بدخشان ولایتی بهارک تومنینینگ «دشتفراخ» منطقه یشاوچیلریدن قطاریگه کوره، ایچیملیک سووگه قول تاپه آلمهی، اریقچهلر بیلن دریالر سوویدن فایدهلنیشگه مجبورلر. اولرنینگ کوپهیتیریشیچه، ناپاک بولگن سوولردن فایدهلنیش بالهلرینی کسل قیلگن.
بهارک تومنی دشتفراخ حدودی «دوبندی» قیشلاغی یشاوچیلریدن رحمتخاننینگ ایتیشیچه، پاک سووگه قول تاپه آلمسلیک سبب، عایلهسی ایچیش، آزی-آوقت، کییم یوویش و باشقه موردلر اوچون اریقچهلر و دریالر سوویدن فایدهلنهدی. اونینگ کوپهیتیریشیچه: «ایچیملیک سوو یوقلیگی بیلن روپهرهمیز. بالهلریمیزنینگ ساغلام بولمهگن سوولردن فایدهلنیشی سبب، هر کونی تورلیخیل کسللیکلرگه چلینهدیلر.»
دشتفراخ یشاوچیلریدن باشقه بیری زلمینینگ ایتیشیچه، بالهلری اریقچهلر سوویدن فایدهلنیش سبب کسل بولگن. «ایچیملیک سوودن فایدهلنه آلمهیمیز و نیازیمیز بولگن سوونی اوزاق جایلردن ایشک آرقهلی تاشیمیز. بالهلردن کوپ قطاری اریق سوویدن فایدهلنیشگه مجبور. بو سوودن فایدهلنیش ساغلیقنی سقلش قیینچیلیکلری جملهدن ایچکیتمه اورته گه کیلیشیگه سبب بولگن.»
شونینگدیک بهارک تومنی دشتفراخ منطقه یشاوچیلریدن باشقه بیری وثیقنینگ ایتیشیچه: «نیچه مرته ایچیملیک سوو تنقیصلیگی قیینچیلیگینی مسئوللر بیلن جریان گه قویدیک؛ لیکن قیغو بیلن حاضرگچه بو قیینچیلیککه توجه قرهتیلمهگن؛ ایچیملیک سوو یوقلیگی سبب، منطقه یشاوچیلری اریقلر و بولاقلر سوویدن فایدهلنیشگه مجبورلر.»
بهارکنینگ مذکور یشاوچیلری، حکومتدن بو تومننینگ ایچیملیک سوو یوقلیگی قیینچیلیگینینگ حل و پاک سوودن فایدهلنیش امکانیتی یرهتیلیشینی سورهگن.
بو بیلن بیرگه، بدخشان قیشلاقلرنی رواجلنتیریش و قیته قوریش باشلیغی امانالله چهره، دشتفراخ یشاوچیلری قیینچیلیگینی تصدیقلب و ایتیشیچه، بو منطقه یشاوچیلریگه ایچیملیک سوو تامینلنیشی اوچون سعیوحرکتلر دوام قیلماقده. «دشتفراخ کته بیر منطقه بولیب و قریب اوچ دن تورت مینگ عایله اونده حیات کیچیرماقده که ایچیملیک سووگه جدی شکلده نیازلری بار؛ بو منطقه یشاوچیلریدن قطاری دریا و اریق سوویده فایدهلنهدی؛ اولر نیچه مرته ایستهکلرینی بیزلرگه ییتیشتیردیلر و شونینگدیک بیزلر هم بو قیینچیلیک حلی اوچون سعیوحرکت قیلماقدهمیز.»
سونگی ییللرده، هوا اوزگریشلری سبب افغانستان اهالیسی اینیقسه اوزاق بولیملر یشاوچیلرینینگ سوودن فایدهلنیشی چیکلنگن. بوندن آلدین بیرلشگن ملتلر تشکیلاتینینگ اوی-جای قوریش دستوری، افغانستان حاضرگچه میلیونلب کیشینینگ ایچیملیک و ایشانچلی سوودن برقرار شکلده فایدهلنه آلمسلیگینی ایتگن ایدی.
