکزیلگن ضررنی کوردینگیز. اولرنینگ رادار کوزهتولری نیمه بولدی؟ قوروقلیکدهگی اوروشده بیز بوندن هم یخشیراق میز. بیز مملکتیمیز اوچون قوروقلیکدهگی هر قندهی تهدید گه قرشی توریشگه تولیق تیارمیز»، دییدی عباس عراقچی.
ایران حکومتیدن مهم شخصلردن بیری عالی رهبر مجتبی خامنهای هم سیلنگنیدن بیری هنوزگچه خلققه کورینیش بیرمهدی. «او تیریکمی دیگن سواللر» نهفقط عامهوی اخبارات واسطهلریده، بلکی اوروشنی باشلب بیرگن امریکا حکومتی تامانیدن هم قیته-قیته ینگرهماقده.
بیراق، بو شبههلر گه چیک قوییب، روسیهنینگ ایران دهگی ایلچیسی عینیدمده ینگی عالی رهبر ایرانده ایکنلیگینی، فقط کورینیش بیرمهیاتگنینی بیلدیردی. امریکا جمهور باشلیغی دونالد ترامپ ۲۹ مارچ کونی ژورنالیستلر بیلن اوچرهشووده ایسه اونی الهقچان اولدیگه چیقریب، ایرانده ینگی رهبرلر تیارلهگنینی ایتدی.
«اگر سیز کورگن بولسنگیز، رژیم الهقچان اوزگرگن، چونکی بیر رژیم یوق قیلیندی، ویران قیلیندی، اولرنینگ برچهسی اولدی. کیینگی رژیمنینگ اکثریتی اولیک»، دیگن ترامپ.
شونینگدیک، ترامپ کیمنی نظرده توتهیاتگنی و امریکا عینن کیم بیلن ایش آلیب بارهیاتگنینی آچیقلمهگن. بوندن تشقری، ترامپ حاضرگی ایران رهبرلرینی «مطلقا باشقه آدملر» و «جوده پروفیشنل شخصلر» دیب اتهگن.
ایران ایندی هرمز بوغوزینی یاپیش بیلن قورقیته آلمهیدی
ایران مهم استراتیژیک نقطه حسابلنگن هرمز بوغوزینی یاپیش آرقهلی اولگیدیک باسیم اوتکزه آلمسلیگی ممکن. سببی، سعودی عربستان تامانیدن بوغوزنی چیتلب اوتووچی مقابل نفت لولهسی تولیق قووتده ایشگه توشیریلدی. مذکور لوله قیراللیکنینگ شرقی نفت کانلرینی قیزیل دینگیز ساحلیدهگی ترمیناللر بیلن باغلهیدی و ۲۸ فبرور کونی باشلنگن امریکا-اسرائیل حربی عملیاتیدن کیین ایران تامانیدن چیکلنگن هرمز بوغوزینی ایلنیب اوتیش امکانینی بیرهدی.
بلومبرگ منبعلریگه کوره، بوغوز یاپیلیشیدن اول اوشبو یونهلیش آرقهلی کونیگه تخمیناً ۱۵ میلیون بوشکه نفت تشیلگن. بوغوزده چیکلاولر کوچهیگچ، تانکرلر آقیمی سعودی عربستاننینگ قیزیل دینگیزدهگی ینبو پارتیگه یونهلتیریلگن. حاضرده بو پارت آرقهلی خام نفت صادراتی کونیگه ۵ میلیون بوشکه گه ییتگن. کپلیر کمپنیهسی معلوماتلریگه کوره، ۱-۲۶ مارچ کونلری آرهلیغیده هرمز بوغوزی آرقهلی یوک تشیش حجمی ۹۵ فایز گه کمهیگن.
