عایله‌لری‌نینگ احتیاج‌لرینی تأمینلش مسئولیتینی زمه‌سیگه آلگن ایریم یاشلر بو مسئولیت اولرنی تعلیم آلیش امکانیت‌لریدن، اوزلری یاقتیرگن کسب‌ده ایشلشدن و یاشلیک دوری‌نینگ لذت‌لریدن محروم قیلگنینی ایته‌دیلر.
سلام‌وطندار، اوشبو گزارش‌ده تورلی ولایت‌لرده یشاوچی ۳۱ نفر یاش، جمله‌دن ۱۳ نفر ییگیت و ۱۸ نفر قیز بیلن صحبتلشگن. اولرنینگ ۱۰ نفری عایله‌ده‌گی تونغیچ (کتته) فرزند بولگنی، ۱۴ نفری عایله‌نینگ یگانه باقووچیسی ایکنی و اوچ نفری ایسه عایله‌ده باشلیق یوقلیگی سببلی عایله‌لری‌نینگ احتیاج‌لرینی تأمینلش مسئولیتینی اوز زمه‌سیگه آلگن. اوشبو گزارش‌ده صحبت‌لشیلگن ۱۹ یاشدن ۳۰ یاشگچه بولگن یاشلرنینگ هر بیری ایکی ییلدن ۱۵ ییلگچه اوز عایله‌سی‌نینگ احتیاج‌لرینی تأمینلب کیلگن.
کابل‌دن بولگن ۲۱ یاشلی محمدادریس عالمی، بیش ییلدن بویان عایله‌سی‌نینگ کونده‌لیک احتیاج‌لرینی تأمینلب کیله‌یاتگنینی و بو مسسولیت اونی یاشلیک دنیاسیدن اوزاقلشتیرگنینی ایته‌دی. او شونده‌ی دییدی: «بیر آی‌لیک اوی اجاره‌سی، آزیق-آوقت و کونده‌لیک یشش خره‌جت‌لرینی قاپلشیم کیره‌ک. بو مسئولیت‌نی اوز زممگه آلگنمن، چونکه اوی‌ده ایرکک جنسیگه منسوب باشقه هیچ کیم یوق.»
کابل‌نینگ ینه بیر یشاوچیسی، عایله‌نینگ تونغیچ فرزندی بولگن ۲۱ یاشلی محمدعمران ولی‌زاده، بیر نیچه ییلدن بویان عایله‌سی‌نینگ خره‌جت‌لرینی قاپلش مسئولیتینی زمه‌سیگه آلگنینی ایته‌دی. او شونده‌ی دییدی: «حاضر عایله‌م‌نینگ یشش خره‌جت‌لری و ضرور احتیاج‌لرینی تأمینلشده اساسی اولوش‌نی مین اوز زممگه آلگن من. آته‌مدن کیینگی برچه مسئولیت می‌نینگ ییلکمده.»
اوشبو گزارش‌ده صحبت‌لشیلگن ۳۱ نفر یاشدن ۲۰ نفری عایله‌سی‌نینگ کونده‌لیک احتیاج‌لرینی تأمینلش سببلی اوقیشینی دوام ایتیره آلمه‌گنینی ایتگن. ینه ۱۱ نفری ایسه زمه‌سیده‌گی اوشبو مسئولیت طفیلی اوز مقصدلریگه ایریشیشدن واز کیچیشگه مجبور بولگنینی بیلدیرگن.
۲۷ یاشلی طیبه رضاییان‌نینگ ایتیشیچه، او عایله‌سی اوچون یخشی‌راق یشش شرایط‌لرینی یره‌تیش مقصدیده اوز آرزولریدن واز کیچگن. حاضرده او آنلاین ایش آرقه‌لی اوزی‌نینگ و عایله‌سی‌نینگ تیریکچیلیگینی تأمینله‌یدی. اونینگ کوپه‌یتیریشیچه: «کوپراق اویشنی و اوزیم‌نینگ روحی حالتیمگه هم اعتبار بیریشنی ایستردیم. لیکن بونی عهده‌لی آلمه‌دیم. اوزیم اوچون یاقتیرگن نرسه‌لریمنی ساتیب آلماقچی بولردیم، بیراق بونینگ علاجی یوق ایدی، چونکه سوو وبرق تولاولری، شونینگدیک، ییغیب قوییشیم کیره‌ک بولگن اوی اجاره‌سی حقیده اویله‌شیمگه توغری کیلردی. آزیق-آوقت، اوشه یاشیمده قیزیققن نرسه‌لریمگه وقت اجره‌ته آلمه‌دیم.»
