تشقی ایشلر وزیرلیگی نینگ اعلام قیلیشیچه، افغانستان ملی پولیسی نینگ آتی بیرلشگن ملتلر تشکیلاتی باشکاتبی نینگ ننگین رویخطیدن چیقاریلگن. تشقی ایشلر وزیرلیگی گه کوره، افغانستان پولیسی صفیده بالهلرنینگ حضوری باعث مذکور حربیلر، بیرلشگن ملتلر تشکیلاتی باش کاتبی نینگ ننگین رویخطی گه کیریتیلگن ایدی.
چیتایللیک کوچلرنینگ افغانستان دن بوتونلی چیقیشی گه کمیده بیر آی قالگن بیرحالده، آمریکا مدافعه وزیرلیگی یا پنتاگون، افغانستان ده مذکور ممکلت حربیلری نینگ رهبرلیگیده اوزگریشلیک کیلتیرگن.
والاستریت ژورنال کوندهلیگی تامانیدن ترقهتیلگن گزارش گه کوره، آمریکا رسمیلری افغانستان امنیتی وضعیتی یمان بولگنی سبب، قالگن حربیلری، دیپلماتلری و یشاوچیلری نینگ جانلرینی خطر بیلن دوچ کیلمهیشی اوچون اوشبو مملکت نینگ کابلدهگی ایلچیخانهسینی بوشهتیلیشینی سرعتلنتیرگن.
بدخشان ولایتیدن امنیتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، اوشبو تومنلرده جایلشگن امنیتی کوچلردن بیرقطاری طالبان گروهیگه تسلیم بولگن و باشقه بیرقطاری ایسه بدخشان مرکزی و قوشنی تومنلرده جایلشگنلر.
منبع نینگ کوپهیتیریشیچه، بدخشان ولایتی نینگ راغستان تومنیده امنیتی کوچلردن کمیده 100 تهسی طالبان قمراویگه قرار تاپگن.
بدخشان محلی مسووللری نینگ ایتیشلریچه، قندوز ولایتیدن آواره بولگن 200 عایله بدخشان ولایتیگه کیلگنلر. بدخشان مسووللریگه کوره، مذکور عایلهلر بدخشانلیک دیر، لیکن اوزن مدتدن بویان قندوز ده حیات کیچیرهریدیلر.
کابل بوییچه آمریکا ایلچیخانهسی سرپرستی راس ویلسن نینگ ایتیشیچه، بیرقطار تومنلردن طالبان گروهی نینگ میدیالر اوستیگه قیلگن هجوملریدن نشر ایتیلگن گزارشلر خواطرلنترووچی دیر. راس ویلسن اوشبو مطلبنی بوگون “جمعه” توییتر صحیفهسیده یازگن. اونینگ ایتیشیچه، طالبان نظارتیگه اوتگن تومنلرده اوشبو گروه جنگریلری نینگ محلی میدیالر اوستیگه قیلگن هجوملری خواطرلنترووچی دیر.
بدخشان ولایتیدن امنیتی بیر منبع نینگ سلاموطندارگه ایتیشیچه، اوتگن کیچه اوشبو ولایت مرکزی فیضآباد شهری نینگ 8- ناحیهسیده امنیتی کوچلر و طالبان جنگریلری آرهسیده یوز بیرگن آتیشمهده ملی اردو افسرلری و مردمی کوچلر شامل 10 کیشی هلاک ایتیلگن. منبع نینگ کوپهیتیریشیچه، امنیتی کوچلردن باشقه بیرقطاری طالبان قولیگه اسیر بولگن.
بغلان محلی منبعلری نینگ سلاموطندارگه ایتیشلریچه، اوتگن کیچه اوشبو ولایت نینگ خوست تومنیده طالبان کمیننی سبب، پلچرخی قماقخانهسی نینگ تعلیم و تربیه ریاستی باشلیغی غلاممحیالدین پیکان حیدری و مردمی کوچلر باشقه ایکی قومندانی هلاک ایتیلگنلر.
