ترافیکی گوجوملیک، باریب-کیلیش خرهجتلری کوپلیگی و وقتیده مقصدگه ییتیشیش ضرورلیگی، باشقه هر وقتگه قرهگنده کابل سرکلریده موترسایکلنینگ کوپراق کوزگه کوریلیشیگه سبب بولگن. یشاوچیلردن قطارینینگ ایتیشلریچه، بو وسیله آز صرف-خرهجت و گوجوملی یوللردن قولی شکلده اوته آلیشی اوچون اولرگه کوندهلیک باریب-کیلیشنی قولیلشتیرگن.
اولرگه کوره، موترسایکلدن فایدهلنیش نهفقط ترانسپورت خرهجتلری، بلکیم مقصدگه ییتیشیش وقتینی هم کمهیتیرگن. بو توغریده کابل شهری ۸-ناحیه یشاوچیسی خالدنینگ ایتیشیچه: «ایشگه موتر بیلن بارگنیمیزده یول گوجوملیگیده یریم ساعت قالهمیز، بیراق موترسایکل بیلن کیتگنیمیزده ایسه یریم ساعتگچه ایشگه بارهمیز. موتر گه نسبت مصرفی هم آز دیر و اونچه وقتنی هم آلمهیدی و آز وقتده مقصدگه هم ییتیشه آلهمیز.»
شونینگدیک کابلنینگ ۱۵-ناحیه یشاوچیسی بولمیش نقیبالله گه کوره: «حاضرگی شرایطده موترسایکل همه نرسه دیر و بیزلرگه کوپ آسایشتهلیکنی یرهتگن. ۲۵۰ افغانی بیر هفتهگه ییتیشهدی و گوجوملیکده هم قولی شکلده یولدن اوته آلهمیز.»
موترسایکل یالغیز کونده باریب-کیلیش موضوعسیگه چیکلنمهیدی. آنلاین خذمتلر و آوقت بویورتمهلری کوپهیشی بیلن بیرگه، بو وسیله مذکور خذمتلر کورسهتیلیشی بوییچه اصلی اوسکونهلردن بیریگه اوزگرگن.
کابل شهریدهگی رستورانتلردن بیریده آوقت بویورتمهلرینی ییتیشتیرهدیگن بولیمیده فعالیت قیلهدیگن محمدبلال شریفینینگ ایتیشیچه، موترسایکل سبب بویورتمهلرنینگ آز وقتده مشتریگه ییتیشتیره آلهدی. «یوللر بند بولگنیده هم آوقتنی ییتیشتیره آلهمیز. بعضا موترسایکل بولمهگنی و بویورتمهمیز بولگنیده، وقتیده بویورتمهنینگ ییتیشتیریش قیین بولهدی.»
شونینگدیک اقتصادی ایش بیلرمانلرنینگ ایشانچیگه کوره، موترسایکلدن فایدهلنیش عایلهلرنینگ ترانسپورت خرهجتلرینی کمهیتیریشگه علاوه کیچیک کسب-کارلر رواجلنیشیگه هم یاردم بیرگن.
بو توغریده اقتصادی ایش بیلرمان شاکر یعقوبینینگ ایتیشیچه: «اقتصادی نقطهی نظریدن موترسایکل آز خرهجتلی بیر وسیله دیر. هم تیلی خرهجتی آز دیر و همده اونینگ سقلهنیش خرهجتی کم دیر. کیچیک کسب-کارلر اوچون هم موترسایکل مناسب بیر تنلش دیر؛ چونکه توارلرنی آز و تیز شکلده مشتریگه ییتیشتیره آلهدیلر که نتیجهده خرهجتلری کمهیهدی و هم درآمدلری کوپهیهدی.»
موترسایکلدن فایدهلنیش کوپهیشی، بو وسیلهنینگ ساتیب آلینیش بازارینی هم رواجلنتیرگن. ساتووچیلرنینگ ایتیشلریچه، فایدهلنیش خرهجتی کم بولگنی بازارده ایستهکلر کوپهیگنی عاملی حسابلنهدی.
کابل شهری بیرینچی ناحیهسیدهگی موترسایکل ساتووچیلردن حکمتاللهنینگ ایتیشیچه: «موترسایکللر ساتیلیش میزانی اوزگرگن و ساتیلیش بازاری یخشی دیر، چونکه اقتصادی نقطهی نظریدن کوندهلیک قیینچیلیکلرنی حل قیلیش اوچون آز خرهجت کوتارهدی. کابل و آلتی ولایتده ساتیشلریمیز جودهیم یخشی بولیب و اهالی کوپ فایدهلنهدی.»
ایستهکلر کوپهیشی بیلن بیرگه، مسئوللر هم کابل ده موترسایکللر ثبت بولیش سانینینگ رشدیدن خبر بیرهدیلر. ایچکی ایشلر وزیرلیگی ترافیک عمومی ریاستی سوزلاوچیسی حکمتالله سمیرنینگ ایتیشیچه، حاضرگچه ۷۰ دن ۸۰ مینگ موترسایکل کابل ده ثبت بولگن. اونینگ کوپهیتیریشیچه: «کابل ده ۷۰ دن ۸۰ مینگ موترسایکلنی ثبت قیلگنمیز. بو وضعیتگه قرهگنده ۱۵۰ مینگ دن ۲۰۰ مینگ موترسایکلنینگ بارلیگی ممکن. بو رقمگه توجه قیلیش بیلن اولرگه جوازسیر حجتینی ترقهتیش اوچون حرکت قیلهمیز.»
باشقه تاماندن، مالیه وزیرلیگی سوزلاوچیسی عبدالقیوم نصیرنینگ سلاموطندار گه ایتیشیچه، افغانستان بازاریدهگی بار موترسایکللردن کوپینچهسی پرزه شکلده کیلتیریلیب و مملکت ایچیده مونتاژ بولیب و بازارگه چیقریلگن. اونگه کوره، بو جریان ایش امکانیتلرینینگ یرهتیشده هم رول اوینهگن. «موترسایکل قریب پرزه شکلده افغانستان گه کیلتیریلهدی و تیار شکلده کیلمهیدی. موتر کبی ساغلام شکلده کیلتیریلیشی صفر یا-ده جودهیم آز دیر. بو ییرده کارخانهلرده توزهتیلیب و بازارگه چیقریلهدی. بو جریان ایش امکانیتلری یرهتیلیشی مقصد هم عملگه آشیریلهدی.»
سونگی ییللرده موترسایکل باریب-کیلیش بوییچه ساده بیر وسیلهدن یشاوچیلر اینیقسه کابل شهریدهگی یشاوچیلرینگ کوندهلیک حیاتلری و اقتصادی فعالیتلری بیر بولیمیگه اَیلنگن. بیر قطار کیشی اوچون بو وسیله خرهجتلر کمهیشی و شهر گوجوملیگیدن اوتیش یولی و باشقه بیر قطار کیشی اوچون ایش و درآمد قولگه کیلتیریش بوییچه وسیله بولگن. موترسایکل دن فایدهلنیش کوپهیشی و شهری خذمتلرده اونینگ اورنی گه کوره، بو وسیله کابل شهرینینگ اقتصادی و تاشیش سیستمی بوییچه مهم بیر بولیمگه اوزگرگن.
