عایله، اقتصادی احوال، امکانیتلردن فایدهلنیش، یاش و عیاللر همده قیزلرنینگ خبردارلیک درجهسی – بولرنینگ برچهسی اولرنینگ کیلهجککه بولگن قرهشلرینی شکللنتیریشده مهم رول اوینهیدی.
سلاموطندار، تورلی ولایتلرده ۱۷ یاشدن ۳۵ یاشگچه بولگن ۲۵ نفر عیال و قیز بیلن صحبت قیلگن. عایله، اولرنینگ ایریملری اوچون کیلهجککه بولگن اینگ مهم تیهنچ، قوللب-قوتلش و امید منبعی گه ایلنگنی انیقلنگن.
اوشبو عیاللرنینگ ۱۸ نفری عایله قوللب-قوتلشینی اوز کیلهجگینی قوریش و مقصدلریگه ایریشیش دهگی مهم عامللردن بیری دیب حسابلهیدی. اولرنینگ ایتیشیچه، عایلهنینگ قوللب-قوتلشی اولر گه قیین شرایطلرده هم تعلیم آلیش یا کی اقتصادی فعالیت بیلن شغللنیشنینگ باشقه یوللرینی تاپیشگه یاردم بیرهدی.
شو اورینده، کابلدن بولگن ۲۱ یاشلی و ۱۲-صنفنی تماملهگن زینب، عایلهسینینگ امیدی و قوللب-قوتلشی اونگه اوز تجارتینی یولگه قوییشگه یاردم بیرگنینی ایتهدی. او شوندهی دییدی: «اوزیم مستقل ایش یولینی یرهتیشگه حرکت قیلدیم. حیاتیمده تورلی سببلر گه کوره، اوقیشدن آرتده قالدیم، اما عایلهم هیچ قچان بو حالت کیلهجک اوچون حرکت قیلیشدن واز کیچیشیمگه سبب بولیشیگه یول قویمهدی. عکسینچه، اولر دایما مینی قوللب-قوتلب، اوز تجارتیمنی باشلشگه ترغیب قیلیشدی.»
کابلدن بولگن ۲۳ یاشلی ساغر هم شونگه اوخشش تجربه گه ایگه. اونینگ تعلیمی یریم قالگن. او عایلهسینینگ قوللب-قوتلشی اونگه تعلیمینی دوام ایتتیریش و کیینچهلیک تجارت باشلشی اوچون شرایط یرهتگنینی ایتهدی. او شوندهی دییدی: «مکتبلر و بیلیم یورتلر یاپیلگنده عایلهم مینی جوده قوللب-قوتلهدی. خصوصی کورسلرده اوقیشنی دوام ایتتیره آلدیم، کیین ایسه اویده تجارت باشلهدیم. حاضر بندمن و بولرنینگ برچهسی عایلهم طفیلی.»
شخصی حرکت؛ موفقیت گه ایریشیشنینگ ینه بیر یولی
اوشبو گزارشده صحبت قیلگن عیاللر و قیزلر عایله قوللب-قوتلشیدن تشقری، شخصی انگیزه و اوز قابلیتیگه بولگن ایشانچنی هم اوز کیلهجگینی شکللنتیریشده مهم دیب بیلیشهدی. اولردن ییتی نفری حرکت قیلیش و موجود امکانیتلردن فایدهلنیش آرقهلی حیات اوچون یخشیراق یول یرهتیش ممکنلیگیگه ایشانهدی.
فاریاب ولایتیدن بولگن ۲۰ یاشلی فرشته احمدی، ۱۲-صنف بیتیرگن ایتیشیچه، چیکلاولر گه قرهمی، تعلیمینی دوام ایتتیریش اوچون حرکت قیلیشدن توختمهگنینی ایتهدی. او شوندهی دییدی: «اگر انسان حرکت قیلسه و موجود یوللر آرقهلی تعلیمینی دوام ایتیرسه، احتمال یخشیراق کیلهجک قوره آلهدی. مین اوزیم هم چیکلاولر گه قرهمی، آنلاین درسلرنی دام ایتتیرهیپمن و وقتیمدن اونوملی فایدهلنیشگه حرکت قیلهیپمن.»
شو بیلن بیرگه، گزارش نتیجهلری عایلهنینگ اقتصادی احوالی هم قیزلر و عیاللرنینگ کیلهجک یولینی بیلگیلاوچی اینگ مهم عامللردن بیری ایکنینی کورستهدی. کاپیسالیک ۲۴ یاشلی و لیسانس درجهسیگه ایگه مسلمه قاریزاده شوندهی دییدی: «کوپلب عیاللر عایلهنینگ کوندهلیک احتیاجلرینی قاندیریش اوچون عایلهوی خرهجتلرنی قاپلشگه مجبور بولیب، شخصی ریجه و مقصدلریدن واز کیچیشگه مجبور بولهدیلر.»
