بغلان ولایتی مرکزی پلخمری شهری یوللریده‌گی ترانسپورت تیربندلیگی (ترافیک گوجوملیگی) و ترتیب‌سیزلیکلر یشاوچیلرنینگ کونده‌لیک حیاتینی قیینلشتیرگن. هیداوچیلر یاقیلغی مصرف‌نینگ آرتیشی و یوللرنینگ تیربند بولیشیدن، یشاوچیلر ایش جایی و مکتب گه کیچیکیب ییتیب باریشدن، دکاندارلر ایسه خریدارلر قتناوی‌نینگ کمه‌یشیدن شکایت قیله‌دیلر.
شهر اهالیسی و ترانسپورت واسطه‌لری سانی‌نینگ آرتیشی بیلن ترانسپورت تیربندلیگی پلخمری اهالیسی کونده‌لیک حیاتی‌نینگ بیر قسمیگه ایلنگن. بو حالت نه‌فقط وقت‌نینگ بیهوده صرفلنیشی و خره‌جت‌لرنینگ آشیشیگه سبب بولگن، بلکه فقرالرنینگ حیات صفتیگه هم سلبی تأثیر کورستگن.
پلخمری شهریده تاکسی هیداوچیسی بولیب ایشله‌یدیگن محمدنبی صدیقی‌نینگ ایتیشیچه، ترانسپورت تیربندلیگی‌نینگ کوچه‌یشی اونینگ ایشی و درآمدی گه سلبی تأثیر کورستگن. او شونده‌ی دییدی: «تیربندلیک ایشیمیزنی قیینلشتیریب یوباردی. ایلگری بیر کونده ۱۲-۱۵ مرته یولاوچی تشیردیم، اما حاضر یوللرنینگ تیربندلیگی سببلی قتناولر سانی کمه‌یگن و ساعت‌لب تیربندلیکده قالیب کیته‌میز.»
پلخمری شهریده‌گی ینه بیر هیداوچی نجیب‌الله هم، ترانسپورت تیربندلیگی سببلی موترلرنینگ یاقیلغی مصرفی آشه‌یاتگنیدن شکایت قیله‌دی. اونینگ ایتیشیچه، ترانسپورت واسطه‌لری‌نینگ ناتوغری جایلرده توخته‌ب توریشی و سوداگرلرنینگ یول چیت‌لریده فعالیت یوریتیشی تیربندلیکنی کیلتیریب چیقروچی عامللردن حسابلنه‌دی. او شونده‌ی دییدی: «اینگ کتته معما ترانسپورت تیربندلیگی. موتر توخته‌تیش اوچون عموماً مولجللنگن جایلرده ترانسپورت واسطه‌لرینی توخته‌تیب قوییشه‌دی و نتیجه‌ده تیربندلیک یوزه گه کیله‌دی.»
پلخمری‌نینگ ینه بیر هیداوچیسی محمدباقر عثمانی ایسه، یول حرکتی قاعده‌لریگه رعایه قیلمسلیک‌نی تیربندلیک سبب‌لریدن بیری دیب حسابله‌یدی. او شونده‌ی دییدی: «هیده‌ش پیتیده بیز اوچون اینگ کتته معمالردن بیری – اون رولده باشقریله‌دیگن موترلر همده خارج‌دن یقینده قیتیب کیلگن یا که یول حرکتی قاعده‌لرینی یخشی بیلمه‌یدیگن وطنداشلریمیز دیر.»
باشقه تاماندن، پلخمری شهری‌نینگ ایریم اهالیسی کوچلی ترانسپورت تیربندلیگی منزل گه اوز وقتیده ییتیب باریشلریگه توسقینلیک قیله‌یاتگنی و کونده‌لیک ریجه‌لرینی بوزه‌یاتگنینی ایته‌دیلر.
