اسلام امیرلیگی باش وزیری‌نینگ اداری اورین باسری مولوی عبدالسلام حنفی، بیرلشگن ملتلر تشکیلاتی باش کاتبی‌نینگ افغانستان اوچون مخصوص وکیلی و یوناما باشلیغی رباب فاطمه بیلن اوچره‌شدی. اوچره‌شووده رواجلنیش لایحه‌لری، دهقانلر اوچون بدیل ایکین همده وطنی گه قیتگنلرنینگ احوالینی یخشی‌لش مسئله‌لری حقیده بحث ایتگن.
اسلام امیرلیگی سوزلاوچیسی‌نینگ اورین باسری حمدالله فطرت، بوگون (۱۸ عقرب/۹ نومبر، دوشنبه) ترقه‌تگن خبریده تامانلر اوتگن کونی عصر پیتی اوچره‌شگنینی معلوم قیلگن.
بیانیه گه کوره، یوناما باشلیغی افغانستان‌ده آلیب باریله‌یاتگن رواجلنیش لایحه‌لر گه توخته‌ب، اسلام امیرلیگیدن اقتصادی ترقیات و مملکت‌نی آباد ایتیش اوچون سعی-حرکتلریگه دوام ایتتیریش‌لرینی سوره‌گن.
رباب فاطمه شونینگدیک، بیرلشگن ملتلر تشکیلاتی افغانستان فقرالریگه انسان‌سیورلیک یاردمینی موافقلشتیریش بیلن بیر قطارده، تورلی ساحه‌لرده‌گی همکارلیکنی کینگه‌یتیریشگه هم حرکت قیله‌یاتگنینی ایتگن.
یوناما باشلیغی‌نینگ ایتیشیچه، دهقانلر اوچون مقابل تیریکچیلیک منبعلرینی یره‌تیش، ایش اورینلرینی تشکیل ایتیش و وطنی گه قیتگنلر گه یاردم ترقه‌تیش بیرلشگن ملتلر تشکیلاتی همکارلیکنی دوام ایتتیره‌یاتگن یونه‌لیشلر جمله‌سیدن دیر
شو بیلن بیرگه، اسلام امیرلیگی باش وزیری‌نینگ اداری اورین باسری، افغانستان گه سکیز میلیون نفردن آرتیق کیشی قیتگنینی تأکیدلب، مسئول تشکیلاتلر قیتیب کیلگنلرنینگ حقوقلرینی حمایه قیلیش، اولر اوچون ایش امکانیت‌لرینی یره‌تیش و باش‌پنه قوریش باره‌سیده سعی-حرکت و همکارلیک قیلیشلری کیره‌ک‌لیگینی ایتگن.
