تخار ولایتیدن امنیتی بیر منبع نینگ کیم‌لیگی سیرقالیش‌نی ایسته‌ب سلام‌وطندارگه ایتیشیچه، کوکچه اطرافیده‌گی تومن‌لردن کوپ‌قطار حربی کوچلر رستاق تومنیده جایلشگن ایدیلر و اوشبو کوچلرنی هیچ‌قنده‌ی قیین‌چیلیکلری یوق ایدی. منبع نینگ ایتیشیچه، امنیتی کوچلرگه اوروش روحیه‌سی بولمه‌گنی و مردمی کوچلر قومندانلری آره‌سیده جنجل‌لر بولگنی سبب، رستاق تومنی طالبان قولیگه سقوط قیلگن.
عین‌حالده، رستاق یشاوچی‌لریدن بیرقطاری نینگ ایتیش‌لریچه، مردمی کوچلر قومندانلری آره‌سیده جنجل‌لر بولگنی سبب، بو تومن طالبان قولیگه سقوط قیلگن.
اولرنینگ ایتیش‌لریچه، مردمی کوچلر قومندانی پیرم‌قل ضیایی نینگ اوغلی و سیدرضا یوسفی آره‌سیده جنجل‌لر بولگنی باعث، رستاق تومنی طالبان‌گه تاپشیریلگن.
اولرنینگ کوپه‌یتیریشیچه، ایکی تامان قرشی طرف‌نی ناکام کورسه‌تیش اوچون طالبان‌گه رستاق تومنی‌گه کیریش اوچون رخصت بیرگن.
شونینگدیک، نماینده‌لر کینگشی عضوی نظیفه یوسفی بیگ، تخار محلی مسوول‌لری و مرکزی حکومت نی رستاق تومنی نینگ طالبان قولیگه سقوط قیلیشی خصوصیده بی‌فرق یانده‌شگنیدن تنقید قیله‌دی.
نظیفه یوسفی بیگ نینگ ایتییشچه: «محلی و مرکزی حکومت نینگ دقت‌سیزلیگی سبب، رستاق تومنی سقوط قیلگن؛ تخار نینگ ۱۶ تومنیدن یالغیز ۳ تومن نینگ مرکزی دولت قولیگه قالگن. رستاق تومنی‌گه دقت بولمه‌گن صورتده، تالقان و بدخشان ولایتی‌نی جدی خطر تهدید قیله‌دی.»
رستاق تومنی نینگ طالبان گروهی‌گه تاپشیریلیشی خصوصیده تخار محلی مسوول‌لری فکرینی آلیش اوچون سعی و حرکت قیلدیک، لیکن موفق بولمه‌دیک.
