عیاللر اوچون ایش امکانیتلری کم بولگن کونلرده، قندوزدهگی بیر عیال تیکوچیلیک و قول صناعتی ایشخانهسینی آچیب و خاتین-قیزلر گه ایش امکانیتلرینی یرهتگن؛ بو اولرنی مالیهوی مستقللیککه ایریشیشگه یاردم بیرهدی.
اوشبو تیکوچیلیک ایشخانه اساسچیسی ۲۷ یاشلی فاطمه، اوقیشدن محروم ایتیلگنیدن سونگ تسلیم بولمهدی. او شخصی پولی بیلن بیر آی اول اوشبو ایشخانهنی آچدی، نهفقط اوزی اوچون بلکی باشقه عیاللرنی هم ایش و مستقللیککه ایریشتیریش مقصدی بیلن. فاطمه گه کوره، بو ایشخانهنی اوقیشدن محروم ایتیلگن قیزلر، قشاق عیاللر و چیت ایل مملکتلردن قیتگن عیاللرنی ایش بیلن تأمینلش مقصدیده تشکیل ایتگن.
اونینگ ایتیشیچه، بو ایشخانه ۵۰۰ مینگ افغانیدن آرتیق پول عوضیگه آچیلگن و ایندی ۷۵ عیالنی ایش بیلن تأمینلهگن، اولر اوشبو ایشخانهدن قولگه کیلتیرهدیگن پول بیلن بعضی احتیاجلرینی تأمینلهی آلهدی.
او شوندهی دییدی: «اوشبو تیکوچیلیک ایشخانه، مهره دوزلیک، قالین توقیش، قول توقیمه، اویلرنینگ دیکوریشنی همده جمعیتدهگی عیاللر اوزینی-اوزی تأمینلش گه یاردم بیریش اوچون آچیلگن.»
فاطمهنینگ کوپهیتیریشیچه، اوشبو ایشخانهده مکتب باریشدن محروم ایتیلگن کوپینچه قیزلر ایکی نوبتده کیلیب استادلر نظارتی آستیده قالین توقیش، مهره دوزلیک و قول توقیمه مهارتلرنی اورگنهدی.
او شوندهی دییدی: «ایشخانهده ۲۵ کیشی ایشلهیدی، استادلر شامل همه ایشخانه خادمی حسابلنهمیز. آلتی درس بیریش صنفی بار هر قیسی بیر ساعتلیک و عیاللر گه درس بیریلهدی.»
تیکوچیلیک ماشینلرینینگ ترتیبلی آوازی ایچیده، اوز قوللری بیلن احتیاجلری بیر بولیمینی تأمینلهیاتگن عیاللر کوزهتیلهدی.
مذکور ایشخانه خادملریدن بولمیش سهیلانینگ ایتیشیچه، بو ییرگه کیلمسدن آلدین کونلرینی ساکتلیک و ایشسیزلیکده اوتکزردی؛ بیراق بو ایشخانه اونینگ اوچون هم مشغولات هم احتیاجلرینی تأمینلش اوچون امکانیت ایشیگی بولیب خذمت قیلماقده.
اونگه کوره: «مکتبلر یاپیلگچ کوپینچه قیینچیلیک بیلن دچار بولدیم؛ ایشسیز ایدیم؛ بیراق بو ایشخانه آرقهلی احتیاجلریمدن بیر قسمینی تأمینلشگه اولگورهیپمن.»
اوشبو ایشخانهنینگ باشقه بیر قسمیده زهرا اولتیرگن؛ او اوقیش پیتیده خبرچی بولیشنی آرزو قیلگن. حیات یونهلیشی اوزگرگن بولسه-ده، بیراق کیلهجککه امیدوار و ینگی کونیکمه (مهارت)لرنی اورگهنیش اوچون بو ییرگه کیلهدی.
او شوندهی دییدی: «ایندی بو ییرده ایش بیلن مصروف من. بو ییر فقط تیکووچیلیک ایمس؛ بیز قالین توقیش، مهره دوزلیک، گل دوزلیک، گراف دوزلیک و کوپینچه قول توقیمه ایشلرینی اورگنهمیز.»
حسیبه، تیکوچیلیک ماشینلرینینگ ترتیبلی آوازلری ایچیده حیات کیچیرهیاتگنلردن بیری. اونینگ ایتیشیچه، تیریکچیلیک احوالی یخشیلنیشی و بالهلرینینگ اوقیتتیریش اوچون ایران گه مهاجر بولگندی، بیراق ینه افغانستان گه قیتگن. شو بیلن بیرگه، او تسلم بولمهدی و ایندی اوشبو ایشخانهده سعی-حرکتی بیلن هر کونی ۵۰۰ درآمد قولگه کیلتیرهدی؛ بو مقدار پول کم بولسه-ده، بیراق عایله اعضالرینینگ احتیاجلرینی تأمینلش اوچون مهم. او بوندهی ایشلر کوپینچه عیاللرنینگ تقدیرینی اوزگرتیریش اوچون ینگی دیرهزه بولیشیگه ایشانهدی.
او شوندهی دییدی: «اسلام امیرلیگیدن ایستهیمیز بیزنی قوللب-قوتلهسین بیز بوساحهده رواجلنهیدیک و عیاللر اوچون ایش امکانیتی یرهتیلسین.»
فاطمه ایشخانهسی، گرچند کیچیک بولسه-ده، بیراق او ییرده ایشلهیدیگن عیاللر اوچون ایشدن تشقری معنانی افاده قیلهدی؛ بو ییر قیته توریش و دوام ایتتیریش اورنی دیر.
