اسلام همکارلیک تشکیلاتی اورین باسری و اوشبو تشکیلات‌نینگ باش کاتبی و افغانستان اوچون مخصوص وکیلی طارق‌علی بخیت، کابل گه قیلگن سفری دایره‌سیده اسلام امیرلیگی باش وزیری‌نینگ اداری اورین باسری مولوی عبدالسلام حنفی و تشقی ایشلر وزیری امیرخان متقی بیلن اوچره‌شگن.
تشقی ایشلر وزیرلیگی ییتکرمه‌لر اداره باشلیغی ضیااحمد تکل گه کوره، متقی و بخیت اسلام امیرلیگی و اسلام همکارلیک تشکیلاتی اورته‌سیده‌گی همکارلیک‌لر مستحکملنیشی و ایکی تامان اورته‌سیده ینگی فرصت‌لر یره‌تیلیشی مسئله‌لری حقیده بحث ایتگنلر.
تکل شونده‌ی دییدی: «متقی جنابلری اسلام همکارلیک تشکیلاتی ینگی کاتبی تعییلنگنینی قوتلوغ بولسین دییدی و افغانستان بیلن اوشبو تشکیلات‌نینگ اوز ارا همکارلیک مسئله‌لری حقیده بحث ایتدی.»
شو بیلن بیرگه، اسلام امیرلیگی باش وزیری‌نینگ اداری اورین باسری عبدالسلام حنفی اسلام همکارلیک تشکیلاتی اورین باسری و ینگی کاتبی و افغانستان اوچون مخصوص وکیلی بیلن اوچره‌شووده، افغانستان‌ده طبیات، تعلیم، اولکه گه قیتیب کیلگنلر اوچون باش‌پنه قوریش و باشقه ساحه‌لرده اوز ارا همکارلیکنی کینگه‌یتیریشنی سوره‌گن.
اسلام امیرلیگی سوزلاوچیسی‌نینگ اورین باسری حمدالله فطرت شونده‌ی دییدی: «دکتر بخیت افغانستان‌ده آلیب باریلگن فعالیت‌لر و ترقیاتی حرکتلرگه توخته‌لیب، مملکتده اسلام همکارلیک تشکیلاتی تامانیدن ایریم لایحه‌لر عملگه آشیریلیشیدن ایشانچ بیلدیرگن.»
افغانستان هم اعضا بولگن ۵۷ دولت‌نی بیرلشتیروچی اسلام همکارلیک تشکیلاتی، سیاسی ساحه‌ده، انسان‌پرورلیک یاردم کورسه‌تیش، مدنی و اقتصادی مسئله‌لرده اسلام مملکتلری اورته‌سیده‌گی همکارلیک‌نینگ مهم کاناللریدن بیری حسابلنه‌دی.
برچه‌سی بیلن، ایریم سیاسی بیلرمانلر، اسلام امیرلیگی و اسلام همکارلیک تشکیلاتی اورته‌سیده‌گی همکارلیک‌نینگ کینگه‌یشی افغانستان‌نینگ اسلام مملکتلری بیلن علاقه‌لرینی مستحکملشگه خذمت قیلیشی ممکن‌لیگینی ایتگن.
سیاسی بیلرمان عبدالجبار اکبری‌نینگ ایتیشیچه، اسلام امیرلیگی مملکتلر بیلن همکارلیگینی کینگه‌یتیریش اوچون اسلام همکارلیک تشکیلاتی بیلن علاقه‌سیدن فایده‌لنیشی ممکن. اونینگ کوپه‌یتیریشیچه: «بو کبی اوچره‌شوولر حاضرگی وضعیت‌نی یخشی‌لشگه یاردم بیریشی ممکن. بیراق اکثریت اسلام مملکتلری مستقل قرار قبول قیله آلمه‌یدی و ییتکچی دولتلر گه قره‌م. اسلام مملکتلری بیرلشیب، اوز آوازلرینی بلند کوتریش‌لری، اسلام امیرلیگینی تن آلیشلری، شونینگدیک بیرلشگن ملتلر تشکیلاتیده اسلام همکارلیگی وکیلی‌نینگ تعیینلنیشینی قوللب-قوتلشلری کیره‌ک.»
ینه بیر سیاسی بیلرمان عبدالصادق حمیدزوی، تشقی تشکیلات‌لر تامانیدن افغانستان‌نینگ حقیقی قیافه‌سینی نمایان ایتیش مهم‌لیگینی تأکیدلب شونده‌ی دییدی: «دیپلماتیک طلبلر یا کی منطقه‌وی مسئله‌لر بوییچه رسمی یا کی نارسمی تشکیلات‌لر افغانستان‌نی حقیقت گه اساسلنگن حالده تنیشتیریشی کیره‌ک. بو تصویر افغانستان‌نینگ سیاستی و باشقه مملکتلر بیلن مناسبت‌لریگه بیواسطه تأثیر کورسته‌دی.»
اسلام همکارلیک تشکیلاتی رهبری‌نینگ اورین باسری و باش کاتبی و افغانستان اوچون مخصوص وکیلی، اسلام امیرلیگی حاکمیت گه ییتگنیدن سونگ بیر نیچه بار افغانستان گه تشریف بویریب، ایکی تامانلمه علاقه‌لرنی کینگه‌یتیریش کبی تورلی مسئله‌لر یوزه‌سیدن اسلام امیرلیگی بیلن مذاکره‌لر آلیب بارگن.
