اسلام امیرلیگی مرکزی آسیا مملکتلری‌نینگ افغانستان بیلن همکارلیک و اوزارا علاقه‌لرنی کینگه‌یتیریش باره‌سیده حرکتینی خوش قرشی‌لب، کابل منطقه‌وی قوشمه لایحه‌لرنی عملگه آشیریشده همکارلیک قیلیشگه تیار ایکنینی بیلدیرگن.
اسلام امیرلیگی سوزلاوچیسی ذبیح‌الله مجاهدنینگ ایتیشیچه، افغانستان منطقه اقتصادیاتی‌نینگ اجره‌لمس بیر قسمی دیر و هیچ بیر مملکت‌نینگ اقتصادی، منطقه‌ده‌گی باشقه مملکتلرنینگ همکارلیگی و هماهنگ‌سیزلیگی بیلن رواجلنمه‌یدی. مجاهدنینگ کوپه‌یتیریشیچه، افغانستان‌ده امنیت و برقرارلیک تأمینلنگنی اوچون ییریک آست قوریلمه لایحه‌لرنی باشلش و عملگه آشیریش زمینه‌سی یره‌تیلگن. او شونده‌ی دییدی: «بوتون منطقه منفعت‌لریگه خذمت قیله‌دیگن و اقتصادی اوسیشگه حصه قوشه‌دیگن برچه منطقه‌وی لایحه‌لرنی عملگه آشیریش اوچون افغانستان بار کوچ-قوتینی سفربر ایتگن و بوندن کیین هم شونده‌ی دوام ایته‌دی. تاپی، تاپ، افغان-ترانس همده کاسا ۱۰۰۰ کبی ییریک لایحه‌لر منطقه مملکتلرینی اوزارا باغلش و منطقه‌وی اقتصادی‌یات‌نی مستحکملشگه خذمت قیلیشی ممکن.»
بو سوزلر، بیشکک شهریده افغانستان بوییچه مرکزی آسیا مملکتلری مخصوص وکیللری‌نینگ علاقه گروهی‌نینگ ایکینچی ییغیلیشی اوتکزیلگنیدن سونگ بیان قیلینگن. مذکور ییغیلیشده قرغیزستان، قزاقستان، تاجیکستان و اوزبیکستان وکیللری اقتصادی و سودا همکارلیگینی کینگه‌یتیریش، منطقه‌وی خوفسیزلیک‌نی مستحکملش همده افغانستان بیلن اوزارا علاقه‌لرنی رواجلنتیریش ضرورلیگینی تأکیدلگنلر.
باشقه تاماندن، خلق‌ارا مناسبتلر بوییچه ایریم بیلرمانلرنینگ فکریچه، افغانستان منطقه‌وی همکارلیک‌نی کینگه‌یتیریش اوچون باشقه مملکتلر ایشانچینی قازانیشی لازم. خلق‌ارا مناسبتلر بوییچه بیلرمان عبدالواحد حکیمی شونده‌ی دییدی: «افغانستان باشقه مملکتلر بیلن اوزارا همکارلیککه محتاج. همکارلیک یولی منطقه مملکتلری‌نینگ برچه خواطرلرینی اورگنیش و اولرنی برطرف ایتیشنی تقاضا ایته‌دی. شونینگدیک، افغانستان قوشنی دولتلر تامانیدن ایشانچلی همکار و مناسب شیریک صفتیده قبول قیلینیشی کیره‌ک.»
ایریم اقتصاد شناسلرنینگ فکریچه، اوشبو امکانیت‌لردن فایده‌لنیش افغانستان‌نینگ عملی تیارگرلیگی، منطقه‌وی هماهنگ‌لیک و سرمایه کیریتیش‌لرنی جلب قیلیش اوچون قوله‌ی شرط-شرایط‌لر یره‌تیشگه باغلیق.
اقتصاد شناس محمدآصف ستانکزی‌نینگ ایتیشیچه، افغانستان اوزی‌نینگ جغرافیه جایلشووینی انابت گه آلگن حالده، منطقه‌وی همکارلیک‌نی کینگه‌یتیریش و بونده‌ی لایحه‌لرنی عملگه آشیریشدن کینگ کولمده منفعت کوریش امکانیتیگه ایگه. اونگه کوره: «افغانستان اوزی‌نینگ علیحده جغرافیه جایلشووی طفیلی منطقه‌وی همکارلیک‌نی کینگه‌یتیریش و شو کبی لایحه‌لرنی عملگه آشیریشدن سیزیلری درجه‌ده منفعت کوریشی ممکن.»
شاکر یعقوبی، ینه بیر اقتصاد شناس شونده‌ی دییدی: «افغانستان ییریک منطقه‌وی لایحه‌لرده مهم رول اوینشی اوچون کتته صلاحیت گه ایگه. بیراق مسئله شونده کی، مملکت فقط ترانزیت تولاولریگه تیه‌نیب قالمسلیگی، بلکی، اوز سودا، ترانزیت و منطقه‌وی همکارلیک مرکزیگه ایلنیشی کیره‌ک.»
قرغیزستان تشقی ایشلر وزیرلیگی هم، بیشکک شهریده‌گی اوچره‌شووده اقتصادی، ترانسپورت، لوژستیک و انسان‌سیورلیک همکارلیک مسئله‌لریدن تشقری، افغانستان‌ده خوفسیزلیک و اجتماعی وضعیت همده اوشبو مملکتده‌گی اوزگریشلرنینگ مرکزی آسیاگه تأثیری محاکمه قیلینگنینی معلوم قیلگن.
