لوگرده ایریم عیاللر اوی‌لر و کیچیک اوستاخانه‌لرده آزیق-آوقت، کییم-کیچک تیکیش، خامک‌دوزلیک، گلدوزلیک و باشقه بعضی قول توقیمه‌لرنی تیکیش بیلن مصروف، بیراق محصولات‌لرینی ساتیش اوچون مناسب بازار یوقلیگیدن شکایت قیله‌دیلر.
اولرنینگ ایتیشیچه، محصولات‌لری‌نینگ صفتی یخشی‌لنگن و اوتمیش‌گه نسبتن کوپراق تجربه آرتیرگنلر؛ بیراق بازار یوقلیگی سببلی اوز محصولات‌لرینی مناسب نرخ‌ده ساته آلمه‌یدیلر. اوشبو عیاللر مسئوللردن محصولات‌لرینی ساتیش اوچون مخصوص بازار ایجاد ایتیش و شونینگدیک محصولاتلری اوچون بازار قیدیریشنی سوره‌یدیلر.
لوگر مرکزی پل‌علم شهری یشاوچیسی و ینه بیر تدبیرکار عیال اسمانینگ ایتیشیچه، اگر عیاللرنینگ قول توقیمه محصولاتلری اوچون مخصوص بازار، کورگزمه‌لر و ساتیش امکانیت‌لری یره‌تیلگن حالده، بیر تاماندن محصولاتلری مقداری کوپیه‌دی و باشقه تاماندن عایله‌لر اقتصادینی تأمینلش اوچون کوپراق حصه قوشه‌دیلر.
اونینگ ایتیشیچه، لوگر مرکزی پل‌علم شهری و تومنلریده اوتمیش‌گه نسبتن اینیقسه اوقیمیشلی عیاللرنینگ قول توقیمه همده اوی محصولاتلری بولیمیده‌گی حصه‌سی آرتگن و اولر اوشبو یول آرقه‌لی یخشی درآمد قولگه کیریته‌دیلر.
اقتصادشناس و قول صناعتی بولیمیده اوقیتووچی حمیرا نینگ ایتیشیچه، ایچکی تولیدلرنی رواجلنتیریش اوچون فقط مهارت اورگه‌تیش ییترلی ایمس، بلکیم محصولات‌لر اوچون بازار تاپیش، مناسب شکلده قداقلش و بازار قیدیریش هم جوده اونیملی دیر.
افغان عیالری‌نینگ قول صناعتی محصولاتلری مملکت ایچیده و چیت‌ایللرده یخشی شهرتگه ایگه دیر و مسئول اداره‌لر، عیاللر اقتصاد نقطه‌ی-نظردن اوز ایاقلریگه توخته‌ش اوچون بو محصولات‌لرگه مناسب بازار تاپیشلری کیره‌ک دییدی، حمیرا.
شو بیلن بیرگه، لوگر ولایتی صناعت و سودا ریاستی‌نینگ باشلیغی عمر منصور، تدبیرکار عیاللرنی قوللب-قوتلش و اولرنینگ محصولاتلری اوچون بازار تاپیش مقصدیده سعی-حرکت قیلینه‌یاتگنینی بیلدیرگن. منصورنینگ کوپه‌یتیریشیچه، جاری ییلده ایچکی و خلق‌ارا اداره‌لر همکارلیگیده سوداگر و تدبیرکار عیاللرنینگ محصولاتلریگه بازار تاپیش اوچون تورلی بولیم‌لرده تعلیمی برنامه‌لر اوتکزگنلر.
لوگر ولایتیده‌گی تدبیرکار عیاللر اوز فعالیتلری کینگه‌یشیگه امید بیلدیریب، حمایت بولیب و محصولاتلری اوچون بازار تاپیلگن حالده، محصولات‌لرینی باشقه ولایت‌لر و چیت‌ایل مملکتلریگه صادر قیلیش‌لرینی معلوم قیلیشه‌دی.
