اوشبو قول صناعتی بویوملری ایشخانهسی، ۵۰ مینگ افغانیدن آرتیق مبلغ عوضی گه، اقتصادی امکانیتلری آز بولگن عیاللرنی ایش بیلن تأمینلش مقصدیده، بیر عیال تامانیدن تشکیل ایتیلگن.
ایشخانه مسئولی زرنگارنینگ ایتیشیچه، اولر طبیعتدن «کُلک» کبی موادلرنی ییغیب، اولرنی تیارلهگچ، خینه تختهسی، قول سومکهسی و باشقه قول محنتی بویوملری کبی تزئینی محصولاتلرنی تیارلشده فایدهلنهدیلر.
اونینگ سوزلریگه کوره، اوشبو ایشخانهنینگ تشکیل ایتیلیشی بیرقطار عیاللر گه ایش بیلن تأمینلنیش و قول محنتی بویوملرینی تیارلشنی اورگنیش امکانیتینی یرهتگن. او شوندهی دییدی: «خام اشیا ییتیشمسلیگی سببلی کوپلب معمالر گه دوچ کیلماقدهمیز و کیرهکلی موادلرنینگ اکثریتینی طبیعتدن ییغیب آلهمیز، جملهدن اینگ کوپ فایدهلنهدیگن موادلریمیزدن بیری کلک بولیب، اونی ییغیش اوچون کوپینچه چولگه بارهمیز»
اوشبو ایشخانهنینگ تشکیل ایتیلیشی نتیجهسیده عایلهلرینینگ خرهجتلرینی تأمینلش مسئولیتینی اوز زمهسیگه آلگن بیر قطار قیزلر و عیاللر اوچون ایش اورینلری یرهتیلگن.
قول محنتی بویوملری ایشخانهسیده ایشلهیدیگن رویا، ایش بیلن تأمینلنگنیدن خورسندلیگینی بیلدیریب، حاضرده بو ایشدن آلهیاتگن درآمدی آرقهلی عایلهسینینگ خرهجتلرینی قاپلش گه اوز حصهسینی قوشهیاتگنینی ایتهدی. اونینگ ایتیشیچه: «اشکاشم تومنیده هنرمندچیلیک ایشخانهسی فعالیت باشلهدی و بوندن جوده خورسند و امیدوارمیز. اوشبو ایشخانه آرقهلی اوی-روزغار خرهجتلریمیزنینگ بیر قسمینی تأمینلشیمیز و اوز محنتیمیز همده حرکتیمیز عوضی گه کونیگه تخمیناً ۲۰۰-۳۰۰ افغانی درآمد تاپیشیمیز ممکن. بو بیز اوچون یخشی امکانیت دیر.»
ایشخانه خادملریدن بولگن بصیرهنینگ ایتیشیچه، او اوشبو ایشخانهده تورلی خیل قول محنتی بویوملرینی جملهدن تاجیکچه کلهپوش و سبد توقیشنی اورگنگن.
او، کیلهجکده اوزینینینگ شخصی ایشخانهسینی تشکیل ایتیب، باشقه عیاللر اوچون هم ایش اورینلری یرهتیشگه امید قیلماقده. او شوندهی دییدی: «بیر مدتدن بیری اوشبو ایشخانهده ایشلهیپمن و بو ییرده تورلی خیل هنرمندچیلیک تورلرینی، جملهدن تاقین و تاقینلرنینگ تورلی کورینیشلرینی، تخت خینه و رغزه اورگندیم جوده خورسندمن چونکی هنرمندچیلیک نهفقط صنعت بلکی اشکاشم خلقینینگ مدنیتی و اوزیگه خاصلیگینینگ بیر قسمی دیر.»
رقیه، مذکور ایشخانهده ایشلهیاتگن ینه بیر عیال بولیب، عیاللر اوچون کوپراق ایشخانهلر تشکیل ایتیش امکانیتلرینی یرهتیشنی ایستهیدی. اونینگ فکریچه، عیاللر محنت و فعالیت آرقهلی اوز حیاتی احتیاجلرینی تأمینلهی آلیشلری کیرهک. او شوندهی دییدی: «حکومت و مسئول تشکیلاتلردن التماسیمیز شو کی، عیاللر اوچون کوپراق ایش اورینلری و محنت امکانیتلری یرهتیلیشینی تأمینلش دیر، تا کی عیاللر ایشسیز قالمهسین.»
بدخشان ولایتی صناعت و سودا ریاستی مسئوللری، قول صناعتی بویوملری ساحهسیده عیاللرنینگ فعالیتلریدن قوللب-قوتلشنی بیلدیرهدی.
بدخشان صناعت و سودا ریاستینینگ تدبیرکارلر باش مدیری ثمرالدین رحمانی شوندهی دییدی: «بیزنینگ قوللب-قوتلشیمیز شوندن عبارت کی، اولر اوز محصولاتلرینی ساتیشلری اوچون بازار تاپیب بیرهمیز. کورگزمهلر تشکیل قیلهمیز و محصولاتلرینی نمایش ایتیشلری همده مناسب بازار تاپیشلری اوچون شرایط یرهتهمیز.»
بدخشان صناعت و سودا ریاستی مسئوللرینینگ معلوماتیگه کوره، حاضرگی کونده بو ولایتده ۴۰۰ ن آرتیق قول محنتی بویوملری ایشخانهسی فعالیت یوریتماقده.