شو بیلن بیرگه، ایران ایریم چیکلاولرنی یومشتگن. پاکستان تشقی ایشلر وزیری اسحاق دارنینگ معلوم قیلیشیچه، ایران ینه ۲۰ ته پاکستان بیراغی آستیدهگی کیمهنینگ بوغوزدن اوتیشیگه رخصت بیرگن. اونگه کوره، کیمهلر باسقیچمه-باسقیچ – هر کونی ۲ تهدن اوتکزیلیشی ریجهلشتیریلگن.
بوندن تشقری، ایران هرمز بوغوزی آرقهلی ترانزیت اوچون تولاو جاری ایتگنینی بیلدیرگن. تهران تولاو مقدارینی آشکار قیلمهگن، بیراق ایریم معلوماتلر گه کوره، تصدیقلنگن تشووچیلر اوچون «خوفسیزل یولَک» تشکیل ایتیب، بیر مرته اوتیشده تخمیناً ۲ میلیون امریکا دالری تولهگن. رخصتنامهلر هر بیر حالت بوییچه علیحده بیریلگن.
۳۰ مارچ کونی ایسه ایران پارلمانینینگ خوفسیزلیک بوییچه کمیسیونی بوغوزدن اوتگنلیک اوچون باج اوندیریشنی نظرده توتوچی ریجهنی معقوللـهگن. ریجه گه کوره، بوغوزدن امریکا یا کی اسرائیل گه علاقهدار کیمهلر اوته آلمهیدی.
چین و پاکستان ایران بیلن امریکانی یرهشتیریب قویماقچی
بیر آیدن کوپراقدن بیری یقین شرقده دوام ایتهیاتگن اوروشده ینه «تینچلیک ریجهسی» اورتهگه تشلندی. بیراق، بو سفر امریکادن ایمس. ۳۱ مارچ کونی چین و پاکستان ایران اوروشینی توختهتیش اوچون ۵ بنددن عبارت تینچلیک ریجهسینی تکلیف قیلدی. پاکستان تشقی ایشلر وزیری اسحاق دار و چین تشقی ایشلر وزیری وان ای اورتهسیدهگی پکن دهگی مذاکرهلردن سونگ اعلان قیلینگن اوشبو ریجه بیشته اساسی تمایلگه اساسلنهدی.
حربی حرکتلرنی تیزلیک بیلن توختهتیش.
منطقهدهگی قوراللی توقنشوولر گه درحال چیک قوییش.
تینچلیک مذاکرهلرینی باشلش.
امکان قدر تیزراق دیپلماتیک مذاکره گه اوتیش.
کوچ ایشلهتیشدن تییلیش.
فقرالیک قوریلمهلرینی حمایه قیلیش. تینچ اهالیگه همده حیاتی مهم آست قوریلمهلر گه (برق قوریلمهلری و سوونی چوچوکلشتیریش فابریکهلری) هجوملرنی توختهتیش. دینگیز یوللری خوفسیزلیگینی تأمینلش. استراتیژیک هرمز بوغوزی آرقهلی فقرالیک و تجارت کیمهلرینینگ خوفسیز و توسیقسیز اوتیشینی کفالتلش.
امریکا مذاکرهلر دوام ایتهیاتگنینی دعوا قیلهیاتگن بولسه-ده، ایران بونی رد ایتماقده. شونگه قرهمی، هر ایکی تامان ملاقات و دیپلماتیک ماجرالرنی حل قیلیشنینگ یگانه ورینتی ایکنینی بیلهدی. تامانلرنینگ فکریچه، برقرار تینچلیک بیرلشگن ملتلر تشکیلاتی نظامی و خلقارا حقوق نارمهلریگه اساسلنیشی شرط. حاضرده جنگاور حرکتلرنینگ دینگیز قتناوی گه، خصوصاً بوغوزدهگی حرکت گه سلبی تأثیری خواطرلرنی کوچهیتیرماقده.
یازووچی: ملکهبانو محمدوه
عرب الفبا گه اوگیروچی: نصرتالله احدی
