بدخشان، هرات و فاریاب ولایت‌لری نینگ محلی و امنیتی رسمی‌لری نینگ ایتیش‌لریچه، مذکور ولایت‌لرده طالبان هجومی سبب، امنیتی کوچلردن ۱۱ ته‌سی هلاک و تینچ اهالی شامل باشقه ۱۹ کیشی یره‌لنگن.
بدخشان ولایتیدن بیرقطار منبع‌لرنینگ ایتیش‌لریچه، اوشبو ولایت نینگ زیباک تومنیده طالبان تامانیدن اویوشتیریلگن هجوم نتیجه‌سیده، امنیتی کوچلردن ۸ ته‌سی هلاک و باشقه ۲ ته‌سی یره‌لنگن.
مردمی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، طالبان جنگریلری اوتگن کیچه ساعت ۳ ده زیباک تومنی نینگ «سرشخ» منطقه‌سیده جایلشگن امنیتی بیر پوسته اوستیگه هجوم قیلگن و نتیجه‌ده امنیتی کوچلردن ۸ ته‌سی هلاک و باشقه ۲ ته‌سی یره‌لنگن.
منبع گه کوره، طالبان جنگریلری مذکور پوسته‌نی اوت بیریب و امنیتی کوچلر بوتون حربی تجهیزات‌لرینی اوزلری بیلن آلیب کیتگن.
شونینگدیک، زیباک ساغلیک مرکزیدن بیر منبع نینگ ایتیشیچه، امنیتی کوچلردن ۸ ته‌سی نینگ جسد و ایکی یره‌لنگن کیشی اوشبو مرکزگه انتقال بیریلگن.
زیباک تومنی ولسوالی عبدالخلیل عاطف، طالبان هجومی‌نی تصدیق‌لگن، لیکن تلفات خصوصیده معلومات بیرمه‌گن.
عین‌حالده، بدخشان پولیس قومندانلیگی نینگ مطبوعاتی مسوولی ثناالله روحانی نینگ بو خبرنی تصدیق‌لب ایتیشیچه، امنیتی کوچلر و طالبان آره‌سیده یوز بیرگن آتیشمه‌ده طالبان گروهی‌گه هم تلفات ییتیشگن.
عین‌حالده، طالبان گروهی هرات ولایتی نینگ غوریان تومنیده مردمی کوچلر و پولیس قومندانلیگی اوستیگه پارتلش ماده جایلشتیریلگن موتر آرقه‌لی، هجوم قیلگن.
هرات ولایت مقامی نینگ بیر خبرنامه آرقه‌لی ایتیشیچه، اوشبو هجوم نتیجه‌سیده مردمی کوچلردن ۲ ته‌سی هلاک و امنیتی کوچلردن ۳ ته‌سی شامل ۱۵ کیشی یره‌لنگن.
خبرنامه‌ده ایتیلیشیچه، پارتلش ماده یوکلنگن موتر نینگ پارتلگنیدن سونگ، امنیتی کوچلر و طالبان جنگریلری آره‌سیده آتیشمه یوز بیرگن و نتیجه ده ۱۵ طالب هلاک و یره‌لنگن.
شونینگدیک، فاریاب پولیس قومندانلیگی ریزرف کندکی نینگ بیرینچی تولی قومندانی منصور عزیزی نینگ سلام‌وطندارگه ایتیشیچه، طالبان جنگریلری اوتگن کیچه خواجه‌سبز پوش تومنی نینگ بادغیسی قیشلاغیده اوشبو تولی پوسته‌سی اوستیگه هجوم قیلگن و مذکور هجوم ده پولیس کوچلریدن بیر ته‌سی هلاک و باشقه ۲ ته‌سی یره‌لنگن.
طالبان گروهی حاضرگه‌قدر مذکور هجوم‌لر خصوصیده صحبت قیلمه‌گن.
