د ماشومانو لپاره د ملګروملتونو وجهي صندوق یا یونېسف له لوري په روزګان کې د څه باندې ۱۸ میلیونه افغانیو په لګښت د اوبو دوه شبکې جوړې او ګټېاخیستنې ته وسپارل شوې.
د اوبو دغه شبکې په مرکز ترینکوټ او چورې ولسوالي کې جوړې شوې دي.
د سلاموطندار پښتو فېسبوکپاڼه وڅارئ
د یادو سیمو اوسېدونکي د اوبو د دغو شبکو له جوړېدو خوښي څرګندوي او وايي چې له دې وړاندې به یې د پاکو اوبو برابرولو لپاره په ساعتونو پلی مزل کاوه.
په دې اړه جوړو شوې غونډه کې د روزګان والي محمدعلي جان احمد وویل چې د اوبو د دغه ذخيرو په جوړېدو سره به د سيمې زرګونه خلکو ته د پاکو اوبو زمينه برابره شي.
نوموړي پر ټولو مرستندویه بنسټونو غږ وکړ چې د خلکو اړتياوو ته په کتو دې دغه ولایت کې بېلابېلې پروژې پلې کړي.
محمدعلي جان احمد زیاته کړه چا ته اجازه نهورکوي چې د موسسو په فعاليتونو کې لاسوهنه وکړي. هغه له اړوند مرستندویه بنسټونو غوښتنه وکړه، که یې څوک په چارو کې لاسوهنه کوي، دوی ته دې ور په ګوته کړي.
د روزګان ترڅنګ د هېواد په ګڼو نورو سيمو کې هم له څو کلونو راهیسې وچکالي روانه ده چې خلک یې له بېلابېلو ستونزو سره مخ کړي دي.