اروپا بیرلیگی، افغانستان بوییچه ناتو ملکی نماینده‌لیگی و افغانستان ده اروپالیک و آمریکالیک مملکتلر نماینده‌لیک‌لریدن قطاری نینگ ایتیش‌لریچه، ریجه‌لنگن زوروانلیکلرنینگ کویپنچه‌سیگه طالبان مسئول دیر.
بوگون (یکشنبه ۱۲- دلو) کابل بوییچه مذکور دیپلوماتیک نماینده‌لیکلر قوشمه بیر اعلامیه آرقه‌لی، ترورلر، آدم اوغیرلاوچیلیکلر و عامه بنالر تخریب ایتیلیشی نینگ دوام تاپیشی نی قاره‌لب ایتیش‌لریچه، مذکور زوروانلیکلر مدنی، قضایی، رسانه‌یی، مذهبی، طبی جماعه و شونینگدیک دولت نینگ ملکی نماینده‌لرینی نشان گه آله‌دی.
مذکور اعلامیه، اروپا بیرلیگی نینگ هیأتی، افغانستان بوییچه ناتو ملکی نماینده‌لیگی و چک، دانمارک، فنلند، فرانسه، آلمان، ایتالیا، اسپانیا، هالند، سویدن، آسترالیا، کانادا، بریتانیا مملکت‌لری نینگ سیاسی نماینده‌لیکلری و شونینگدیک کابل ده آمریکا نماینده‌لیگی تامانیدن قوشمه شکلده صادر بولگن.
مذکور اعلامیه‌ده کیلیشیچه، طالبان گروهی نینگ زوروانلیک‌لری ترورچیلر و جنایتچیلر نینگ تینچ و ایرکین شکلده فعالیت قیلیشی گه یاردم بیرده‌دی.
اوشبو اعلامیه‌ده، طالبان گروهیدن زوروانلیکلر و بنالرنینگ بوزیش‌لری توخته‌تیلیشی سوره‌لگن و شونینگدیک افغانستان حکومتیدن بو هجوملر توغریسیده تنیق تیکشیروو اوتکزیشی سوره‌لگن.
بو اعلامیه‌ده کیلیشیچه، دنیا جماعه‌چیلیگی افغانستان ده انرژی، آذیق-آوقت تأمین‌لنیشی، سوو قیناقلری و اساسی بنالر اوستیگه کوپ سرمایه یاتقیزگن کیم طالبان گروهی یوللرنی بوزیش، مخابراتی ترماقلر و برق پایه‌لری نینگ پارتله‌تیش بیلن دنیا غضب‌لنتیره‌دی.
مذکور مملکتلر و تشکیلات‌لرنینگ ایتیش‌لریچه، افغانستان ده تینچلیک تأمین‌لنیشی اوچون زوروانلیکلر توخته‌تیلیشی کیره‌ک.
سونگی آیلرده کابل و قطار ولایت‌لرده ریجه‌لنگن ترولر و یاپیشقاق ماین پارتلش حادثه‌لری کوپه‌یگن. امنیتی مسئوللر بو حادثه‌لر خصوصیده طالبان گروهی نینگ مسئول بیله‌دی، بیراق طالبان مذکور حادثه‌لرگه قوللری بارلیگی نی رد قیلیشگن.
