ایریم عیاللرنینگ ایتیشیچه، اولرنینگ تدبیرکارلیک فعالیتی مستقل درآمد گه ایگه بولیش ایستهگیدن باشلنگن و استه-سیکین عایلهنی قوللب-قوتلش، شخصی رواجلنیش همده باشقه عیاللر اوچون ایش امکانیتلری یرهتیش یولیگه ایلنگن.
اوشبو گزارشده ۱۰ ولایتده تجارت و تدبیرکارلیک بیلن شغللنوچی ۲۰ نفر عیال بیلن صحبت قیلینگن. اولرنینگ سکیز نفری تیکوچیلیک، تورت نفری قول صناعتی جملهدن مونچاق تیکیش، قالین توقیش و کشتهچیلیک، اوچ نفری آزیق-آوقت محصولاتلرینی قیته ایشلش، ینه اوچ نفری بیر وقتنینگ اوزیده تیکوچیلیک و قول صناعتی، ایکی نفری ایسه عیاللر و بالهلر کییملرینی ساتیش بیلن شغللنهدی.
بو عیاللر ایشلرینی تورت مینگدن ۱۵۰ مینگ افغانی سرمایه کیریتیش بیلن باشلهگنلر.
گزارشده صحبت قیلگنلرنینگ سکیز نفری مالیهوی مستقللیککه ایریشیش، آلتی نفری مالیهوی مستقللیک و عایله اقتصادیگه یاردم کورسهتیش، تورت نفری کسب و شخصی کونیکمهلر گه بولگن قیزیقیشی و ایکی نفری ایسه ایش امکانیتلرینینگ یوقلیگینی سودا-ساتیققه کیریشنینگ اساسی سببی دیگنلر.
بلخ یشاوچیسی بولگن ۲۳ یاشلی مروه احمدی، اوی شرایطیده تیارلنهدیگن طعاملرنی پیشیریش و ساتیش بیلن شغللنهدی. اونینگ ایتیشیچه، قریب ایکی ییل آلدین آوقت پیشیریش گه بولگن قیزیقیشی و مهارتی طفیلی فعالیتینی کیچیک مقیاسده اوییدن باشلهگن. او شوندهی دییدی: «اوقیشیمنی توگهتگنیمدن کیین تشقریده ایشلش امکانیتی بولمهگنی اوچون کیچیک تجارت باشلشنی خواهلهدیم. مین دایما منتو، سمبوسه و اوی طعاملرینی تیارلشگه قیزیقردیم و بو بارهده مهارتیم بار ایدی. باشقه تاماندن اوی یوموشلری بیلن بیر قطارده درآمد تاپیب، عایلهمیز اقتصادیاتیگه یاردم بیریشنی خواهلردیم.»
نورستان ولایتیدن بولگن ۲۵ یاشلی شکیبا محمدی گه کوره، او ایکی ییل آلدین شخصی قیزیقیشی، مالیهوی مستقللیککه ایریشیش و عایلهسیگه یاردم بیریش مقصدیده بیش مینگ افغانی مبلغ بیلن تیکوچیلیک فعالیتینی باشلهگن. او شوندهی دییدی: «مین اولدن تیکووچیلیکنی اورگنیشگه قیزیقردیم و اوزیمگه هم درآمد کیلتیرهدیگن، عایلهمگه هم یاردم بیره آلهدیگن ایشگه ایگه بولیشنی خواهلردیم. تیکوچیلیکنی باشلگنیمگه قریب ایکی ییل بولدی.»
بو عیال تدبیرکارلرنینگ ایتیشیچه، اولر تجارتلرینی آز مبلغ بیلن باشلهگن، بیراق ریجهلشتیریش، بازارنی اورگنیش و درآمد پولینی قیته سرمایه کیریتیش آرقهلی فعالیتلرینی کینگهیتیریب، درآمد و سرمایهنی آشیریشگه موفق بولگن.
کابل یشاوچیسی ۲۶ یاشلی تفسیر برکی، سودا فعالیتینی ایکی ییل آلدین قریب ۱۰۰ مینگ افغانی مبلغ بیلن تیکوچیلیک و قول صناعتی – مونچاق تیکیش – ساحهسیده باشلهگنینی و حاضرده آیلیک درآمدی آشگنینی ایتهدی. او شوندهی دییدی: «ایشیمنی قریب ۱۰۰ مینگ افغانی بیلن باشلهدیم. دستلب فعالیتیم کیچیک مقیاسده ایدی، بیراق وقت اوتیشی بیلن حرکت، ریجهلشتیریش و بازارنی یخشیراق اورگنیش آرقهلی اونی کینگهیتیره آلدیم. حاضر ایشیم یخشی درجهده و حاضرگی درآمدیم اورتچه آییگه ۲۰-۴۰ مینگ افغانی اطرافیده.»