قندوز دن بولگن ۲۳ یاشلی و ۱۲-صنف بیتیروچیسی مروه هم، عایلهلرنینگ اقتصادی احوالی قیزلرنینگ عایلهدهگی استوارلیک درجهسینی بیواسطه پسهیتیریشی ممکنلیگینی ایتهدی. او شوندهی دییدی: «بعضی عایلهلردهگی مالیهوی معمالر اولرنینگ قیزلریگه کمراق استوارلیک بیریشیگه سبب بولگن و بو قیزلرنینگ مستقللیگینی معلوم درجهده چیکلب قویگن.»
یاش و تحصیل؛ کیلهجککه بولگن قرهشنی شکللنتیروچی ایکی مهم عامل
گزارش نتیجهلری شونی هم کورستهدی کی، سوادخوانلیک و تعلیم درجهسی قیزلر و عیاللرنینگ کیلهجککه بولگن قرهشلرینی شکللنتیریشده مهم رول اوینهیدی. غور ولایتیدن بولگن ۳۵ یاشلی بیلیم یورتی بیتیروچیسی خدیجه، سوادخوانلیک و تعلیم درجهسی اونینگ کیلهجککه بولگن قرهشیده مهم اورین توتیشینی ایتهدی. اونینگ ایتیشیچه: «تعلیم آلگن عیاللر خواطرده، چونکی اولر قندهی امکانیتلرنی بای بیرگنلیکلرینی بیلیشهدی. اما سوادسیز یا کی کم سوادلی عیاللر کوپراق اقتصادی معمالر یا کی کوندهلیک حیات تشویشلری بیلن بند.»
بوندن تشقری، یاش عاملی هم قیزلر و عیاللرنینگ کیلهجککه بولگن قرهشلرینی شکللنتیریشده مهم رول اوینهیدی. اوشبو گزارشده تعلیمنی دوام ایتتیریش بارهسیدهگی خواطرلر یاشراق قیزلر آرهسیده کوپراق کوزهتیلگن. یاشی کتتهراق عیاللر ایسه کوپراق حیات برقرارلیگی و موجود شرایطلر گه ماسلشیش گه اورغو بیریشهدی.
پروان ولایتیدن بولگن ۱۹ یاشلی و ۱۲- صنف بیتیروچیسی فرحت شوندهی دییدی: «عیاللر گه حلی هم امید بیرهیاتگن نرسه – عایلهوی قوللب-قوتلش، شخصی انگیزه و کیلهجک اوزگریشیگه بولگن ایشانچ دیر. اوسمیر قیزلر تعلیم حقیده خواطرده، اما یاشی کتتهراق عیاللر احتمال موجود شرایطلر گه کونیکیب، کوپراق صبر قیلهیاتگن بولیشی ممکن.»
حسی قوللب-قوتلش؛ قیین کونلرده تیهینچ
جمعیتشناس شعیب احمدینینگ ایتیشیچه، عایلهنینگ قیزلر گه کورستهدیگن حسی و اقتصادی قوللب-قوتلشی اولرنینگ انگیزهسی و امیدینی کوچهیتیریشی ممکن. او شوندهی دییدی:«عایله اعضالری بیر-بیرینی قوللب-قوتلهگنده، بو اولرنینگ انگیزه آلیشیگه، امید قیلیشیگه و ایشلرینی ترتیبلی روشده دوام ایتتیریشیگه سبب بولهدی. عایلهده قیز فرزند کوپراق اعتبار گه محتاج اینیقسه، حاضرگی شرایطده چیکلاولر کوپهیگن بیر پیتده. اولر کوپراق بیلیم آلیشلری و شو بیلن بیرگه اقتصادی جهتدن هم قوللب-قوتلشلری کیرهک، تا کی بو یاردم آرقهلی اجتماعی باسیملر گه قرشی توره آلسینلر.»
روانشناس مرتضی خلیلی هم عایلهنینگ قیزلر و عیاللرنی اینیقسه، آغیر شرایطلرده قوللب-قوتلشینی انقراضلی وضعیتدن چیقیشنینگ مهم عاملی دیب حسابلهیدی. اونگه کوره: «عایله اعتبار و حسی قوللب-قوتلش، اوزیگه بولگن ایشانچنی کوچهیتیریش همده قیزلرنینگ کونیکمهلرینی رواجلنتیریش آرقهلی اولرنی انقراض و روحی جهتدن ناعادتی حالتدن قوتقریشی ممکن.»
اوشبو گزارش نتیجهلری شونی کورستهدی کی، عیاللر و قیزلر یاش و حیات شرایطلریدهگی فرقلر گه قرهمی، کیلهجککه امید بیلن قرهشده بیر نیچته عمومی عاملنی مهم دیب بیلیشهدی. عایلهنینگ قوللب-قوتلشی، شخصی انگیزه، تعلیم، اقتصادی احوال و اوزگریش امکانیتیگه بولگن ایشانچ.
