کابل بوییچه آمریکا ایلچی‌خانه‌سی سرپرستی راس ویلسن نینگ ایتیشیچه، بیرقطار تومن‌لردن طالبان گروهی نینگ میدیالر اوستیگه قیلگن هجوم‌لریدن نشر ایتیلگن گزارش‌لر خواطرلنترووچی دیر. راس ویلسن اوشبو مطلب‌نی بوگون “جمعه” توییتر صحیفه‌سیده یازگن. اونینگ ایتیشیچه، طالبان نظارتی‌گه اوتگن تومن‌لرده اوشبو گروه جنگریلری نینگ محلی میدیالر اوستیگه قیلگن هجوم‌لری خواطرلنترووچی دیر.
جناب ویلسن نینگ ایتیشیچه، طالبان گروهی میدیالرنی اوچیریش بیلن زوروانلیکلرنی یاشیریش‌نی ایسته یدی. اونینگ یازیشیچه: «کورینیشیچه، طالبان گروهی میدیالر سیس‌لرینی اوچیریش بیلن عامه تاسیسات‌لرنی تخریب قیلیش، غارت و تینچ اهالی‌نی اولدیریش‌لری خصوصیده بولگن گزارش‌لر نشر ایتیلمه‌یشینی ایسته‌یدی.»
کابل بوییچه آمریکا ایلچی‌خانه‌سی بوندن آلدین هم طالبان گروهی دن زوروانلیک‌نی کمه‌یتیریب تینچلیک سوزلشوولرده تیار بولیشی‌نی سوره‌گن ایدی.
طالبان گروهی سونگی پیت‌لرده هجوم‌لرینی شدت‌لنتیرگن و اونلرچه تومن‌نی تصرف قیلگن‌لر. گزارشلرگه کوره، بیرقطار تومن‌لرده محلی میدیالر فعالیت‌لرینی توخته‌تیلگن.
ایتیلیشیچه، طالبان گروهی بلخ ولایتی نینگ بلخ تومنیده محلی بیر رادیونی تصرف قیلیب و اونینگ آنتن‌لریدن اوز منفعت‌لریگه فایده‌لنگن دیر.
