هرات ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان جنگریلری اوتگن “یکشنبه” کیچه اوشبو ولایت نینگ پشتون‌زرغون تومنیده مردمی کوچلرنینگ «سیدآباد» نام‌لی پوسته‌سی اوستیگه هجوم قیلگن‌لر.
منبع نینگ ایتیشیچه، طالبان جنگریلری بیر ساعت آتیشمه‌دن سونگ، اوشبو پوسته‌نی تصرف قیلیب و مردمی کوچلردن ۱۱ ته‌سی و هرات شهریدن مهمان صفتیده مذکور پوسته‌گه کیلگن باشقه ۷ کیشی‌نی اوققه توتگن.
منبع نینگ ایتیشیچه، هلاک ایتیلگن‌لرنینگ جسدلری اوتگن کونی ملی اردو کوچلری تامانیدن مذکور پوسته‌دن چیقاریلیب کسلخانه‌گه انتقال بیریلگن.
عین‌حالده، هرات حوزه‌یی کسلخانه‌سیدن بیر منبع نینگ ایتیشیچه، اوشبو واقعه‌ده هلاک ایتیلگن‌لرنینگ جسدلری اوتگن کونی اوشبو کسلخانه نینگ موزخانه‌سیگه انتقال بیریلگن.
هرات محلی مسوول‌لری و طالبان گروهی حاضرگه‌قدر بوتوغریده فکر بیلدیرمه‌گن.
شونینگدیک، اوتگن ۲۴ ساعت جریانیده غور ولایتیده ۴ تینچ اهالی و ۱۷ طالب هلاک ایتیلگن.
غور محلی مسوول‌لری نینگ ایتیش‌لریچه، اوشبو ولایت نینگ چهارسده تومنیده هوایی کوچلر تامانیدن اویوشتیریلگن هجوم نتیجه‌سیده، غور ولایتیده طالبان تامانیدن نام‌لنگن حاکم اورین باسری نینگ ایناغهسی شامل ۱۳ طالب هلاک ایتیلگن و شونینگدیک، فیروزکوه شهری نینگ غربی‌ده ۴ طالب هلاک ایتیلگن.
عین‌حالده، غور پولیس قومندانلیگی نینگ خوفسیزلیک آمری نیک‌محمد نیک‌زاد نینگ سلام‌وطندارگه ایتیشیچه، طالبان جنگریلری اوتگن کیچه لعل‌وسرجنگل تومنی نینگ «خم شور» منطقه‌سیده هجوم قیلگن و نتیجه ده ۱ پولیس و ۴ تینچ اهالی هلاک و باشقه ۳ کیشی یره‌لنگن.
کیم‌لیگی سیرقالیش‌نی ایسته‌گن امنیتی بیر منبع نینگ سلام‌وطندارگه ایتیشیچه، چهارسده تومنیده طالبان هجومی سبب، بیر عیال و ۴ حربی آغیر شکلده یره‌لنگن.
غور حاکمی عبدالظاهر فیض‌زاده نینگ طالبان تلفاتی‌نی تصدیق‌لب ایتیشیچه، اولر اختیاریگه قرار تاپگن معلومات‌لرگه کوره، لعل‌وسرجنگل تومنیده طالبان هجومی سبب، تینچ اهالی تلفات کورگن و امنیتی کوچلردن هم بیر ته‌سی هلاک ایتیلگن.
طالبان گروهی حاضرگه‌قدر بوتوغریده فکر بیلدیرمه‌گن.
