اوتگن کون (پنج‌شنبه ۹- ثور) سی‌ان‌ام خبری ترماغی آق سرای و آمریکا مدافعه رسمی‌لری نینگ قطاری دن نقل قیلیب گزارش بیریشیچه، آمریکا حربی‌لری نینگ افغانستان دن چیقیش پروسه‌سی عمل گه آشیریلماقده.
شونینگدیک ناتو نینگ نیچه رسمی‌سی فرانسه خبرگزارلیگی بیلن صحبت اوتکزیب، بو تشکیلات هم حربی‌لری نینگ چیقیش پروسه‌سی باشله‌گنی نی تصدیقله‌گن.
ناتو رسمی‌لریدن بیری فرانسه خبرگزارلیگی گه ایتیشیچه، مذکور تشکیلات بیرلشیک‌لری اپریل آیی نینگ اورته‌سیده، افغانستان ده مأموریت‌لرینی توخته‌تیب و بیرینچی می آیی دن چیقیش پروسه‌سی نینگ باشله‌ش گه قرار آلیشگن.
ناتو نینگ اوشبو رسمی‌سیگه کوره، مذکور تشکیلات حربی‌لری نینگ افغانستان دن چیقیش پروسه‌سی باشلنگن. ناتو رسمی‌سی نینگ ایتیشیچه، حربیلرنینگ تینچ شکلده چیقیشی اولرنینگ اولویتی دیر و بو پروسه گه طالبان نینگ هر قنده‌ی هجومی جدی و قاطع عکس‌العمل گه روپه‌رو بولیشی ممکن.
آق سرای سوزلاوچیسی اورین‌باسری کارین ژان پیر نینگ ایتیشیچه، افغانستان ده آمریکالیک حربیلرنینگ سانی کمه‌یش پروسه‌سی عمل گه آشیریلماقده.
اوتگن هفته افغانستان ده چیت‌ایللیک کوچلرنینگ عمومی قومندانی اسکات میلر، چیت‌ایللیک کوچلرنینگ قرارگاه‌لرینی بوشه‌تیش پروسه باشلنگنی نی اعلام قیلدی. اونینگ ایتیشیچه، چیت‌ایللیک کوچلر قرارگاه‌لرینی امنیتی و مدافعه کوچلریگه تاپشیرگن.
شونینگدیک کمیده ایکی هفته آلدین آمریکا جمهوررئیسی جو بایدن نینگ ایتیشیچه، آمریکالیک حربیلر نینگ افغانستان دن چیقیشی می آیی گه باشله‌نیب و ۱۱- سپتمبر آیی گچه یکونلنه‌دی کیم بو تاریخ القاعده نینگ نیویورک برج‌لری اوستیگه اویوشتیرگن هجومی نینگ ۲۰ ییل‌لیگی گه ماس کیله‌دی.
عین حالده، ناتو هم آمریکا حربی‌لری بیلن بیرگه بو تشکیلات حربی‌لری هم افغانستان نی ترک قیلیشی ممکن دیدی.
اوندن کیین جمهوررئیس محمداشرف غنی، چیت‌ایللیک کوچلر چیققنیدن کیین مملکت امنیتی و مدافعه کوچلری هر شرایط ده اولکه‌لری نینگ خوفسیزلیگی نی تأمین‌لیش اوچون تیارگرلیک‌لری توغریسیده سوز بیردی.
حاضر کمیده ۲۵۰۰ آمریکالیک حربی و ۱۰ مینگ دن آرتیق ناتو کوچلری کیسکین مأموریت چارچوبه‌سیده افغانستان ده موجود دیر.
بوندن آلدین آمریکا مدافعه وزیرلیگی، چیت‌ایللیک کوچلرنینگ تینچ شکلده افغانستان دن چیقاریش اوچون ۶۵۰ ینگی حربی بو مملکتده یوباریلیشی نی اعلام قیلگن ایدی.