۲۳ یاشلی سحر ملک‌زاده هم، عایله‌سی‌نینگ احتیاج‌لرینی تأمینلش یولیده اوز ایستک‌لرینی قربان قیلگنینی و بو مسئولیت‌نی زمه‌سیگه آلیش حاضر اونده عاجزلیک حسینی اویغاته‌یاتگنینی ایته‌دی. او شونده‌ی دییدی: «اگر عایله‌م‌نینگ مسئولیتی می‌نینگ زممده بولمه‌گنیده، احتمال اوزیمنی بونچه‌لیک ضعیف، عاجز و قوت‌سیز حس قیلمسدیم، حتا بعضی پیت‌لرده امیدسیزلیککه هم توشمسدیم. بلکه کیله‌جکه نسبتن امیدیم کوپراق بولردی.»
گزارش‌ده صحبت قیلگن یاشلرنینگ ایتیشیچه، درآمد کمه‌یب کیتیشی، ایشینی قولدن بیریش و عایله‌سی‌نینگ احتیاج‌لرینی تأمینله‌ی آلمه‌ی قالیش قورقووی اولر باشدن کیچیره‌یاتگن باشقه باسیملردن دیر.
۲۰ یاشلی بکتاش مهمند، ییتی ییلدن بویان عایله‌سی‌نینگ باقووچیسی حسابلنه‌دی. اونینگ ایتیشیچه، بعضاً درآمدی کمه‌یب کیتیشی یا کی ایشینی یوقاتیشی حقیده‌گی قورقوو عایله‌سی‌نینگ احتیاج‌لرینی تأمینلش باره‌سیده‌گی خواطرلرینی ینه‌ده کوچه‌یتیره‌دی. اونینگ کوپه‌یتیریشیچه: «اینگ کتته خواطریم شو که، اگر بیر کونی درآمدیم کمه‌یب قالسه، عایله‌م‌نینگ خره‌جت‌لرینی قنده‌ی قاپله‌ی آله‌من؟ بو مسئله دایما خیالیمده.»
۱۹ یاشلی درمان هم شونده‌ی دییدی: «اینگ کتته یا که خواطر عایله‌م تامانیدن بوله‌دی، چونکه عایله‌نینگ خره‌جت‌لرینی قاپلشیم کیره‌ک.»
گزارش‌ده صحبت قیلگنلرنینگ ایریملری عایله‌نینگ احتیاج‌لرینی تأمینلش باشقه قیینچیلیک‌لردن تشقری، اولرنی دم آلیش و هاردیق چیقریش امکانیتیدن هم محروم قیلگنینی ایتگن.
۱۲ ییلدن بیری اوقیتووچیلیک بیلن شغللنیب کیله‌یاتگن عفت احمدی، حیات تشویش‌لری بیلن بند بولیش اونگه دم آلیش و کونگیل یازیش اوچون امکان قالدیرمه‌گنینی ایته‌دی. او شونده‌ی دییدی: «وقتیم‌نینگ کتته قسمی ایش، درس بیریش و عایله‌وی مسئولیتلر اورته‌سیده تقسیم‌لنه‌دی. ایش توگه‌گنیدن کیین هم خره‌جت‌لر و عایله‌م‌نینگ احتیاج‌لری حقیده اویلر دوام ایته‌دی. بعضاً ایرتنگی کون خره‌جت‌لریدن خواطر آلمسدن، فقط اوزیم اوچون بیر کون اجره‌تیشنی، بیرآز دم آلیشنی، دوست‌لریم بیلن وقت اوتکزیشنی یا که شونچه که خاطر جمع اوتیریشنی ایسته‌یمن.»
ییتکرمه‌لردن بیریده ایشله‌یدیگن ۲۷ یاشلی فرحناز احمدی شونده‌ی دییدی: «بلکه دم آلیش اوچون آزگینه وقتیم باردیر، لیکن خیالیم تینچ ایمس. بعضاً دوست‌لریم مینی کونگیل یازیشگه تکلیف قیلیشه‌دی، بیراق بندلیگیم یا که مالیه‌وی چیکلاولر سببلی اولر بیلن کوپراق بیرگه بوله آلمه‌یمن.»
عایله‌وی مسئولیت یوکینی کوتریش و بای بیریلگن امکانیت‌لردن فایده‌لنیش اوشبو یاشلرده اوزلرینی مدتیدن آلدین اولغه‌یگندیک حس قیلیش تویغوسینی یوزه گه کیلتیرگن.
