کیچیک و ساده ایشخانهسی چیکهسیده، دقت بیلن ینگی اثر توزیش بیلن مشغول. ایشخانهدهگی سکوت فقط اونینگ ایش اوسکونهسی آوازی بیلن سیندیریلهدی – بو فضا اونینگ تلاش، خلاقیت و امیدیدن حکایه قیلهدی.
فریده وکیلزاده ۲۶ یاشلی و سیاسی علوم یونهلیشینی تماملهگن ایتیشیچه، ایرانده مصنوعی تاش توزیش، رزین بیلن ایشلش، سیلیکانی قالبلر و شمع توزیش کبی هنرلرنی اورگنگنیدن سونگ، بو بیلیملرینی عملی قیلیب و کابلده کیچیک هنری ایشخانهنی آچیش گه قرار قبول قیلگن.
فریدهنینگ کوپهیتیریشیچه، اوشبو ایشخانهنی آچگنیدن کیین، عیاللر مالیهوی مستقللیککه ایریشیش و حیاتلری اوچون ینگی یولنی تنلش مقصدیده بو ایشخانهده خاتین-قیزلرنی ایش بیلن تأمینلش گه حرکت قیلگن. او شوندهی دییدی: «ه.ش ۱۴۰۰-ییلدهگی شرایط طفیلی ایران گه آواره بولدیک و او ییرده ایکی ییل عایله بیلن تیریکیچلیک قیلدیک و اوشبو مدت دوامیده وقتدن فایدهلنیب بیر کونیکمه یا کی مسلکنی اورگهنیشگه قرار قیلدیم.»
قریب بیر یریم ییل اول ایشینی کیچیک مقدار پول یعنی سکیز مینگ افغانی بیلن باشلهدی و ایندی قیلهیاتگن درآمدی، احتیاجلری و ایشینینگ صرف-خرهجتینی تأمینلماقده دیب ایتهدی، تدبیرکار فریده وکیلزاده. او شوندهی دییدی: «ایشنی سکیز مینگ افغانی بیلن باشلهدیم یعنی اوشبو مقدار پول بیلن ایش اوچون نیاز بولگن اوسکونهلرنی ایراندن ساتیب آلدیم و استه-سیکین یخشی درآمد قیلدیم و نهایت اوشبو درآمد دن چیندن ایش موادینی تکلیف قیلیشگه قوربیم ییتدی جملهدن سیلیکانی قالبلر، شمع موادی، سیلیکان خام اشیاسی و هکذالر.»
وکیلزادهنینگ ایتیشیچه، دستلبکی موادلریدن بیر قسمینی کابل بازارلریده تأمینلهیدی، بیراق تخصصی سیلیکان خام اشیا افغانستان بازارلریده یوقلیگی سببلی چیتایلدن آلیب کیلهدی.
سیلیکان قابلبلری آزلیگی، ایش باشلش پیتیدهگی اساسی معمالریدن بولگنینی قوشیمچه قیلهدی، او. فریده شوندهی دییدی: «اولیگه، مین افغانستان گه ایندیگینه کیلگنیمده، بیز دوچ کیلگن اینگ کتته معما سیلیکان قالبلرینینگ یوقلیگی ایدی. چونکی قالب بولمسه، دیکور بویوملرنی تیارلهی آلمهیمیز. اما اوزیم هم قالب تیارلشنی اورگنگنیم اوچون باشقه مملکتلردن سیلیکان خام اشیاسینی آلیب قالبلرنی اوزیمیز تیارلهدیک.»
او ینه شونی قوشیمچه قیلهدی کی، اوندن تشقری ینه اوچ نفر یاش قیز هم اوشبو ایشخانهده فعالیت یوریتیب، محصولاتلرنی قداقلش (بستهبندلیک) و بویش ایشلریده یاردم بیرهدی. او شوندهی دییدی: «حاضرده مین بیلن اوچ نفر قیز ایشلهیپتی. اولردن بیری قداقلش بولیمیده ایشلهیدی، قالگن ایکی قیز ایسه محصولاتلرنی بویش یعنی رنگ بیریش ایشلریده یاردم بیریشهدی. محصولاتلرنی ایشلب چیقریش ایشلرینی ایسه اوزیم بجرهمن.»
او، عایلهسینینگ قوللب-قوتلشینی موفقیتینینگ اساسی عامللریدن بیری دیب بیلهدی و کیلهجکده کتتهراق ایشخانه تشکیل ایتیب، کوپراق قیزلر گه تعلیم آلیش و ایش بیلن تأمینلنیش امکانیتینی یرهتیشگه امید قیلهدی. اونینگ ایتیشیچه: «فعالیتیم دوامیده عایلهم دایما مینی قوللب-قوتلب کیلگن و حاضر هم قوللب-قوتلماقده. ایشیمنینگ رواجلنیش یولیده اولرنینگ رولی جوده کتته بولگن. ایش باشلگنیمدن بوگونگی کونگچه مینی دایما رغبتلنتیریب، یانیمده بولیشدی و هر دایم قوللب-قوتلشدی.»
فریده اوز آرزولری حقیده گپیرر ایکن، کتته و زمانهوی جهازلنگن ایشخانه گه ایگه بولیشنی ایستشنی ایتهدی. او بو آرقهلی نهفقط اوز فعالیتینی رواجلنتیریشنی بلکی باشقه قیزلرنی هم قوللب-قوتلشنی خواهلهیدی. او شوندهی دییدی: «اینگ کتته آرزولریمدن بیری – کتته و زمانهوی جهازلنگن ایشخانه تشکیل ایتیش. بو نهفقط اوز فعالیتیمنی کینگهیتیریش، بلکی باشقه عیاللر گه هم ایش و رواجلنیش امکانیتینی یرهتیش، اولر گه بیرار هنر اورگهتیش و یخشی درآمد تاپیشلریگه کمکلش دیر.»
شو بیلن بیرگه، خاتین-قیزلر حقوقی فعالی تهمینه منگل، عیاللرنینگ محلی اقتصادیاتینی رواجلنتیریش حقیده توختهلیب، عایلهلر عیاللرنینگ صنعتی و ایجادکارلیگینی رغبتلنتیریش همده قوللب-قوتلش آرقهلی اولرنینگ اقتصادی فعالیتیدهگی اشتراکینی ینهده کینگهیتیریشلری ممکنلیگینی تأکیدلهیدی. او شوندهی دییدی: «جمعیت و عایله قیزلریگه ایشانچ بیلدیریش، اولرنی رغبتلنتیریش، تعلیم آلیشلری اوچون امکانیت یرهتیش و قابلیتلرینی حرمت قیلیش آرقهلی اولرنینگ موفقیتیده کتته رول اوینشی ممکن. اقتصادی مستقللیک قیزلر گه اوزیگه بولگن ایشانچنی آشیریش گه، قرار قبول قیلیش صلاحیتینی کوچهیتیریشگه و جمعیت ترقیاتیده فعاللراق اشتراک ایتیش امکانینی بیرهدی.»
کون استه-سیکین یکونیگه ییتماقده، قویاش ایسه باتیش عرفهسیده. فریده ایشخانهسینینگ ایشیگینی یاپیب، اویی گه یول آلهدی. اونینگ قلبیده ایسه ایرته گه بو ایشخانه ینه چیراقلرینی یاقیب ماهر قوللری بیلن ینگی آرزولر گه شکل بیریشیگه بولگن امید یشهیدی.
