سونگی ییللرده افغانستان بیر نیچه بار منطقه‌وی و خلق‌ارا ییغیلیش‌لر همده مذاکره‌لر مرکزیده بولگن؛ اوشبو ییغیلیش‌لرده سیاسی، خوفسیزلیک، اقتصادی و انسان پرورلیک مسسله‌لر جمله‌دن خاتین-قیزلر حقوقی بیلن باغلیق وضعیت هم محاکمه قیلنیگن.
ایریم سیاسی تحلیلچیلرنینگ فکریچه، افغانستان باره‌سیده اوتکزیله‌یاتگن ییغیلیش‌لر مملکت‌نینگ باشقه دولتلر بیلن علاقه‌لری و همکارلیگینی کینگه‌یتیریش اوچون امکانیت یره‌تیشی ممکن؛ بیراق عملی یوتوقلر، مذاکره‌لر سونگیده صادر قیلینه‌دیگن بیانیه‌لر، عملی کیلیشوولر و ملی منفعت‌لر گه سبب بولگن حالده قولگه کیلیشی ممکن.
سیاسی تحلیلچی محمدزلمی افغانیار پوپل‌نینگ ایتیشیچه، تامانلرنینگ کیلیشووی اوچون توشونماوچیلیک مسئله‌لر مذاکره میزی آرتیده بیان قیلینیشی کیره‌ک. او شونده‌ی دییدی: «افسوس که، افغانستان بوییچه یقینده اوتکزیلگن اوچره‌شوونی هم قوشیب حسابله‌گنده، اونلب خلق‌ارا ییغیلیش‌لر تشکیل ایتیلدی. بیراق اولرده فقط بیانات‌لر اعلان قیلینه‌دی. بونده‌ی یول بیلن افغانستان معمالرینی حل قیلیب بولمه‌یدی.»
یقینده، بیرلشگن ملتلر تشکیلاتی خوفسیزلیک کینگشی‌نینگ عیاللر، تینچلیک و خوفسیزلیک مسئله‌لریگه بغیشلنگن نوبتده‌گی ییغیلیشی ینه بیر بار افغانستان‌ده‌گی عیاللر و قیزلر احوالینی خلق‌ارا همجمعیت دقت مرکزیگه آلیب چیقدی. بیرلشگن ملتلر تشکیلاتی باش کاتبی آنتونیو گوترش خاتین-قیزلر بیلن باغلیق ساحه‌ده فعالیت یوریته‌یاتگن محلی تشکیلاتلر بیلن همکارلیک‌نی دوام ایتتیریش و اولرنی قوللب-قوتلشگه چقیردی.
بیرقطار عیال حقوقی فعاللری، عیاللرنینگ جمعیتده‌گی اورنی و افغانستان ایشچی کوچیده‌گی اولوشیگه ماس روشده تعلیم آلیش همده محنت قیلیش امکانیت‌لری یره‌تیلیشینی طلب قیلماقده. خاتین-قیزلر حقوقی فعالی مژده عزیزی شونده‌ی دییدی: «عیاللر افغانستان‌نینگ برچه ساحه‌لریده اشتراک ایتیشی کیره‌ک. افغانستان ایشچی کوچی‌نینگ یریمینی تشکیل ایته‌دیگن عیاللرنینگ اشتراکی فقط ایش بیلن چیکلنیب، بیر بورچککه سیقیب قوییلمسلیگی لازم.»
افغانستان بیلن باغلیق ییغیلیش‌لرده اسلام امیرلیگی وکیللری‌نینگ اشتراک ایتیشی هم محاکمه قیلینه‌یاتگن مسئله‌لردن بیری دیر. اسلام امیرلیگی بیر نیچه بار منطقه مملکتلری بیلن علاقه‌لر و همکارلیک‌نی کینگه‌یتیریشگه تأکید ایتگن، بیراق افغانستان گه عاید قرار قبول قیلیش جریانلریده اوز وکیللری اشتراک ایتیشینی طلب قیلگن.
ینه بیر سیاسی تحلیلچی صمیم شمسی‌نینگ ایتیشیچه، بونده‌ی اوچره‌شوولرده اسلام امیرلیگی وکیللری‌نینگ اشتراک ایتیشی ملاقات و اوز ارا انگلشوو جریانینی ثمره‌لی‌راق قیلیش ممکن. اونگه کوره: «افغانستان و اونینگ حکومتی حقیده اوتکزیله‌دیگن هر قنده‌ی اوچره‌شوو افغانستان منفعتی گه خذمت قیله‌دی. بو منطقه مملکتلری، دنیا همده قوشنی دولتلرنینگ افغانستان گه اعتبار قره‌ته‌یاتگنیدن دلالت بیره‌دی. اگر اسلام امیرلیگی وکیلی هم اشتراک ایتسه، ینه‌ده یخشی بوله‌دی.»
شو بیلن بیرگه، جاری ییل‌نینگ فقط اکتبر آیی‌ده افغانستان گه عاید بیر نیچته مهم منطقه‌وی و خلق‌ارا اوچره‌شوولر اوتکزیلدی. بیشینچی اکتبر کونی بولیب اوتگن مسکو فارمتی‌نینگ سکیزینچی ییغیلیشیده افغانستان بیلن سیاسی، اقتصادی و خوفسیزلیک ساحه‌لریده‌گی همکارلیک مسئله‌لری کوریب چیقیلدی.
