چمه‌سی اوچ هفته آلدین امریکا قوشمه ایالت‌لری نینگ جمهور باشلیغی جوبایدن، کابل شهری نینگ شیرپور منطقه‌سیده امریکا حربی کوچلری نینگ هوایی هجومی عاقبتیده القاعده رهبری ایمن‌الظواهری اولدیریلیشینی معلوم قیلدی.
گرچند اسلامی امارت سرپرست حکومتی امریکا نینگ هوایی هجومیده القاعده رهبری اولدیریلیشینی رسمی روشده تصدیقلمسه ده، بیراق شو بیلن هم مذکور هجوم عاقبتی افغانستان اوستیگه سلبی تأثیر قیلیشی سیزیلماقده دیر.
بیزلرنینگ فیسبوک صحیفه‌میزگه باش اورینگ!
اوتگن کون وال‌استریت ژورنال بیر گزارش ترقه‌تیب ایتیشیچه، امریکا قوشمه ایالت‌لری نینگ جمهور باشلیغی جوبایدن، ایمن‌الظواهری اولدیریلیشیدن کیین امریکا بانک‌لریده افغانستان گه عاید ۷ میلیارد دالرنی آزاد قیلمسلیک قرارینی آلگن.
شونینگدیک وال‌استریت ژورنال کونده‌لیگی نینگ معلوماتی اساسیده، امریکا بوتوغریده اسلامی امارت بیلن مذاکره‌لرنی توخته‌تگن.
اسلامی امارت سوزلاوچیسی نینگ اورین باسرلریدن بلال کریمی اوشبو گزارش گه مناسبت بیلدیریب سلام‌وطندار گه ایتیشیچه، امریکا تامانیدن افغانستان پول‌لری توسیلیشی ناقانونی دیر.
شونینگدیک جناب کریمی گه کوره، اسلامی امارت سرپرست حکومتی، افغانستان پول‌لری آزاد ایتیلیشی گه دایر امریکا گه قانیقرلی دلیل‌لرنی اوزه‌تگن.
امریکا افغانستان سرمایه‌لرینی آزاد ایتمسلیک قرارینی عین‌حالده آلگن که، اوشبو گزارش‌لردن آلدین امریکا افغانستان پولینی آزاد ایتیش خصوصیده مذاکره قیلیش گه تیارگرلیک کورستگن ایدی.
بیزلرنینگ توییترده هم تعقیب قیلینگ!
برچه‌سی بیلن، اقتصادی ایش بیلرمان لعل زازی امریکا تامانیدن افغانستان نینگ سرمایه‌لری موزله‌تیلیشینی، مملکت بویلب اقتصادی وضعیت و پولی ثبات اوستیگه سلبی تأثیر قیلیشی ممکن دیدی.
بیرییل اول افغانستان ده اسلامی امارت قدرت نی قولگه آلیشیدن کیین؛ امریکا افغانستان نینگ قریب ۹ میلیارد دالرینی اوشبو مملکت بانک‌لریده موزله‌تیشگه قرار قیلدی.
عین‌حالده، اوتگن بیر ییل ده افغانستان نینگ اقتصادی وضعیتی سیزیلرلی درجه‌ده تنزل گه یوز توتدی و حاضرگه قدر، مملکت نینگ بانکی تیزیمی عادی حالتی گه قیتمه‌گن.
