امریکا قوشمه ایالتلری جمهور باشلیغی دونالد ترامپ، کیله‌سی هفته چین‌نینگ شنژن شهریده بولیب اوته‌دیگن آسیا و اقیانوسیه اقتصادی همکارلیگی تشکیلاتی ییغیلیشی دایره‌سیده چین و روسیه رهبرلری شی جین پینگ و ولادیمیر پوتین بیلن اوچره‌شیب، تورلی مسئله‌لر جمله‌دن ایران اوروشینی توگه‌تیش حقیده مذاکره اوتکزیشینی بیلدیردی.
الجزیره، بوگون (۱۸ عقرب/۹ نومبر، یک‌شنبه) خبر بیریشیچه، ترامپ چین‌لیک و روسیه‌لیک همکسب‌لری بیلن اوچره‌شیش احتمالی حقیده گپیرر ایکن، مذکور اوچره‌شووده هسته‌ای قورال‌سیزلنیش و ایران اوروشینی یکونلش کبی تورلی مسئله‌لر محاکمه قیلینیشینی بیلدیرگن.
ترامپ، فلوریدا ایالتی‌نینگ وست پالم بیچ شهریده ژورنالیست‌لر بیلن صحبتده شونده‌ی دیگن: «مینیمچه، اوچره‌شوولردن بیری جمهور باشلیغ پوتین و جمهور باشلیغ شی بیلن بوله‌دی. بو قیزیقرلی اوچره‌شوو بوله‌دی.»
اونینگ کوپه‌یتیریشیچه، امریکا ایران اوروشیگه چیک قوییش اوچون تورلی یوللر بیلن سعی-حرکت قیلماقده و واشنگتن بو باره‌ده یخشی نتیجه‌لر گه ایریشگن.
آسیا و اقیانوسیه اقتصادی همکارلیگی تشکیلاتی ۱۹۸۹ ییلده تشکیل ایتیلگن بولیب، ۲۱ ته اعضا دولت‌دن عبارت. آسترالیا، کانادا، جاپان، چین، روسیه و امریکا اوشبو تشکیلات اعضالری حسابلنه‌دی. تشکیلات گه اعضا دولتلر رهبرلری اقتصادی مسئله‌لرنی محاکمه قیلیش و منطقه‌وی همکارلیکنی کینگه‌یتیریش مقصدیده هر ییلی ییغیلیش اوتکزه‌دیلر.
