محلی و امنیتی منبعلرنینگ کیملیکلری سیرقالیشنی ایستهب سلاموطندارگه ایتیشلریچه، بلخ ولایتی نینگ کلدار تومنی و سمنگان ولایتی نینگ فیروز نخچیر تومنی اوتگن کونی شام چاغیده طالبان قولیگه سقوط قیلگن و اوشبو تومنلرده بولگن امنیتی و مردمی کوچلر باشقه قوشنی مکانلرگه جایلشگنلر.
مردمی خیزش کوچلری نینگ فعالیتی توغریسیده خواطرلر کوپهیگن بیرحالده، امنیتی نهادلر مسئوللری نینگ ایتیشلریچه، اولرنینگ فعالیتی تیزلیککه رسمی بولهدی و منطقوی اردو نینگ چارچوبهسیده امنیتی و دفاعی کوچلرنینگ یانیده توریب و طالبان گه قرشی کورهشیشی ممکن.
مملکتده آتیشمه و زوروانلیکلر میزانی کوپهیشی و شونینگدیک تومنلردن قطاری طالبان قولیگه سقوط قیلگن بیرحالده، مهاجرلر وزیرلیگی نینگ سلاموطندارگه ایتیشیچه، سونگی ۱۵ کونده ۶ مینگ دن آرتیق عایله اویلرینی ترک قیلیش گه زورلنگن و اولر باشقه تومنلر و قوشنی ولایتلر یا هم تینچ و کتته شهرلرگه انتقال تاپگن.
تخار ولایتیدن امنیتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، کوکچه اطرافیدهگی تومنلردن کوپقطار حربی کوچلر رستاق تومنیده جایلشگن ایدیلر و اوشبو کوچلرنی هیچقندهی قیینچیلیکلری یوق ایدی. منبع نینگ ایتیشیچه، امنیتی کوچلرگه اوروش روحیهسی بولمهگنی و مردمی کوچلر قومندانلری آرهسیده جنجللر بولگنی سبب، رستاق تومنی طالبان قولیگه سقوط قیلگن.
ملی مصالحه کینگشی باشلیغی نینگ کوپهیتیریشیچه، امنیتی و دفاعی کوچلردن حمایت قیلیش، یوتوقلر سقلهنیشی و سیاسی اجماع ایجاد ایتیلیشی آمریکا نینگ افغانستاندهگی یاردملری دوام تاپیشیگه زمینه یرهتهدی.
طالبان هجومی شدتلنگنی و بیرقطار تومنلرنی اوشبو گروه قولیگه سقوط قیلگنی باعث، مملکت کوپ قطار منطقهلریده مردمی کوچلر ایجاد ایتیلماقده و کوپقطار کیشیلر طالبانگه قرشی قورال آلیب امنیتی کوچلر یانیده توختهگنلر.
آمریکالیک بیر دیپلومات نینگ سلاموطندارگه ایتیشیچه، آمریکا قوشمه ایالاتی افغانستان ده مذکور مملکت ایلچیخانهسی و کابل هواقونالغهسیدهگی اولرنینگ باشقه امکانیتلری نینگ خوفسیزلیگی نی تأمینلش اوچون، کمیده ۶۰۰ آمریکالیک حربی افغانستان ده قالیشی ممکن. اونینگ اورغولشیچه، برچه تینچلیک پروسهسی نینگ دوام تاپیشی دن ناامید بولگن.
ایچکی ایشلر وزیرلیگی سرپرستی عبدالستار میرزکوال، پکتیا خوفسیزلیک وضعیتی نی تیکشیریش اوچون بوگون مذکور ولایت گه سفر قیلگن. او پکتیا گه قیلگن سفری جریانیده مردمی بیر ییغینده ایتیشیچه، امنیتی کوچلر بوتون افغانستان اینیقسه بو ولایتده طالبان قولیگه سقوط قیلگن تومنلرنی قیته آلهدی.
افغانستان جمهور رئیسی محمداشرف غنی و هیات باشقه اعضالری اوتگن کونی شام چاغیده، آمریکا جمهور رئیسی جو بایدن بیلن اوچرهشگن.
جو بایدن اوشبو اوچرهشووده آمریکالیک حربیلرنی افغانستاندن چیقیشی اوستیگه تاکید قیلگن، بیراق اوشبو مملکت یاردملری دوام قیلیشینی بیلدیرگن.
جمهوررئیس محمداشرف غنی و اونینگ همراهلیک قیلهدیگن هیأت، اوتگن کون توشدن کیین دموکراتلرنینگ رهبری سناتور چارلز شومر و جمهوریتخواه اقلیت رهبری سناتو میچ مکانیل و شونینگدیک باشقه آمریکالیک سناتورلر بیلن واشنگتن ده اوچرهشگن.
جوزجان پولیسی نینگ ۵- سمت آمری نجیبه دلاوری، امنیتی وضعیت نی تیکشیریش و حربی پوستهلرنی کوریش اوچون بو ولایت نینگ قوشتپه تومنی گه بارگن. خانم دلاوری طالبان گه قرشی اوروشیشی توغریسیده ایشانچ بیریب و طالبان گه تسلیم بولیش نی ننگ دیب بیلهدی.
قندوز ولایتی بوییچه ساغلیقنی سقلش ریاستی مسووللری نینگ ایتیشلریچه، اوتگن بیرهفته جریانیده اوشبو ولایتده یوز بیرگن آتیشمهلر نتیجهسیده 21 تینچ اهالی هلاک و باشقه 225 تینچ اهالی یرهلنگن.
مملکت جمهوررئیسی محمداشرف غنی و ملی مصالحه عالی کینگش باشلیغی عبدالله عبدالله، آمریکا جمهوررئیسی تامانیدن رسمی بیر چقیروو اساسیده، بیر هیأت بیلن واشنگتن سفر قیلگن.
ملی مدافعه وزیرلیگی بیر خبرنامه ترقهتیب ایتیشیچه، اوتگن بیر کیچه و کوندوز ده مملکت حربیلری نینگ هجوملری باعث ۱۳ ولایتده ایکی یوز طالب هلاک و باشقه کمیده ۱۰۰ طالب ایسه یرهلنگن. تومنلردن قطاری طالبان قولیگه سقوط قیلگنیدن کیین، ولایتلردن کوپینچهسیده اهالی طالبان گه قرشی بسیج بولگن.
افغانستان ده بیرلشگن ملتلر تشکیلاتی باشکاتبی نینگ خاص نمایندهسی دیبرا لاینز نینگ آگاهلنتیریشیچه، چیتایللیک کوچلرنینگ افغانستان دن چیقیش پروسهسی باشلنگن بیرحالده، طالبان هجومی کوپهیگن. بیرلشگن ملتلر تشکیلاتی اوشبو ناتینچلیکلرنینگ منطقه و دنیا ده یمان تأثیری اوستیگه اورغولهگن.
اونینگ ایتیشیچه، ملی مصالحه کینگشی باشلیغی عبدالله عبدالله، جمهورلیک ریاستی بیرینچی اورین باسری امرالله صالح، ملی خوفسیزلیک کینگشی مصلحتچیسی حمدالله محب و انسان حقوقی ایرکین کمیسیونی باشلیغی شهرزاد اکبر مذکور هیات عضوی دیر.
بیراق، ملی مصالحه کینگشی نینگ بیرینچی اورین باسری عنایتالله بابر فرهمند اوشبو هیات ترکیبینی نابرابر عنوان قیلگن.
