جمهورلیک ریاستی، آمریکا تشقی ایشلری وزیری مایک پمپیو نینگ اوتگن بیر ییلده هیچبیر آمریکالیک حربی افغانستان ده هلاک بولگنی یوق و طالبان گروهی حاضر افغانستان خلقی و حکومتی برابریده اوریشهدی و خلق نینگ تلفاتی جوده کوپ، دیگن سوزلری برابریده عکسالعمل کورستگن.
جمهو رئیس سوزلاوچیسی نینگ اورین باسری دواخان مینهپال بوگون (یکشنبه، ۱۴- جدی) بیر ویدیو رسانهلرگه یوباریب، اوروش یالغیز افغان امنیتی کوچلر تامانیدن مدیریت و رهبرلیک بولیشی باعث چیت ایللیک کوچلر تلفات رقمی صفر بولگنیدن خبر بیرگن.
آمریکا تشقی ایشلر وزیری مایک پمپیو، اوتگن کونی شام چاغی توییتر صحیفهسیدن بیر پیام ترقهتیب، اوتگن بیر ییل جریانیده هیچ بیر آمریکالیک حربی افغانستان ده هلاک بولمهگنینی بیلدیرگن ایدی.
پمپیو اوز سوزلری دوامیده: “آمریکا نینگ افغانستان دهگی مأموریتی القاعده شبکهسی نی و آمریکا اوچون بولگن تهدیدلرنی اورته دن آلیب کیتیش دیر و اوشبو مأموریت اوچون آمریکا نینگ افغانستان ده یوزلرچه حربی سی نینگ حضوریگه احتیاج یوق، چونکه آمریکا نینگ باتور افغان اورتاقلر بار”
ایتیشلریچه جناب پمپیو نینگ اشارهسی، آمریکا بیلن طالبان گروهی نینگ آرهسیده امضالنگن کیلیشونامه بولگن. آمریکا بیلن طالبان گروهی نینگ آرهسیده تینچلیک مذاکرهسی حوت آیی نینگ ۱۰- کونی قطر اولکهسی نینگ دوحه شهریده امضالندی و اوشبو کیلیشونامهده طالبان گروهی، آمریکالیک حربیلر گه هجوم قیلیش دن قول تارتیشده سوز بیرگن.
عینحالده مایک پمپیو، افغانستان خلقی نینگ تلفاتی نی نظر گه آلمسدن، دوحهده اوتکزیلگن مذاکره نی یوتوقلی عنوان قیلگن.
آمریکا بیلن طالبان گروهی آرهسیده کیلیشونامه امضالنیب و افغانستانلیک ارا تینچلیک مذاکرهسی قطر اولکهسی نینگ باشکینتی دوحه شهریده باشلنگنیدن کیین، افغانستان ده زوروانلیکلر رقمی آرتیب و اوتگن ایکی آی جریانیده اونلرچه خبرچی، مدنی فعال و انسان حقلری فعالی پارتلش، مقناطیسی ماینلر و هدفلی ترورلر قربانی بولیب کیلهدیگن بیر حالده، آمریکا تشقی ایشلر وزیری اوشبو سوزلرنی بیان ایتگن.