جاپان حکومتی ناقانونی مهاجرلر گه قرشی نظارت چارهلرینی کوچهیتیرماقده. خلقارا ییتکرمهلرنینگ خبریگه کوره، جاپان مهاجرلر ادارهسی کیلگوسی ییلگه قدر اجتماعی ترماقلر و آنلاین پلتفرمهلرنی مانیتورینگ قیلووچی مخصوص بولینمه تشکیل ایتیشنی ریجهلشتیرماقده.
معلوم قیلینیشیچه، ینگی توزیلمه ناقانونی محنت فعالیتی بیلن شغللنهیاتگن خارجلیکلر، شونینگدیک ویزهسی مدتی اوتیب کیتگن حالده مملکتده قالهیاتگن شخصلر حقیده معلومات توپلش بیلن شغللنهدی.
رسمیلر اینیقسه عملدهگی حجتلرسیز ایشلهیاتگن مهاجرلرنی یوللـهیاتگن ایش بیروچیلر گه قرشی کورهشیشگه علیحده اعتبار قرهتماقده. شو مقصدده خارجی تیللردهگی ایش اعلانلری و ناقانونی ایشلرگه عاید معلوماتلرنی انیقلش اوچون زمانهوی تحلیلی واسطهلردن فایدهلنیلیشی ریجهلشتیریلگن.
معلوماتلر اساسیده، ناقانونی مهاجرلرنی ایشگه یوللـهگن کمپنیهلر حقیده خبر بیرگن شخصلرنی رغبتلنتیریش دستوری هم ایشگه توشیریلگن. اگر مراجعت اساسیده قانونبوزرلیک انیقلنسه، کیشی گه ۱۰ مینگ ین مقداریده مکافات بیریلهدی.
قید ایتیلیشیچه، جاپان اقتصادیاتیده ایشچی کوچی تنقیصلیگی کوزهتیلهیاتگنی سببلی خارجی ایشچیلر گه احتیاجی آرتیب بارماقده. اوشبو مملکت معلوماتلریگه کوره، قانونی فعالیت یوریتهیاتگن خارجلیکلر سانی میلادی ۲۰۲۵ ییلده ۲.۵۷ میلیون کیشیگه ییتگن بولیب، بو اولگی ییلگه نسبتن ۱۱.۷ فایز گه کوپ دیر.
شونینگدیک، جاپان گه سیاحلر آقیمی هم آشیب بارماقده. جاپان ملی ترویزم تشکیلاتی معلوماتلریگه کوره، میلادی ۲۰۲۵-ییلده روسیهدن کیلگن سیاحلر سانی قریب ۱۹۵ مینگ کیشیگه ییتگن.