پلخمری یشاوچیلریدن بولگن محمدشریف‌نینگ ایتیشیچه، ترانسپورت تیربندلیگی طفیلی او کونده‌لیک ایشلرینی اوز وقتیده بجره آلمه‌یدی. اونگه کوره: «وقتی‌میز بیهوده کیته‌دی. باله‌لریمیزنی مکتب یا که مدرسه گه آلیب باره‌یاتگنیمیزده یا که اوزیمیز یولگه چیققنی‌میزده تیربندلیککه دوچ کیله‌میز. بو تیربندلیک کیچیشی‌میز گه سبب بوله‌دی و مکتب یا که مدرسه‌ده بیلگی‌لنگن ریجه‌لریمیز گه اوز وقتیده ییتیب باره آلمه‌یمیز.»
پلخمری‌ده ترانسپورت تیربندلیگی دکاندارلرنینگ اقتصادی فعالیتیگه هم تأثیر کورستگن. ایریم دکاندارلرنینگ ایتیشیچه، یوللرنینگ تیربند بولیشی و فقرالر قتناوی‌نینگ کمه‌یشی سودا حجمی‌نینگ پسه‌یشیگه آلیب کیلگن.
پلخمری شهریده دکاندارلردن بولگن محمدخالد شونده‌ی دییدی: «تیربندلیک ایشیمیز گه کتته تأثیر کورسته‌دی. یوللر تیربند بولیب، قتناو توخته‌ب قالگنیده، خریدارلر دکانیمیز گه کیلیب، خرید قیله آلمه‌یدی. نتیجه‌ده سودامیز سُستلشه‌دی. بیراق تیربندلیک بولمسه و یوللر آچیق بولسه، خریدارلر دکانیمیز گه بی‌ملال کیله‌دی و سودا حجمی‌میز آشه‌دی.»
عینی‌پیتده، پلخمری بلدیه‌سی مطبوعات بولیمی مسئولی فواد هوتک، اوشبو شهرده «پاسو» رسوملی موترلر سانی‌نینگ کوپه‌یشی، تیگیشلی حجت‌لرسیز ترانسپورت واسطه‌لری‌نینگ حرکت‌لنیشی، سوداگرلر، قول اوستیده سودا ساتووچیلر و اروه‌کشلرنینگ ترتیب‌سیز فعالیت یوریتیشینی ترانسپورت تیربندلیگی‌نینگ اساسی سبب‌لریدن دیب حسابله‌یدی. او شونده‌ی دییدی: «پلخمری بلدیه‌سی رهبریتی بازارلرنی ترتیب گه سالیش و شهر انتظامینی تأمینلش باشقرمه‌سی آرقه‌لی شهرده‌گی تیربند نقطه‌لر همده ترانسپورت گوجوملیگینی برطرف ایتیش بوییچه عملی ریجه‌لرنی ایشلب چیققن. اوشبو ریجه‌لر عملده بجریله باشله‌گن بولیب، تیربندلیکنی کمه‌یتیریش و شهر ترتیبینی یخشی‌لش مقصدیده یول چیتیده اوتیریب سودا قیلووچیلر، اروه‌چیلر فعالیتینی ترتیب گه سالیشنی اوز ایچیگه آله‌دی.»
باشقه تاماندن، بغلان ولایتی ترانسپورت حرکتینی ترتیب گه سالیش بولیمی باشلیغی احمدالله احمدی شینواری، تیربندلیکنی کوچه‌یتیره‌دیگن ترانسپورت واسطه‌لری‌نینگ شهر گه کیریشی‌نینگ آلدینی آلیش اوچون شهرنینگ تورت تامانیده نظارت-اوتکزیش چک‌پاینت‌لری تشکیل ایتیلگنینی بیلدیره‌دی.
شونگه قره‌می، طلب گه جواب بیره‌دیگن یوللرنینگ آزلیگی، ترانسپورت واسطه‌لری سانی‌نینگ آرتیشی، مناسب پارکینگ‌لرنینگ یوقلیگی، یول حرکتی قاعده‌لریگه رعایه قیلینمسلیگی و نظارت امکانیت‌لری‌نینگ چیکلنگن‌لیگی افغانستان شهرلریده ترانسپورت تیربندلیگینی کوچه‌یتیره‌یاتگن اساسی عامللر سیره‌سیگه کیره‌دی.
