مملکت نینگ قطار ولایت‌لریده اوقیتووچیلردن بیرقطاری، معارف وزیرلیگی نینگ معلم تربیه‌لش نهادلری بیکار قیلینیش قراری گه مناسبت بیلدیریب ایتیشلریچه، اولکه ده‌گی معلم تربیه‌لش نهادلری اوز تأثیراتی گه ایگه، موازی و تاثیرسیز بیر نهاد اوله‌راق بیکار قیلینمسلیگی کیره‌ک.
سیدجمال‌الدین معلم تربیه‌لش انستیتوتی ده اوقیتووچی (مستعار اسملی) نوید، معلم تربیه‌لش نهادلری بیکار قیلینیشیدن خواطر بیلدیریب ایتیشیچه، اوشبو قرار مملکت معارفی اوستیگه سلبی تأثیر قیله‌دی. «معلم‌لر مسلکی و ظرفیت‌لری آشیریلیشی گه نیازمند دیر، بو نهادلر معلم‌لر نینگ ظرفیت‌لرینی آشیریش گه مستقیم طرزده رولی بار، بو نهادلر بیکار قیلینسه معارف زیان کوره‌دی.»
بیزلرنینگ فیسبوک صحیفه‌میزگه باش اورینگ!
سرپل ده اوقیتووچیلردن باشقه بیری (مستعار اسملی) شعیب معارف وزیرلیگی دن، معلم تربیه‌لش نهادلری بیکار قیلینیشی گه دایر قرارلر کوریب چیقیلیشینی ایسته‌یدی. «بو نهاد بیکار قیلینسه کوپ سانده اوقیتووچیلر وظیفه‌لرینی قولدن بیره‌دی اما باشقه لوازم‌لرده جذب ایتیلیش‌لری ممکن، یالغیز سرپل ده معلم تربیه‌لش انستیتوتی ده قریب ۶۰ ییگیت ایش بیلن مصروف دیر، بو قرار اولر نینگ اقتصادی اوستیگه تأثیر قیله‌دی.
شو بیلن بیرگه، معارف وزیرلیگی بیر بیانیه ترقه‌تیب ایتیشیچه، ینگی‌لیکده باش وزیرلیک نینگ آی‌لیک‌لر و تشکیلات کمیسیونی، اوشبو وزیرلیک تشکیلاتیده موازی و تأثیرسیز توزیلمه‌لرنی بیکار قیلیش گه قرار قیلگن.
پنجشیر ده معلم تربیه‌لش انستیتوتی ده اوقیتووچی (مستعار اسملی) پرویز گه کوره، دارالمعلمین‌لر تعلیم و تربیه نینگ اصلی ستونی دیر، موازی و تأثیرسیز اداره اوله‌راق حسابلنمسلیگی کیره‌ک. «بیزلر نینگ سوزلریمیز گه دقت قیلینیش گه امیدوار میز، نیچه مرته بو اداره‌لر بیکار ایمسلیگینی ایتدیک، معلم تربیه‌لش اداره‌لرینی تأثیرچن‌لیگینی معلوم قیلیش اوچون معلم تربیه‌لش ساحه‌سیده متخصص‌لر بیر قرار گه کیلیش‌لری لازم، بوتوغریده فکر_ملاحظه‌لر اورگه نیلیشنی ایسته‌یمیز.»
بیزلرنینگ توییترده هم تعقیب قیلینگ!
باشقه تاماندن، تعلیم و تربیه ایش بیلرمان‌لری، معارف وزیرلیگی توزیلمه‌سیده معلم تربیه‌لش نهادلرینی، تعلیم صفتینی آشیریش و اوقیتووچیلر توانالیگینی کوچه‌یتیریش اوچون اینیقسه ولایت‌لرده تأثیرچن عنوان قیله‌دیلر.
تعلیم و تربیه ایش بیلرمانی شفیق‌الله سادات نینگ ایتیشیچه: «بو نهادلر معلم‌لر نینگ ظرفیتینی آشیریش اوچون اونملی دیر، بعضی ولایت‌لرده قطار معلم‌لر ظرفیت‌لرینی آشیریش اوچون تعلیم کوره‌دیلر، ینه بیر تاماندن ضیالی کیشی‌لر دیر اوشبو یول آرقه‌لی معاش آلیشه‌دی.»
معارف وزیرلیگی تامانیدن ترقه‌لگن بیانیه اساسیده، معلم تربیه‌لش معینیتی سابق حکومت تامانیدن مذکور وزیرلیک نینگ اداری تشکیلاتی دن بیکار قیلینگن و ریجه‌سیز فعالیتی بولگن ولایتی توزیلمه‌لری ده، هر ییلی یوزلب میلیون افغانی صرف‌لنر ایدی.