آمریکا میدیالری نینگ اوشبو مملکت حربی مقاملریدن نقل قیلیب ایتیشلریچه، آمریکا و ناتو کوچلری کمیده 20 ییلدن سونگ، بگرام قرارگاهینی بوشهتگن. اوشبو قرارگاه آمریکا نینگ افغانستاندهگی بویوک مرکزلریدن بیری ایدی و حاضرده افغانستان حربی کوچلریگه تاپشیریلگن.
سونگی ایکی آی جریانیده مملکت بیرقطار ولایتلریده امنیتی کوچلر و طالبان جنگریلری آرهسیده شدتلی آتیشمهلر یوز بیرگن. محلی منبعلرنینگ ایتیشلریچه، طالبان جنگریلری بیرقطار منطقهلرنی تصرف قیلگنلر.
کابل بوییچه آمریکا ایلچیخانهسی، اوتگن کون بیر اعلامیه آرقهلی طالبان تامانیدن زوروانلیکلر کوپهیگنی توغریسیده خواطر بیلدیریب و ایتیشیچه، یالغیز اوتگن ۱۲ ییل ده مملکتده ۳۸ مینگ تینچاهالی هلاک ایتیلگن. اعلامیهده کیلیشیچه، دنیا افغانستان ده تحمیلی بیر تیزیم نی ایستمهیدی.
تخار ولایتیدن آتی فاش ایتیلیشی نی ایستمهگن امنیتی بیر منبع نینگ سلاموطندارگه ایتیشیچه، اوتگن کیچه بو ولایت رستاق تومنی نینگ «دیوار تنگ» منطقهسیده، طالبان هجومی باعث چیگره کندک قومندانی شامل ۷ حربی هلاک و بو حربیلردن باشقه ۱۲ تهسی ایسه تن جراحتی کوتارگن.
کمیده ایکی هفتهدن بویان طالبان گروهی بغلان-قندوز، بغلان-کابل و بغلان-سمنگان قتناو یوللریده چیکپاینت ایجاد قیلیب یولاوچیلرنی تیکشیرهدی. بغلان مرکزی پلخمری شهری یشاوچیلری نینگ بو وضعیتدن خواطر بیلدیریب ایتیشیچه، اوشبو قتناو یوللر کوپ زمانلر اوروش بولگنی سبب، یاپیق دیر و طالبان گروهی چیکپاینت ایجاد قیلیب دولت و حربی ایشلاوچیلرنی تیکشیرهدی.
آمریکا مدافعه وزیرلیگی نینگ اعلام قیلیشیچه، آمریکالیک حربیلرنینگ افغانستان دن بوتونلی چیقیشی یقیین بولگن بیرحالده، زوروانلیکلر کوپهیگن و بو مملکت وضعیتی خواطرلی دیر. اوشبو وزیرلیک طالبان گروهیدن زوروانلیکلرنی کمهیتیریب و مذاکره میزی گه حاضر بولیشلرینی سورهگن.
ملی مصالحه عالی کینگش باشلیغی نینگ ایتیشیچه، طالبان حربی یولدن افغانستان ده غالب چیقیش خصوصیده قیلگن سعی و حرکتی، مملکتده اوروش دوام تاپیشی گه سبب بولگن. جناب عبدالله نینگ کوپهیتیریشیچه، طالبان نینگ چیتایللیک کوچلر چیققنیدن کیین، مملکت نی نظارت گه آلیش توغریسیدگی محاسبهسی ناتوغری دیر.
سونگی آیلرده طالبان نینگ هجومی شدتلنگنی و امنیتی کوچلرنینگ مقاومت قیلمهیشی سبب، کوپقطار تومنلر اوشبو گروه قولیگه سقوط قیلگن. حکومت مسووللری نینگ ایتیشلریچه، طالبان گروهی تومنلرنی تصرف قیلگنیدن سونگ، تومن بنالری و باشقه عامه تاسیساتلرنی پارتلهتیب و حتا ملکی ساحهلر و تینچ اهالی اویلرینی تخریب قیلیشگه اقدام قیلهدیلر.
