افغانستان ده بیرلشگن ملت‌لر تشکیلاتی نینگ باله‌لردن حمایت قیلووچی صندوقی (یونیسف) نماینده‌سی محمد آگ آیویا نینگ ایتیشیچه، اوشبو مملکتده یالغیز ایکی کون ایچیده ۱۷ باله جان بیرگن.
او اوتگن کونی (جمعه، ۶ جوزا)، اوز توییتری ده یازیشیچه، اوتگن هفته چهارشنبه و پنج‌شنبه کون‌لری بلخ و کابل ده اویوشتیریلگن پارتلش‌لر نتیجه‌سیده ۱۶ باله و ارزگان ده اوروش زمان‌لریدن قالگن پارتلش ماده باعث بیر باله هلاک بولگن.
بیزلرنینگ فیسبوک صحیفه‌میزگه باش اورینگ!
افغانستان ده بیرلشگن ملت‌لر تشکیلاتی نینگ باله‌لردن حمایت قیلووچی صندوق نماینده‌سی، مذکور مملکتده باله‌لر گه قرشی زوروانلیک‌لر توخته‌تیلیشینی سوره‌گن.
بلخ ولایتی نینگ مرکزی مزارشریف شهری «چهارشنبه، ۴ جوزا»، کیتمه_کیت اوچ پارتلش واقعه گواهی ایدی. اوشبو پارتلش‌لر مزارشریف شهری نینگ ۵- و ۱۰ ناحیه‌لری حدودلریده یوز بیرگن.
مذکور اوچ پارتلش نتیجه‌سیده ۹ باله هلاک و باشقه ۱۵ باله یره‌لنگنلر. بو واقعه‌لر مسئولیتینی اسلامی دولت یا داعش گروهی اوز زمه‌سیگه آلگن.
چهارشنبه کونی شام چاغی کابل شهری نینگ تورتینچی خوفسیزلیک حوزه‌سی گه قره‌شلی ترافیک تورت یولی یقینیده جایلشگن «حضرت زکریا» جامع مسجدی نشانگه آلیندی. کابل امنیه قوماندان‌لیگی نینگ سوزلاوچیسی، اوشبو پارتلش ده ۶ کیشی هلاک و باشقه ۱۸ کیشی یره‌لنگنینی بیلدیردی.
بیزلرنینگ توییترده هم تعقیب قیلینگ!
ایتیش کیره‌ک که، سونگی آی‌لرده کابل ،هرات، بلخ، قندوز و قندهار ولایت‌لری کیتمه_کیت پارتلش‌لر گه گواه بولگن. مذکور واقعه‌لرده کوپراق تینچ اهالی قربان بولگن.
بوندن آلدین افغانستان بشر حقوقی وضعیتی‌نی تیکشیریش اوچون بیرلشگن ملت‌لر تشکیلاتی نینگ مخصوص گزارش‌گری ریچارد بنت، بلخ و کابل ده اویوشتیریلگن پارتلش‌لرده نیچه تینچ اهالی جمله‌دن ۱۶ باله هلاک بولگنینی ایتگن ایدی. او اوشبو هجوم‌لر مستقل روشده تیکشیریلیشینی سوره‌گن.
