یوزلب مملکت اهالیسی بوگون کابل شهری‌ده، آمریکا جمهور باشلیغی جوبایدن نینگ افغانستان مرکزی بانکی دارایی‌لری بیر قسمینی مصادره قیلیشی گه دایر سونگی قراری گه عکس‌العمل کورسه‌تیب ناراضی‌لیک نمایش بیلدیردیلر. اولر نینگ ایتیشلریچه، ۱۱سپتامبر هجوم‌لری افغانستان خلقی گه هیچ قنده‌ی مناسبتی یوق دیر.
اعتراضچیلر بایدن دولتی‌دن، افغانستان نینگ برچه سرمایه‌لرینی بوتونلی و قید سیز شکلده آزاد ایتیشینی طلب قیله‌دیلر. اولر نینگ کوپیتیریشیچه، ۱۱سپتامبر هجوم‌لری افغانستان خلقی گه هیچ قنده‌ی تیگیشلیگی یوق، شونی اوچون مملکت دارایی‌لری مذکور واقعه قربانی‌لری نینگ عایله اعضالری گه بیریلمسلیگی کیره‌ک.
شونینگدیک اعتراضچیلر، افغانستان اوروش قربانی‌لری گه آمریکا تامانیدن تاوان توللنیشینی طلب قیلدیلر. نمایشچیلر شعارلریدن بیری‌ده یازیشیچه: «جوبایدن! افغانستان خلقی بیلن دشمن‌لیککه چیک قوی.» اولر باشقه شعارلریدن بیری‌ده یازیشیچه: «آمریکا متحدلری بیلن، مینگلب قتل ایتیلگن افغان و افغانستان نینگ بوزیلیش تاوانینی توللشی کیره‌ک.»
بیزلرنینگ فیسبوک صحیفه‌میزگه باش اورینگ!
عین‌حالده آمریکا جمهور باشلیغی نیچه کون آلدین افغانسان مرکزی بانکی ذخیره‌لریدن ۷ میلیارد دالری اوشبو مملکت‌ده سقلنر ایدی، اسلامی امارت حاکمیت‌گه ایریشیدن کین توسیلدی، ۳.۵ میلیاردی ۱۱سپتامبر قربانی‌لری نینگ عایله‌لری گه تاوان اوله‌راق توللش اوچون اجره‌تدی. شونینگدیک بایدن نینگ اوشبو فرمانی اساسیده مرکزی بانک نینگ یریم سرمایه‌سی افغانستان خلقی گه یاردم عنوانیده امانی صندوقی گه انتقال بیریله‌دی.
کابل گه علاوه، ننگرهار، کنر، قندوز، لوگر و میدان‌وردک ولایت‌لری نینگ یشاوچیلری، بایدن اوشبو فرمانی گه قرشی ناراضی‌لیک نمایش بیلدیرگن‌لر.
جوبایدن نینگ بو قراری ایچکی و خلق‌ارا عکسالعمللر گه روپه‌رو بولگن. افغانستان اسلامی امارت اعلامیه آرقه‌لی، آمریکا قوشمه ایالت‌لری جمهور باشلیغی جوبایدن نینگ افغانستان مرکزی بانکی سرمایهلریدن بیر قسمینی مصادره قیلیشی گه عاید فرمانی گه مناسبت بیلدیریب و اونی تحریک قیلووچی دیب و بو توغریده واشنگتن گه هشدار بیرگن.
اسلامی امارت اعلامیه‌سیده کیلیشیچه، آمریکا بو قراری‌دن قیتیب و بو کبی تحریک قیلووچی ایشی‌گه دوام بیرگن تقدیرده، اسلامی امارت اوشبو مملکت باره سیده سیاستینی اوزگرتیریشی ممکن.
اسلامی امارت نینگ اعلامیه سیده کیلیشیچه، بایدن دولتی دستلب افغانستان سرمایه‌سینی خلق‌ارا قاعده‌لر گه قرشی موزله‌تدی و حاضر اوز باشیمچه‌لیگی بیلن مصادره قیلماقده. اسلامی امارت افغانستان دارایی‌لری مصادره ایتیلیشینی افغانستان خلقی نینگ حقوقی گه «آچیق باسقین» عنوان قیلگن.
اسلامی امارت اعلامیه‌سیده تاکیدلنیشیچه، ۱۱سپتامبر هجوم‌لری افغانستان خلقی گه هیچ قنده‌ی مناسبتی یوق و «افغانستان خلقی نینگ سرمایه‌سینی مصادره قیلیش آچیق باسقینچیلیک و ظلم دیر.»
مملکت سابق جمهور باشلیغی حامد کرزی ایکی کون آلدین آمریکا قوشمه ایالت‌لری جمهور باشلیغی جوبایدن نینگ افغانستان دارایی‌لری‌دن بیر قسمی ۱۱سپتامبر هجومی واقعه‌لری قربانی‌لری نینگ عایله‌لری گه اجره‌تیلیش قراری‌دن تنقید قیلیب ایتیشیچه، آمریکا بو قراری‌نی قیته تیکله‌شی کیره‌ک. او نینگ تاکیدلشیچه، افغانستان نینگ موزله‌تیلگن پول‌لری اسلامی امارت حکومتی‌دن ایمس بلکه؛ افغانستان فقرالری گه تیگیشلی دیر.
بیزلرنینگ توییترده هم تعقیب قیلینگ!
چین تشقی ایشلر وزیرلیگی هم جوبایدن نینگ افغانستان مرکزی بانکی سرمایهلریدن بیر قسمی ۱۱سپتامبر قربانی‌لری نینگ عایله‌لری گه تاوان اوله‌راق توللنیش قراری گه مناسبت بیلدیریب ایتیشیچه، دنیا نینگ اینگ بای-به‌دولت مملکتی، اینگ نادار مملکت سرمایه‌سینی اوغیرله‌یدی.
عین‌حالده، پاکستان تشقی ایشلر وزیرلیگی هم اعلامیه ترقه‌تیب بایدن نینگ اوشبو قراری‌دن تنقید قیلیب ایتیشیچه، بو پول افغانستان فقرالری گه تیگشلی دیر و اولر پول‌نی قنده‌ی مصرف قیلیشی باره سیده قرار آلیش لری کیره‌ک. مذکور وزیرلیک آمریکا‌دن افغانستان فقرالری نینگ بشری و اقتصادی احتیاج‌لری حلی مقصدیده، برچه پول‌لرنی آزاد ایتیشینی طلب قیلگن.
