پکتیا ولایتی مرکزی گردیز شهری حدودلریگه قره‌شلی «عسکری فامیلی» منطقه‌سی یشاوچیلری، ایچیملیک سوودن فایده‌لنه آلمسلیک سببلی ایریم قیینچیلیک‌لر بیلن روپه‌ره بولگنلرینی ایته‌دیلر.
اولرنینگ ایتیشیچه، حاضرگی کونده اوشبو منطقه‌ده قریب ۵۰۰ عایله یشه‌یدی، اولرنینگ اکثریتینی سونگی ییللرده‌گی اوروش طفیلی آواره بولگن عایله‌لر تشکیل بیره‌دی؛ بیراق حاضرگچه اولر گه ایچیملیک سوودن فایده‌لنیش امکانیتی یره‌تیلمه‌گن.
اوشبو منطقه یشاوچیسی بولگن ظاهر و معصوم‌خان‌نینگ ایتیشلریچه، بوندن ایلگری منطقه‌ده ایکی کاریز بار ایدی، بیراق اولردن بیری قوروقچیلیک سببلی قوریگن و ینه بیری‌نینگ سووی ایسه سیزیلرلی درجه‌ده کمه‌یگن.
ظاهر شونده‌ی دییدی: «بو کاریزنینگ ایکی یا که اوچ ییل اول یخشی سووی بار ایدی، بیراق بو ییل قورغاقچیلیک سببلی قوریب قالدی. قریب ایکی یا که اوچ آی بوله‌دی سووی بوتونلی قوریب قالگن. آدملرنینگ ایچیملیک سووی یوق.»
معصوم‌خان هم، سوو یوقلیگی توغریسیده فکرینی شونده‌ی بیان قیله‌دی: «انچه ییلدن بیری قورغاقچیلیک بار و آدملر کوپینچه قیینچیلیک بیلن دوچ دیر. اکثریت آدملر کوپ زحمت بیلن اوزاق حدودلردن ایچیملیک سوولرینی آلیب کیله‌دی.»
عسکری فامیلی حدودی یشاوچیلریدن بولگن خیرالله و شاه‌محمود، ینه بیر کاریزنینگ سووی کمه‌یب و افلاسلنگنینی معلوم قیله‌دیلر؛ اولرنینگ ایتیشیچه، بو مشکل اوشبو منطقه‌ده یشاوچی باله‌لرنی تورلی کسللیکه چلنتیرگن.
اولرنینگ ایتیشیچه، کوپینچه عایله‌لرنینگ کمبغللیک سببلی چقور قودوق قازیشگه قوربی ییتمه‌یدی و کوپ قیینچیلیک بیلن اوزاق حدودلردن سوو آلیب کیلیشگه مجبورلر.
خیرالله شونده‌ی دییدی: «کاریزلر سووی جوده افلاس‌لنگن. کاریز یوقاریده‌گی قسمت‌لردن افلاس‌لنگن سوو کیله‌دی و کاریزلر سووینی هم افلاس‌لنتیره‌دی. کاریزدن سوو آلیب کیلسه‌ی هید بیره‌دی. باله‌لریمیز ایچکیتمه بوله‌دیلر و اولرنینگ اکثریتی کسل. آدملر کمبغل شونینگ اوچون چقور قودوق قازیشگه قورب‌لری ییتمه‌یدی.»
شو بیلن بیرگه، پکتیا محلی مسئوللری، عسکری فامیلی منطقه‌سیده سوو قیینچیلیگینی تصدیقله‌یدیلر.
پکتیا ولایتی قیشلاقلرنی قیته قوریش و رواجلنتیریش باشلیغی عنایت‌الرحمان جلالی گه کوره، گردیز شهری و بو ولایت تومنلریده سوو قیینچیلیگینی، تیگیشلی وزیرلیک و یاردم بیروچی نهادلر بیلن شریک قیلگن و اولر هم قیینچیلیک‌نی حل ایتیش وعده‌سینی بیرگنلر. او شونده‌ی دییدی: «مرکز و اطراف حدودلرده سوو آزلیگی قیینچیلیگی بار. بوتوغریده بولگن گزارش و معلومات‌لرنی مرکز همده یاردم بیروچی نهادلر بیلن شریک قیلگن میز. شبهه‌سیز منطقه‌ده قیینچیلیک بار؛ بیراق امکانیت یره‌تیلیشی بیلن اولرنینگ قیینچیلیگینی حل ایتیشگه حرکت قیله‌میز.»
ایچیملیک سوو کملیک معماسی فقط عسکری فامیلی منطقه‌سی بیلن چیکلنیب قالمه‌یدی؛ بلکیم گردیز شهری و پکتیانینگ باشقه تومنلری ایریم حدودلری‌نینگ یشاوچیلری ایچیملیک سوودن فایده‌لنیشدن محروم و مجبورلیکدن اریقلر و دریاچه‌لر سووی‌دن فایده‌لنه‌دیلر. بو احوال بعضی جایلرده باله‌لرنینگ تورلی کسللیکه چلینیشیگه سبب بولگن.
