طالبان گروهی نینگ اعلام قیلیشیچه، تینچ‌اهالی نینگ اولدیریلیشی، ریجه‌لنگن قتل‌لر و بنالرنی بوزیش گه قوللری یوق و بو طالبان گروهی نینگ ایشی ایمس دیر.
مذکور گروه بوگون (دوشنبه ۱۳- دلو) بیر اعلامیه ترقه‌تیب اروپا بیرلیگی، افغانستان بوییچه ناتو ملکی نماینده‌لیگی و افغانستان ده اروپالیک و آمریکالیک مملکتلر نمایندهلیکلری نینگ قطاری آرقه‌لی ترقه‌تیلگن قوشمه اعلامیه گه عکس‌العمل کورسه‌تیب ایتیشیچه، آمریکالیک و اروپالیک مملکتلرنینگ نماینده‌لیک‌لریدن قطاری طالبان گروهی گه ناتوغری عیبلاولر وارد قیلیب اوروش دوامی، تینچ اهالی اولدیریلیشی، ریجه‌لنگن قتل‌لر و عامه تأسیسات‌لر بوزیلیشی نی بو گروه گه نسبت بیرگن.
طالبان نینگ اعلامیه‌سیده کیلیشیچه، مذکور ادعالر توغری ایمس و بو گروه عامه سرمایه‌لرینی سقله‌ش و قیته قوریش گه اوزلرینی مسئول بیله‌دی.
اوتگن کون (یک‌شنبه ۱۲- دلو) کابل بوییچه مذکور دیپلوماتیک نماینده‌لیکلر قوشمه بیر اعلامیه آرقه‌لی، ترورلر، آدم اوغیرلاوچیلیکلر و عامه بنالر تخریب ایتیلیشی نینگ دوام تاپیشی نی قاره‌له‌دی.
مذکور اعلامیه، اروپا بیرلیگی نینگ هیأتی، افغانستان بوییچه ناتو ملکی نماینده‌لیگی و چک، دانمارک، فنلند، فرانسه، آلمان، ایتالیا، اسپانیا، هالند، سویدن، آسترالیا، کانادا، بریتانیا مملکت‌لری نینگ سیاسی نمایندهلیکلری و شونینگدیک کابل ده آمریکا نماینده‌لیگی تامانیدن قوشمه شکلده صادر بولگن.
مذکور اعلامیه‌ده کیلیشیچه، طالبان گروهی نینگ زوروانلیک‌لری ترورچیلر و جنایتچیلر نینگ تینچ و ایرکین شکلده فعالیت قیلیشی گه یاردم بیرده‌دی.
اوشبو اعلامیه‌ده، طالبان گروهیدن زوروانلیکلر و بنالرنینگ بوزیش‌لری توخته‌تیلیشی سوره‌لگن و شونینگدیک افغانستان حکومتیدن بو هجوملر توغریسیده تنیق تیکشیروو اوتکزیشی سوره‌لگن.
بو اعلامیه‌ده کیلیشیچه، دنیا جماعه‌چیلیگی افغانستان ده انرژی، آذیق-آوقت تأمین‌لنیشی، سوو قیناقلری و اساسی بنالر اوستیگه کوپ سرمایه یاتقیزگن کیم طالبان گروهی یوللرنی بوزیش، مخابراتی ترماقلر و برق پایه‌لری نینگ پارتله‌تیش بیلن دنیا غضب‌لنتیره‌دی.
بیراق طالبان نینگ ایتیشیچه، اولرنینگ پالیسی‌سی سوزلشوو یولیدن قیینچلیک‌لرنی حل قیلیش دیر. مذکور گروه اروپا بیرلیگی و باشقه قطار مملکتلرنینگ افغانستان اوروشی گه دخیل بیلیب و ایتیش‌لریچه، مذکور مملکتلر افغانستان ده آمریکالیک حربیلرنینگ حضوری نی تمدید قیلیش بیلن، اوروش دوام تاپیشی نی ایسته‌یدی.
اوتگن کون رویترز خبرگزارلیگی ناتو نینگ ۴ رسمی‌سیدن نقل قیلیب خبر بیریشیچه، چیت‌ایللیک کوچلر طالبان و آمریکا آره‌سیده امضالنگن کیلیشوونامه گه تعیین‌لنگن زماندن کوپراق افغانستان ده قالیش‌لری ممکن.
بیراق ناتو سوزلاوچیسی اوانا لونگیسکو نینگ ایتیشیچه، «حاضرگچه بو توغریده هیچ قنده‌ی قرار آلینمه‌گن. ناتو نینگ هیچ بیر اعضاسی کیره‌ک بولمه‌گن زمان دن آرتیق افغانستان ده قالیش نی ایستمه‌یدی، بیراق بیزلر آچیق شکلده ایتگن‌میز کیم حضوری‌میز شرط‌لرگه باغلیق دیر. بیرلشیک‌لریمیز بوتون وضعیت نی تیکشیره‌دی و کیله‌جک یوللر خصوصیده بحث قیله‌دی.»
مذکور کیلیشوونامه اساسیده، چیت‌ایللیک کوچلر جاری میلادی ییل نینگ بیرینچی می آیی گچه افغانستان نی ترک قیلیش‌لریگه قرار قیلینگن ایدی و اونینگ بدلی ده طالبان آمریکالیک کوچلرگه هجوم قیلمه‌سلیک و القاعده گروهی بیلن علاقه‌لری نینگ کیسیش خصوصیده سوز بیرگن ایدی.
بیراق طالبان بوگون ترقتگن اعلامیه‌لریده مذکور وعده‌لر نقض ایتیلیشی نینگ عاقبتی خصوصیده آگاه‌لنتیریب و دوحه کیلیشوونامه‌سی نینگ عملی ایتیلیشی اوستیگه اورغولب ایتیش‌لریچه، بو کیلیشوونامه نینگ عملی ایتیلیشی آمریکا و افغانستان و شونینگدیک باشقه مملکتلرنینگ فایده‌سیگه دیر.
طالبلرنینگ ایتیش‌لریچه، بو گروه تینچلیک و سوزلشوو اوستیگه اورغوله‌گنی اولرنینگ کوچ‌سیزلیگی نی کورستمه‌یدی و بیرار کیشی دوحه کیلیشوونامه‌سینی نظر گه آلمه‌ی و اوروش دوامی اوچون بهانه قیلگن بیرحالده، افغانستان اهالیسی ارزش‌لری، توپراق، مملکت و حق‌لریدن مدافعه قیله‌دی.
بونده‌ی بیاناتلر ارایه ایتیلگن بیرحالده، بیر آیدن بویان افغانستان و طالبان گروهی نینگ هیأت‌لری آره‌سیده تینچلیک سوزلشوولری نینگ ایکینچی دوری باشلنگن. بیراق دولت مذاکره قیلووچی هیأتی نینگ ایتیشیچه، حاضرگچه یالغیز ایکی دستلبکی ییغین اوتکزگنلر و طالبان رسمی بیر ییغین اوتکزیش گه حاضر بولمه‌ی و مذاکره میزی نی قوییب یوبارگن.
ایتیلیشیچه، طالبان گروهی تینچلیک سوزلشوولری نینگ قیته باشله‌نیشی گه افغانستان تینچلیگی خصوصیده آمریکا ینگی دولتی نینگ قراری نی کوتیب تورگن.