باشقه تاماندن، دایکندی یشاوچیسی بولگن ۲۶ یاشلی سایره صالحی، خبرنگارلیک فعالیتیدن ایریلگچ، ۱۵۰ مینگ افغانی مبلغ بیلن کییم-کیچک و بالهلر بویوملری دکانینی آچگن. حاضر ایسه سرمایهسی قریب ۲۵۰ مینگ افغانی گه ییتگنینی ایتهدی. او شوندهی دییدی: «ایشیمنی ۱۵۰ مینگ افغانی سرمایه بیلن باشلهدیم و حاضر ۲۵۰ مینگ افغانی گه ییتگن دیب اویلهیمن. قنچه ایشلهسم هم، اساسی پول و فایدهنی صرفلمهی من؛ ینه محصولات ساتیب آلهمن و دکانیمنی تولدیرهمن. شوندهی قیلیب، کوپراق مجاز جلب قیلهمن و سرمایهم کوپهیب بارهیاتگنینی کورستهدی.»
عیال تدبیرکارلرنینگ ایتیشیچه، اقتصادی فعالیتگه کیریش اولر اوچون فقط درآمد منبعی بولیب قالمهگن. اولر ایش جریانیده مارکیتینگ، سرمایهنی باشقریش، سودا، مجازلر بیلن معامله قیلیش و اجتماعی ترماقلردن فایدهلنیش کبی کونیکمهلرنی هم اورگنگن. اولرنینگ فکریچه، بو کونیکمهلر تجارتنینگ رواجلنیشی و رونق تاپیشیگه زمینه یرهتگن.
بدخشانلیک تدبیرکار عیال شیما و جوزجانلیک ذکیه هم، تدبیرکارلیک فعالیتی دوامیده تورلی کونیکمهلرنی اورگنگنینی ایتهدیلر.
شیما شوندهی دییدی: «هر قندهی ایشنینگ باشیده بیلیمسیزلیک و تجربهسیزلیک بولهدی. البته، کیچیک تجارتنی باشلهگنیمدن سونگ کوپلب کونیکمهلرنی اورگندیم. جملهدن مارکیتینگ، پولنی باشقریش، مجازلر بیلن معامله قیلیش و اجتماعی ترماقلردن فایدهلنیشنی اورگندیم.»
ذکیه هم شوندهی دییدی:«تدبیرکارلیک فعالیتیم دوامیده اپلیکشنلر آرقهلی محصولاتلریمنینگ ویدیولری و صورتلرینی تیارلب، یخشی ریکلمه قیلیشنی اورگندیم. محصولاتنی قندهی ساتیش کیرهکلیگینی، سودا اصوللرینی، رقابتنی و مجازلر راضیلیگیگه ایریشیش یوللرینی فعالیتیم دوامیده اورگندیم.»
شو بیلن بیرگه، اقتصاد شناسلرنینگ ایتیشیچه، عیاللر تورلی کونیکمهلر گه اینیقسه قول صناعتی و سودا ساحهلریدهگی تجربه گه ایگه بولیب، عایلهوی اقتصادیات گه یاردم بیریش و محلی اقتصادیاتنی رواجلنتیریش اوچون مهم صلاحیت گه ایگه.
اقتصاد شناس امیدالله قاسمزی شوندهی دییدی: «قیشلاق عیاللری مدنیت و قول صناعتی ساحهلریده یخشی تجربه گه ایگه، شهر عیاللری ایسه سودا ساحهسیده کوپراق امکانیت گه ایگه و ایچکی همده تشقی سودا بیلن شغللنیشلری ممکن. اگر تدبیرکار عیاللرنی بو بارهده کوپراق قوللب-قوتلشسه، اولر عایلهلر اقتصادیاتینینگ رواجلنیشیده مهم رول اوینشی ممکن.»
عیال حقوقی فعاللرینینگ ایتیشیچه، عیاللرنینگ اقتصادی فعالیتینینگ آرتیشی اولرنینگ مالیهوی مستقللیگینی کوچهیتیریب، عایلهدهگی قرارلر قبول قیلیش جریانیده کوپراق اشتراک ایتیشیگه زمینه یرهتیشی ممکن.
عیال حقوقی فعالی ذکیه علیزاده شوندهی دییدی: «عیاللرنینگ اقتصادی فعالیتینینگ آرتیشی اولرنینگ مالیهوی مستقللیگیگه یوز فایز تأثیر قیلهدی. بو انسان حیاتیده جوده مهم. درآمد گه ایگه بولگن عیاللر عایلهوی خرهجتلر گه حصه قوشهدی. نتیجهده اولرنینگ عایلهدهگی موقعی و اورنی آشهدی، قرار قبول قیلیش رولی همده مالیهوی مستقللیگی کوچیهدی.»
تأکیدلش جایز کی، عیاللر سودا و قول صناعتی اتاقی بیلن بیر نیچه بار باغلنیشگه قرهمی، اوشبو گزارش نشر بولگونچه مذکور تشکیلات رسمی تدبیرکارلیک بیلن شغللنهیاتگن عیاللرنینگ رقمی حقیده معلومات بیرمهدی، بیراق بیرلشگن ملتلر تشکیلاتینینگ ترقیات دستوری (UNDP) میلادی ۲۰۲۶-ییلده معلوم قیلیشیچه، افغانستانده عیاللر نامیگه رویخطدن اوتکزیلگن سودا جوازلری سانی سونگی بیش ییلگه نسبتن اون برابر آشگن و حاضرده ۱۰ مینگدن آرتیق عیال رسمی تجارت جوازینی آلگن.
