فاریاب یشاوچی‌لری اینیقسه ملی اسلامی جنبش حزب طرفدارلریدن کوپینچه‌سی، بو ولایت اوچون ینگی حاکم تعیین ایتیلگنی گه قرشی اعتراض بیلدیریشگن.
مذکور اعتراض نی رهبرلیک قیله‌دیگن فاریاب ده ملی اسلامی جنبش حزب باشلیغی عطامحمد فیضی نینگ ایتیشیچه، مرکزی حکومت فاریاب یشاوچی‌لری برابریده تبعیضلی حرکت قیله‌دی و بو ولایت خصوصیده معلوماتی بولمه‌گن بیر کیشی نی حاکم تعیین قیلیش بیلن، اهالی گه جفا قیله‌دی.
جناب فیضی گه کوره، فاریاب اهالیسی و جنبش حزبی نینگ طرفدارلری ینگی حاکم نی بو ولایت گه کیریشی گه توسیق بوله‌دی و حکومت مذکور کیشی نی فاریاب اهالیسی گه تحمیل قیله آلمه‌یدی.
فاریاب ده ملی اسلامی جنبش حزب اعضالریدن بیری میرویس شاهی نینگ ایتیشیچه، اوشبو اعتراض دن مقصد مرکزی حکومت نینگ یکه‌تازلیگی گه قرشی عکس‌العمل کورسه‌تیش دیر و اولر اوز ولایت‌لریدن تشقی بیر والی نی ایستمه‌یدیلر.
مذکور ناراضلیک نمایش گه قتنشگن، فاریاب ولایتی کینگش اعضاسی فریبا تورانی نینگ ایتیشیچه، دولت فاریاب اهالیسی حقیده عدالت‌سیزلیک قیلگن و اولر شو یوزه‌دن اعتراض بیلدیریشگن.
خانم تورانی گه کوره، فاریاب نینگ کوپینچه کدرلری بار و حاکم هم منه شو کدرلردن تنله‌نیشی کیره‌ک، بولمه‌گن صورتده اعتراض‌لرینی کینگه‌یتیریش‌لری ممکن.
باشقه بیر تاماندن اوتگن کون ملی اسلامی جنبش حزب رهبری مارشال عبدالرشید دوستم، نقیب‌الله فایق چیتلنتیریلیشی و محمدداوود لغمانی فاریاب حاکمی صفتیده تعیین‌لنیشی خصوصیده فاریاب یشاوچی‌لری نینگ ناراضلیک ییغینی ده، اعتراضچیلر و طرفدارلریگه ینگی حاکم نینگ فاریاب کیریشی گه توسیق بولیش‌لری اوچون بویروغ بیرگن.
بیراق فاریاب سابق حاکمی نقیب‌الله فایق، اهالی نینگ اعتراضی خصوصیده صحبت بیریش گه حاضر بولمه‌گن. فاریاب یشاوچی‌لری اعتراض بیلدیرگن بیرحالده، جمعه کونی محلی ارگانلر ایرکین اداره‌سی محمد داوود لغمانی نینگ نقیب‌الله فایق اورنیده فاریاب حاکمی صفتیده تعیین قیلگن.
