ننگرهار ولایتی خوگیانی تومنی یشاوچیلریدن قطاری، ییللردن بویان قولوپنای (ییر توتی) ایکیش بیلن شغللنگنلر. اوشبو دهقانلرنینگ ایتیشلریچه، باشقه محصوللرگه نسبت کوپینچه حاصل و درآمدی بولگنی سبب، قولوپنای ییتیشتیریشنی تنلهگنلر.
ننگرهار ده ایکینچیلیک ایش بیلرمانلرینینگ ایتیشلریچه، قولوپنای ییتیشتیریلیشی کوپینچه خرهجت و قرهشگه نیازی بولگنی بیلن، بیراق ینه هم یوقاری درآمدگه ایگه بولگنی اوچون مناسب امکانیت دیب حسابلنهدی.
باشقه بیر تاماندن، ننگرهار ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، اوشبو ولایت تورلی تومنلریده ۴۰۶ جریب ییرگه قولوپنای ایکیلیب و بو ییل قریب ۶۷۰ متریک تُن محصول قولگه کیلیشی ممکن.
شوندهی بیرحالده، بیریریم جریب ییریگه قولوپنای ایککن دهقانلردن رحیماللهنینگ ایتیشیچه، یخشی حاصل و مناسب فایدهسی سبب بو محصولنی تنلهگن. «بو ییل بیریریم جریب ییرگه قولوپنای ایکدیم و قریب ۴۰ دن ۵۰ مینگ افغانی فایده قیلدم. منطقهمیز بو ایکین اوچون مناسب دیر، چونکه ییترلی سووگه ایگه بولیب و یخشی حاصل بیرهدی. بوغدای یا-ده باشقه محصوللرگه قرهگنده، قولوپنای تولیدی و درآمدی کوپراق دیر.»
قولوپنای ایکهدیگن دهقانلردن باشقه بیر قطاری مسئول نهادلر و همکار موسسهلردن مخصوص بازار یرهتیلیشی، فنی تعلیملر بیریلیشی و بو بولیمده قوللب-قوتلنیشنی سورهگنلر. ننگرهار ولایتی سرخرود تومنیدهگی دهقانلردن زینالله، ایکینچیلیک کودلر، اصلاح بولگن اوروغ یا-ده کوچت یاردم بیریلیشینی هم طلب قیلیب و ایتیشیچه: «بیزلرگه تعلیم بیریلگنی، بیراز همکارلیک بولگنی و زراعتی کودلر یاردم بیریلگنی صورتده، تولیدلریمیز آشیشی، قولوپنای ایکیلیشی کوپهیشی و اهالیگه ایش زمینهسی یرهتیلیشی ممکن.»
شونینگدیک سرخرود تومنیدهگی دهقانلردن باشقه بیری سلیماننینگ ایتیشیچه: «قولوپنای ایکیلیشی باشقه سبزهواتلرگه نسب یخشی دیر، چونکه حاصلی کوپ و قیمتی هم یخشی دیرو هر کیلوسی ۱۵۰ دن ۲۰۰ افغانیگه ساتیلهدی. یالغیز بیر قیینچیلیک بار که بو ییل زراعتی کودلر قیمتی جوده یوقاری ایدی.»
شوندهی بیرحالده، ایکینچیلیک بیلرمانلرنینگ اورغولشیچه، قولوپناینینگ منظم شکلده مراقبت و مدیریت بولیشی کیرهک، چونکه بو میوه تیز زیان کوریب و دهقاننینگ ضرر کوریشیگه سبب بوله آلهدی.
ایکینچیلیک بیلرمانلردن کامران رسولینینگ ایتیشیچه، قولوپنای تازه قالیشی و کسللیکلردن امان بولیشی اوچون بوتهلری اطرافیگه پلاستیک یازیلیشی کیرهک. «شرقی ولایتلر قولوپنای ییتیشتیریلیشی اوچون جودهیم مناسب دیر و بو محصول باشقه ایکینلرگه نسبت، کوپراق اقتصادی فایده گه ایگه دیر، لیکن دهقانلر کوپراق قرهشلری کیرهک. قولوپناینینگ جوده حساس بولگنی و تیز زیان کوریشی اوچون بوتهلری اطرافیگه پلاستیک یازیشلری کیرهک.»
باشقه بیرتاماندن، ننگرهار ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، بو ییل درهی نور، کوت، خوگیانی و سرخرود تومنلریده قولوپنای ایکیلگن. اولرگه کوره، اوشبو محصولنی رواجلنتیریش اوچون دهقانلردن کوپ قطاریگه آگاهیلیک بیریلیب و بو دستورنینگ کوچهیشی اوچون سعیوحرکتنینگ دوامی بار.
ننگرهار ایکینچیلیک، سووغاریش و چاروهچیلیک ریاستی سوزلاوچیسی اجمل سبحانینینگ ایتیشیچه: «بو ییل ننگرهار ولایتی درهی نور، کوت، سرخرود و خوگیانی تومنلریده ۴۰۶ جریب ییرگه قولوپنای ایکیلیب و اوندن قریب ۶۷۰ متریک تُن محصول قولگه کیلیشی ممکن. ایکینچیلیک ریاستی قولوپنای ایککن دهقانلرگه آگاهیلیک بیریش دستورینی اوتکزگن. شونینگدیک کوپراق قولوپنای ایکیلیشی اوچون نمایشی قطعهلرنی یرهتیب و کیلهسی ییلده بو دستورنینگ عملگه آشیریشی ممکن.»
ننگرهار ایکینچیلیک، سووغاریش و چاروهچیلیک ریاستی معلوماتی اساسیده، اوتگن ییلی دهقانلر آرقهلی بو ولایت تورلی تومنلریده ۳۵۶ جریب ییرگه قولوپنای ایکیلیب و مذکور ییرلردن ۵۸۷ متریک تُن محصول قولگه کیلیب و بازار گه چیقریلگن.
