د پکتيا د ډنډپټان ګمرک کې د ۴۴ میلیونه افغانيو په لګښت د سوداګریزو توکو د ساتنې او تخلیې لپاره د ګُدامونو د جوړېدو چارې پيل شوې.
د دې ګُدامونو د جوړېدو چارې نن پنجشنبه د لړم ۱۸مه په رسمي توګه پیل شوې.
د سلاموطندار پښتو فېسبوکپاڼه وڅارئ
د ګمرکاتو عمومي رياست د ګمرکونو د پراختيا او ملاتړ عمومي رييس محمدموسی عمر وايي چې ډنډپټان ګمرک کې د سوداګریزو توکو د تخلیې او ساتنې لپاره دغه ګُدامونه د ماليې وزارت لهخوا جوړېږي.
د نوموړي په وینا، د ګُدامونو نشتون له امله به دغه ګمرک کې توکي د اورښتونو او لمر له امله خرابېدل چې په جوړېدو سره به یې توکي د لهمنځه تلو له ګواښ خوندي وساتل شي.
ډنډپټان کې چارواکي زیاتوي چې ګمرک کې به سوداګرو ته اړوند ټولې اسانتیاوې برابرې کړي.
په ورته مهال يوشمېر سوداګر د ډنډپټان ګمرک کې د توکو تخلیې او ساتنې لپاره د ځانګړو ګُدامونو جوړېدو ته خوښ دي او وايي، له دې وړاندې یې توکي لمر او باران لهمنځه وړې دي.
د دوی په وینا، د دې ګُدامونو په جوړېدو سره به د توکو لهمنځه تلو له امله له زیانونو خلاص شي.
خو دغه سوداګر بیا نیوکه کوي چې له پاکستان سره د ډنډپټان د خرلاڅي دروازې له لارې ډېر توکي لېږد او رالېږدول کېږي، خو په وینا یې، د دې ولسوالي او مرکز ګردېز ترمنځ لاره باید ورغول شي.