۲۶ یاشلی روینا، حیات قیینچیلیک‌لری سببلی اوزی‌نینگ حقیقی یاشیدن کتته‌راق کورینیشینی ایته‌دی. او تیکووچیلیک آرقه‌لی عایله‌سی‌نینگ احتیاج‌لرینی تأمینله‌یدی. او شونده‌ی دییدی: «اوزیمنی ۳۷ یاشده دیب حس قیله‌من. آیینه گه قره‌گنیمده حیات‌نینگ عینی شو شرایط‌لری مینی بوتونلی باشقه آدمگه ایلنتیرگنینی کوره‌من. حیات باسیمی یوز-کورینیشیم و تنه‌مگه قنچه‌لیک تأثیر قیلگنینی سیزه‌من.»
۲۱ یاشلی ابوبکر صدیقی حیات مسئولیتلرینی زمه‌سیگه آلیش قوللری و یوز تیریسیگه سلبی تأثیر کورستگنینی ایته‌دی. او شونده‌ی دییدی: «عایله‌م آلدیده‌گی مسئولیت طفیلی ساچ‌لریم‌نینگ بیر نیچته تاله‌سی آقردی. اوزیمچه اویله‌یمن باشیمدن کیچیرگنلریمنی حساب گه آلسم، یاشیم ۳۵ یا که ۴۰ ده بولیشی کیره‌ک. چونکه بولرنینگ برچه‌سینی باشدن کیچیریش می‌نینگ زممده‌گی مجبوریت ایمس ایدی.»
شونگه قره‌می، ایریم روان‌شناسلرنینگ ایتیشیچه، عایله‌وی مسئولیت‌نی بونگه تیار بولمه‌گن شرایط‌ده زمه‌سیگه آلیش انسان سلامت‌لیگیگه سلبی عاقبت‌لر کیلتیریب چیقریشی ممکن.
روان‌شناس واصل‌شاه ابراهیمی، اوز ایستک‌لرینی اعتبارسیز قالدیریش و تورلی مسئولیتلرنی زمه‌سیگه آلیش اوزیگه بولگن ایشانچ‌نینگ پسه‌یشی، توشکونلیکه توشیش و قورقوو بیلن یوزلشیش کبی عاقبت‌لر گه آلیب کیلیشی ممکن‌لیگینی ایته‌دی. اونینگ کوپه‌یتیریشیچه: «عایله‌وی مسئولیت‌نی زمه‌سیگه آلگن یاشلرده معلوم درجه‌ده آدملردن ییراقلشیش حالتی کوزه‌تیلیشی ممکن. چونکه اولرنینگ هاردیق چیقریش، تعلیم آلیش و باشقه‌لر بیلن ملاقات قیلیش امکانیت‌لری کمیه‌دی. بو حالت ایسه اوزلریگه بولگن ایشانچ‌نینگ پسه‌یشیگه آلیب کیله‌دی، چونکه اولر اوزلرینی قابلیت‌سیزدیک حس قیله‌دیلر و اوز مقصدلریگه ایریشیش اوچون ییترلیچه اعتبار قره‌ته آلمه‌یدیلر.»
شو بیلن بیرگه، اسلام امیرلیگی ایش و اجتماعی ایشلر وزیرلیگی‌نینگ اخبارات و نشرات بولیمی باشلیغی محمدصدیق‌نینگ ایتیشیچه، اوشبو وزیرلیک یاشلر گه کسب-هنر اورگه‌نیش امکانیت‌لرینی یره‌تیب بیره‌دی. او شونده‌ی دییدی: «ایش و اجتماعی ایشلر وزیرلیگی عایله اعضالری‌نینگ خره‌جت‌لرینی تأمینلش مسئولیتینی زمه‌سیگه آلگن یاشلر گه کسب-هنر اورگه‌نیش امکانیت‌لرینی یره‌تیشنی اوز وظیفه‌سی دیب بیله‌دی. شونینگدیک اولر گه کسب-هنر تعلیمی اوچون شرایط یره‌تیش‌نینگ اهمیتی حقیده توشونتیریش ایشلری آلیب باریله‌دی.»
افغانستان‌ده‌گی ایریم یاشلر کمبغل‌لیک، عایله باقووچیسیدن ایریلیش و اقتصادی قره‌ملیک سببلی تعلیمدن همده اوز ایستک‌لریگه ایریشیشدن واز کیچیش گه، عایله‌لری‌نینگ کونده‌لیک احتیاج‌لرینی تأمینلش اوچون ایش بازاریگه کیریشگه مجبور بولگن.
