بیرقطار گزارش‌لرگه کوره، اوتگن ۲۴ ساعت جریانیده بدخشان ولایتی نینگ کشم، وردوج، درایم، یفتل پایین، تیشکان و شهربزرگ تومن‌لری و تخار ولایتی نینگ کلفگان تومنی طالبان قولی‌گه سقوط قیلگن.
بدخشان ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، اوشبو تومن‌لرده جایلشگن امنیتی کوچلردن بیرقطاری طالبان گروهی‌گه تسلیم بولگن و باشقه بیرقطاری ایسه بدخشان مرکزی و قوشنی تومن‌لرده جایلشگن‌لر.
منبع نینگ کوپه‌یتیریشیچه، بدخشان ولایتی نینگ راغستان تومنیده امنیتی کوچلردن کمیده ۱۰۰ ته‌سی طالبان قمراویگه قرار تاپگن.
طالبان سوزلاوچیسی ذبیح‌الله مجاهد، امنیتی کوچلرنینگ قمراوگه قرار تاپگنی و تسلیم بولگنی خصوصیده فکر بیلدیرمه‌گن، لیکن توییتر صحیفه‌سیده یازیشیچه، بدخشان ولایتی نینگ بیرقطار تومن‌لری بوتون حربی تجهیزات‌لری بیلن اوشبو گروه قولی‌گه توشگن.
باشقه تاماندن تخار ولایتیدن قولگه کیلگن معلومات‌لرگه کوره، بو ولایت نینگ کلفگان تومنی طالبان نظارتی‌گه اوتگن.
اوشبو ولایت یشاوچی‌لری حکومت نینگ دقت‌سیزلیگی دن تنقید قیلیب و امنیتی وضعیت یمان بولگنیدن خواطر بیلدیرگنلر.
تخار مدنی فعال‌لریدن بیری محراب‌الدین سیزر نینگ ایتیشیچه، بو ولایت نینگ ۱۳ تومنی طالبان قولی‌گه سقوط قیلگن و حکومت دقت قیلمه‌گن صورتده، تخار ولایتی‌نی کامل صورتده طالبان قولی‌گه سقوط قیلیشی ممکن.
بیراق، تخار حاکمی سوزلاوچیسی حامد مبارز، بیرقطار تومن‌لر قیته‌دن آلینیشی و امنیتی وضعیت یخشی‌لنگنیدن خبر بیرگن.
بوتوغریده امنیتی نهادلر فکرینی آلیش اوچون سعی و حرکت قیلدیک، لیکن موفق بولمه‌دیک.
ایتیلیشیچه، سونگی پیت‌لرده مملکت شمالی ولایت‌لریده طالبان نینگ هجومی شدت‌لنگن و نتیجه‌ده کوپ قطار تومن‌لر اوشبو گروه نظارتی‌گه اوتیب و مینگ‌لرچه عایله آواره بولگن.
