مملکت سابق جمهور باشلیغی حامد کرزی، آمریکا قوشمه ایالت‌لری جمهور باشلیغی جوبایدن نینگ افغانستان دارایی‌لری‌دن بیر قسمی ۱۱سپتامبر هجومی واقعه‌لری قربانی‌لری نینگ عایله‌لری گه اجره‌تیلیش قراری‌دن تنقید قیلیب ایتیشیچه، آمریکا بو قراری‌نی قیته تیکلشی کیره‌ک.
مملکت سابق جمهور باشلیغی، بوگون (یکشنبه، ۲۴ دلو) مطبوعاتی ییغینده ایتیشیچه، افغانستان نینگ توسیلگن پول‌لری، اسلامی امارت حکومتی‌دن ایمس، بلکه افغانستان خلقی گه تیگیشلی دیر.
بیزلرنینگ فیسبوک صحیفه‌میزگه باش اورینگ!
کرزی نینگ اورغولشیچه، اوشبو پول‌لردن ۱۱ سپتامبر قربانی‌لری نینگ عایله اعضالری گه اجره‌تیلمسلیک لازم، بلکه افغانستان نینگ بوتون دارایی‌لری بو مملکت فقرالری گه قیتیریلیشی کیره‌ک.
جناب کرزی نینگ کوپیتیریشیچه، اسامه بن لادن، ۱۱ سپتامبر واقعه اصلی عاملی اوله‌راق پاکستان‌ده اولدیریلدی و او نینگ فعالیت لری تاوانینی افغانستان خلقی توللمسلیکی لازم. او نینگ ایتیشیچه، افغانستان فقرالری تروریزم کتته قربانی‌لری دیر.
مملکت سابق جمهور رئیسی نینگ تاکیدلشیچه، اوشبو پول، مصرف اوچون ایمس، بلکه افغانستان یشاوچیلری نینگ ذخیره‌سی و بو مملکت نینگ کیله‌سی نسل‌لری گه تیگیشلی دیر، سقله‌نیشی لازم.
آمریکا جمهور باشلیغی جو بایدن، افغانستان نینگ توسیلگن ۷ میلیارد دالری آزاد ایتیلیش فرمانینی ایکی کون آلدین امضاله‌دی. اوشبو فرمان اساسیده، ۳.۵ میلیارد دالر افغانستانده‌گی بشری بحران و انسان پرورلیک یاردم‌لر و ۳.۵ میلیارد دالری ۱۱ سپتامبر واقعه‌سی قربانی‌لری نینگ عایله اعضالری گه تاوان توللش اوله‌راق نظرگه آلینگن.
بیزلرنینگ توییترده هم تعقیب قیلینگ!
آمریکا جمهور باشلیغی نینگ بو قراری، ملی و خلق‌ارا عکس‌العمل‌لر گه روپه‌رو بولگن. پاکستان تشقی ایشلر وزیرلیگی اعلامیه آرقه‌لی جوبایدن نینگ بو قراری‌دن تنقید قیلیب ایتیشیچه، بو پول افغانستان فقرالری گه تیگیشلی دیر و اولر اوشبو پول حقیده قرار آلیش‌لری کیره‌ک. مذکور وزیرلیک آمریکادن افغانستانده‌گی بشری احتیاج‌لر و اقتصادی معمالر حلی اوچون برچه پول‌لرنی آزاد ایتیشینی طلب قیلگن.
بوندن آلدین، بشر حقوقی کوزه‌تیش تشکیلاتی هم بو قرار عملی آشیریلیشی‌نی افغانستان اوچون معمالی دیگن ایدی.
مذکور نهاد نینگ تاکیدلشیچه، موزله‌تیلگن پول‌لر افغان‌لر گه تیگیشلی و افغانستان خلقی اوچون اجره‌تیلیشی کیره‌ک.
