پروان، کاپیسا و پنجشیر، کابل شمالیدهگی اوچ ولایت بولیب، موترلر کوپ قتنهشی و سیاحلیک جاذبهلری بولگنی سببلی، هر کونی افغانستان بویلب یوزلرچه سیاحدن میزبانلیک قیلیشهدی. بیراق بو ولایتلر حاضرگچه زمانهوی هوتللر و تورر جایلر یوقلیگی بیلن دوچ دیر.
یشاوچیلردن بیرقطاری، بو اوچ ولایت مرکزلریده، عایله اعضالری دم آلیش اوچون مناسب و تینچ جای یوقلیگینی ایتیشهدی.
پنجشیر یشاوچیسی احمدسیر گه کوره، زمانهوی جهازلر بیلن تأمینلنگن هوتللر، محلی بازارلرنینگ رونق تاپیشیگه سبب بولهدی. او شوندهی دییدی: «افسوس بیلن پنجشیرده ستندرد شکلده توزهلگن جای یوق، ولایتده ملی و خلقارا معیارلر گه تینگ تورر جای بولسه ایچکی و تشقی سیاحتچیلرنی ترغیب قیلیش اوچون مثبت تأثیری بار.»
شو بیلن بیرگه، کاپیسالیک احمد نوید، ایچکی و خارجی سیاحتچیلر اوچون هوتل و مناسب جای یوقلیگیدن تشویش بیلدیریب شوندهی دییدی: «سیاحلر کوپراق باستانی جایلرنی کورگنی کیلهدی شونینگ اوچون ستندرد هوتللر بولیشی درکار، افسوس بیلن بوندهی نرسه کاپیسا ده یوق، اقتصاد ایلنیشی سیاحلرنینگ کیلیشیگه باغلیق، شونگه اوخشش باشقه نرسه، کاپیساده زمانهوی بیر مهمانخانه قوریلیشینی سورهیمیز.»
شونینگدیک، پروان یشاوچیسی امرالله محمدینینگ ایتیشیچه، بو ولایتده سیاحتچیلرنی کوتیب آلیش اوچون مناسب جای یوقلیگی، اولرنینگ قالیشیگه و پروان کیلیشیگه بولگن قیزیقیشنی کمهیتیرهدی.
اونینگ ایتیشیچه: «بوندهی جای یوقلیگی، اهالینینگ قیزیقمسلیگی و تیز اوتیب کیتیشلریگه سبب بولهدی، مسئوللر دقت قیلسینلر ایچکی و تشقی سیاحلر اوچون زمانهوی جای و مهمانخانه قورسینلر. بوندهی ایش اقتصاد همده مدنیت ترقیاتی آلیب کیلهدی.»
سیاحتچیلیک ساحهسیده بیلرمانلر، پروان، پنجشیر و کاپیسا ولایتلریده ستندرد هوتللر و مهمانخانهلر قوریلیشی، یشاوچیلر گه آسانلیک کیلتیریش یانیده، ایش زمینهسی یرهتیلیشی، شهر درآمدی آشیشی و تجارتی فعالیتلر کوپهیشیگه سبب بولیشینی معلوم قیلهدیلر.
سیاحتچیلیک و باستانشناس ساحهسیده بیلرمان فرهاد شمال شوندهی دییدی: «هر ییلی کوپ سانده ایچکی و تشقی سیاحلرنینگ کیلیش گواهیمیز، افسوس بیلن زمانهوی شکلده قوریلگن جای یا کی هوتل آز – تشقی سیاحلرنینگ امنیتینی تأمین قیلسه. بو اوچ ولایتده افسوس بیلن بوندهی نرسهلرنی کم اوچرهتهسیز، بولسه هم ستندرد ایمس.»
پنجشیر حاکمی سوزلاوچیسی سیفالدین لتون و کاپیسا حاکمی سوزلاوچیسی عبدالعزیز نظری، اوشبو ولایتلرده ایچکی و تشقی سیاحتچیلرنی کوتیب آلیش اوچون مناسب جای یوقلیگینی تصدیقلسهلرده، بیراق شهر بلدیهلری زمانهوی هوتللرنی قورماقدهلیکلرینی ایتیشهدی.
سیفالدین لتون شوندهی دییدی: «پنجشیرده سیاحلرنینگ کیچه قالیشی اوچون تورر جایی یوق ایدی حاضر قوریلگن بیراق ییترلی ایمس، پنجشیر مرکزی پارک استدیومی یقینیده بلدیه ریاستی تامانیدن بیر مهمانخانه و بیر پارک قوریلماقده و ایشی حاضرگچه توگهگنی یوق.»
شونینگدیک، کاپیسا حاکمی سوزلاوچیسی عبدالعزیز نظری هم شوندهی دییدی: «محمودراقی بلدیهسی ایچکی و تشقی سیاحتچیلرنینگ قیینیچلیکلری حل ایتیلیشی اوچون بو ولایت صیاد حدودلریده زمانهوی بیر هوتل و مهمانخانه ایشینی باشلهگن، بو لایحهنینگ جمعی خرهجتی ۸۰ میلیون افغانی، اوشبو مهمانخانه برچه امکانیتلر بیلن تأمینلنیب و ویآیپی اتاقلر گه ایگه.»
پنجشیر و کاپیسا سیاحلیک جاذبهلری و پروان ایسه ترانزیتی ولایت صفتیده، کوپلب اهالینی اوزیگه جلب قیلیشی ممکن؛ عایلهلر اوچون دم آلیشگه ماس جایلرنینگ قوریلیشی ایسه بو ساحهنینگ رواجلنیشیگه تورتکی بوله آلهدی.
