قندوز ولایتی بوییچه ساغلیق‌نی سقلش ریاستی مسوول‌لری نینگ ایتیش‌لریچه، اوتگن بیرهفته جریانیده اوشبو ولایتده یوز بیرگن آتیشمه‌لر نتیجه‌سیده ۲۱ تینچ اهالی هلاک و باشقه ۲۲۵ تینچ اهالی یره‌لنگن.
قندوز ولایتی بوییچه ساغلیق‌نی سقلش ریاستی باشلیغی احسان‌الله فضلی نینگ سلام‌وطندارگه ایتیشیچه، سونگی بیرهفته جریانیده عیال‌لر و باله شامل ۲۱ کیشی نینگ جسدی اوشبو ولایت حوزه‌یی کسلخانه‌سیگه انتقال بیریلگن و شونینگدیک، ۲۲۵ یره‌لنگن کیشی کسلخانه‌گه کیلتیریلگن.
جناب فضلی نینگ کوپه‌یتیریشیچه، یره‌لنگن ۲۲۵ کیشی جمله‌سیدن ۱۶۰ ته‌سی درمان‌لنیب رخصت بولگن. اونینگ ایتیشیچه، آتیشمه‌لر نتیجه‌سیده یره‌لنگنلردن ۶۵ ته‌سی بستر قیلینگن.
قندوز حوزه‌یی کسلخانه‌سیده بستر بولگن کیشی‌لر، اوشبو ولایتده کیلگن وضعیتدن خواطر بیلدیریب و آتیش‌کیسین قیلینیشینی سوره‌یدیلر.
قندوز یشاوچی‌لریدن بولمیش میرویس اوروش جریانیده یره‌لنگن و ایکی کوندن بویان کسلخانه‌ده بستر دیر. میرویس اوروش تامانلریدن اوروش‌نی توخته‌تیش‌لرینی سوره‌یدی.
شونینگدیک، قندوز یشاوچی‌لریدن باشقه بیری حبیب‌الله نینگ ایتیشیچه، اوی‌گه هاوان توشگنی سبب، یره‌لنگن و ۳ کوندن بویان تداوی آستیگه قرار تاپگن. اونینگ ایتیشیچه، مذکور واقعه ده بیر ایناغه‌سی دنیا دن اوتیب و باشقه بیر سینگیلیسی یره‌لنگن.
عین‌حالده، قندوز پولیس قومندانلیگی سوزلاوچیسی انعام‌الدین رحمانی نینگ ایتیشیچه، طالبان گروهی هجوم‌لرینی کوپه‌یتیریش بیلن تینچ اهالی‌گه زیان ییتیشتیرگن. اونینگ کوپه‌یتیریشیچه، طالبان گروهی اوروش جریانیده عام‌المنفعه مکان‌لرنی تخریب قیلیب و تینچ اهالی اوی‌لریگه هاوان تشله‌یدیلر.
قندوز پولیس قومندانلیگی سوزلاوچیسی نینگ کوپه‌یتیریشیچه، امنیتی کوچلر عملیات‌لر جریانیده تینچ اهالی و مسکونی اوی‌لرگه زیان ییتیشمه‌یشی اوچون سعی و حرکت قیله‌دی.
بیراق، طالبان سوزلاوچیسی ذبیح‌الله مجاهد نینگ هجوم‌لری جریانیده تینچ اهالی تلفاتی‌نی رد قیلیب ایتیشیچه، اوشبو گروه جنگریلری حربی مرکزلر اوستیگه هجوم قیلگن و تینچ اهالی‌گه هیچ‌قنده‌ی زیان ییتیشمه‌گن. اونینگ کوپه‌یتیریشیچه، هوایی کوچلرنینگ هجوم‌لری سبب، تینچ اهالی تلفات کوریب و مسکونی اوی‌لر تخریب ایتیلگن.
